മലാന ഗ്രാമം, ഹിമാചല് പ്രദേശ്
ഹിമാചല് പ്രദേശില് പുറം ലോകവുമായി വലിയ ബന്ധമൊന്നുമില്ലാതെ ഒറ്റപ്പെട്ടു കിടക്കുന്ന ഒരു ചെറു ഗ്രാമമാണിത്. ഹിമാചല് പ്രദേശിലെ കുളു ജില്ലയിലാണ് മലാന ഗ്രാമം. പ്രശസ്തമായ പാര്വതി വാലിയുടെ ഭാഗമാകുന്നു ഈ പ്രദേശം. മറ്റ് ഗ്രാമങ്ങളില് നിന്ന് വ്യത്യസ്തമായി തനതായ സംസ്കാരവും വിശ്വാസങ്ങളുമൊക്കെ പേറുന്ന ഒരു ഗ്രാമമാണ്. ഇതാണ് ഈ ഗ്രാമത്തിലേക്ക് ചിലരെ ആകര്ഷിക്കുന്നത്. പുതു സ്ഥലങ്ങള് എക്സ്പ്ലോര് ചെയ്യാന് താല്പ്പര്യമുള്ളവര്ക്ക് മലാന ഗ്രാമത്തിലേക്ക് ഒന്ന് പോയി വരാം. ചരിത്രകാലം മുതല് അനുഷ്ഠിച്ചു വരുന്ന ചില ആചാരങ്ങളും ഇപ്പോഴും ഒരു കുറവും വരുത്താതെ ഗ്രാമീണര് നടത്താറുണ്ട്. ട്രെക്കിംഗ് ഇഷ്ടമുള്ളവര്ക്ക് മലാനയിലേക്കുള്ള പാതയും നന്നായി ഇഷ്ടപ്പെടും.
അന്തര്ഗംഗെ
കര്ണാടകത്തിലെ കോലാര് ജില്ലയിലാണ് അന്തര്ഗംഗെ. ബാംഗ്ലൂര് നഗരത്തില് നിന്ന് 70 കിലോമീറ്ററുണ്ട് ഇവിടേക്ക്. സമുദ്ര നിരപ്പില് നിന്ന് 1712 മീറ്റര് ഉയരത്തില് നില്ക്കുന്ന ചെറുപര്വതമാണ്. പാറക്കല്ലുകള് നിറഞ്ഞ ഈ പ്രദേശം നിരവധി സഞ്ചാരികള് വന്നുപോകാന് ഇഷ്ടപ്പെടുന്നു. ട്രെക്കിംഗ്, റോക്ക് ക്ലൈംബിംഗ്, കേവ് എക്സ്പ്ലൊറേഷന് എന്നിവയ്ക്ക് ഏറ്റവും അനുയോജ്യം. നിരവധി ഗുഹകള് ഇവിടെ കണ്ടെത്താനാകും. പേരു സൂചിപ്പിക്കുന്നതു പോലെ തന്നെ ഇവിടെ പാറക്കെട്ടുകള്ക്കുള്ളില് നിന്ന് അരുവി ഉല്ഭവിക്കുന്ന കാഴ്ച്ച കാണാം. ബാംഗ്ലൂര്, തിരുപ്പതി, ചെന്നൈ തുടങ്ങിയ സ്ഥലങ്ങളില് നിന്ന് റോഡ് മാര്ഗം ഇവിടെ എത്തിച്ചേരാനാകും. ട്രെയിന് മാര്ഗം വരാന് ഉദേശിക്കുന്നവര്ക്ക് കോലാര് റെയില്വേ സ്റ്റേഷനില് ഇറങ്ങാം. ഇവിടെ നിന്ന് മൂന്ന് കിലോമീറ്റര് മാത്രമാണ് അന്തര്ഗംഗെയിലേക്കുള്ള ദൂരം.
ദ്രാസ് വാലി, കശ്മീര്
കാര്ഗിലില് നിന്ന് 60 കിലോമീറ്റര് അകലെയാണ് ദ്രാസ് വാലി സ്ഥിതി ചെയ്യുന്നത്. ഇന്ത്യയിലെ ഏറ്റവും തണുപ്പു കൂടിയ രണ്ടാമത്തെ സ്ഥലം എന്ന നിലയില് പ്രസിദ്ധമാണെങ്കിലും അധികമാരും എത്തിപ്പെടാത്ത സ്ഥലമാണ്. മൈനസ് 45 ഡിഗ്രി വരെ ഇവിടത്തെ താപനില താഴാറുണ്ട്. ഇത്രയും തണുപ്പില് ജനജീവിതം ദുസഹമായിരിക്കും. സമുദ്രനിരപ്പില് നിന്ന് 3230 മീറ്റര് ഉയരത്തിലാണ് ദ്രാസ്. ഗേറ്റ്വേ ടു ലഡാക്ക് എന്നും ഈ സ്ഥലം അറിയപ്പെടുന്നു. ശ്രീനഗറിലേക്ക് പോകുന്ന വഴിയില് ദേശീയ പാത 1 ഡിയിലാണ് ഈ ചെറു പട്ടണ സ്ഥിതി ചെയ്യുന്നത്. ഡല്ഹിയില് നിന്ന് ശ്രീനഗറിലക്ക് ബസ് സര്വീസുണ്ട്. ശ്രീനഗര് വിമാനത്താവളമാണ് ഏറ്റവും അടുത്തുള്ള വിമാനത്താവളം.
Also Read: കൊറോണ 'താറുമാറാക്കിയ' പ്രധാന കേന്ദ്രങ്ങള്
സിറോ വാലി, അരുണാചല് പ്രദേശ്
ഇന്ത്യയുടെ വടക്കുകിഴക്കന് സംസ്ഥാനമായ അരുണാചല് പ്രദേശിലെ ഒരു പഴയ പട്ടണമാണ് സിറോ. പൈന് മരങ്ങള് നിറഞ്ഞ കുന്നുകളും നെല്പ്പാടങ്ങളും ചേര്ന്ന് സിറോ താഴ്വരയ്ക്ക് പ്രത്യേക സൗന്ദര്യം നല്കുന്നു. അപാ താനി ഗോത്രവര്ഗക്കാര് ഇവിടെ വസിക്കുന്നു. വര്ഷം മുഴുവന് തണുത്ത കാലാവസ്ഥയായിരിക്കും ഇവിടെ. വര്ഷത്തില് എല്ലായിപ്പോഴും ഇവിടം സന്ദര്ശിക്കാന് അനുയോജ്യമായ സമയമാണ്.
Also Read: കൊറോണ: ഇക്കാര്യങ്ങള് സംഭവിക്കുന്നു, ചരിത്രത്തില് ആദ്യമായി
മജൂലി ദ്വീപ്, ആസാം
ലോകത്തെ, നദിയില് സ്ഥിതി ചെയ്യുന്ന ഏറ്റവും വലിയ ദ്വീപാണ് ആസാമിലെ മജൂലി ദ്വീപ്. ബ്രഹ്മപുത്ര നദിയിലുള്ള ഈ ദ്വീപ് നിരവധി സഞ്ചാരികളുടെ ഇഷ്ട ഡെസ്റ്റിനേഷനാണ്. എന്നിരുന്നാലും പുറം ലോകവുമായി വലിയ ബന്ധം പുലര്ത്താതെ നിലനില്ക്കുന്നു എന്നതാണ് പ്രത്യേകത. തനതായ ഗോത്ര വര്ഗ സംസ്കാരം ഇവിടെ കണ്ടെത്താനാകും. മഞ്ഞുകാലത്തെ സൂര്യാസ്തമയത്തിന് ഒരു പ്രത്യേക സൗന്ദര്യമായിരിക്കും. കളിമണ് നിര്മ്മിതകളുടെ നാടു കൂടിയാണ്. ദേശാടന കിളികളുടെ ഒരു വലിയ കൂട്ടത്തെ ഇവിടെ കാണാനാകും. യുനെസ്കോയുടെ ലോക പൈതൃക പട്ടികയില് ഇടംപിടിക്കാന് സാധ്യതയുള്ള ഒരു സ്ഥലം കൂടിയാണിത്. ദ്വീപായതിനാല് റോഡ് മാര്ഗം എത്തിച്ചേരാന് സാധിക്കില്ല. ജോര്ഹാത് ആണ് ഏറ്റവും അടുത്ത പട്ടണം. ട്രെയിന് മാര്ഗം വരുന്നവര് ഗുവഹാത്തി റെയില്വേ സ്റ്റേഷനിലിറങ്ങി ജോര്ഹോത്തിലേക്ക് പോവുക. ജോര്ഹാത് വിമാനത്താവളമാണ് ഏറ്റവും അടുത്തുള്ള വിമാനത്താവളം.