രാജ്യതലസ്ഥാനായ ഡല്ഹിയിലെത്താന് വലുതായി ബുദ്ധിമുട്ടേണ്ടി വരില്ല. ഇന്ത്യയുടെ എല്ലാ കോണില് നിന്നും ഡല്ഹിയിലേക്ക് എത്തിപ്പെടാന് എളുപ്പമാണ്. ഫ്ളൈറ്റ്, ട്രെയിന്, റോഡ് വഴി തലസ്ഥാനം എല്ലാ പ്രധാന നഗരങ്ങളുമായി നന്നായി ബന്ധപ്പെട്ടിരിക്കുന്നു. ആശയക്കുഴപ്പങ്ങളേതും കൂടാതെ ഡല്ഹിയില് എത്തിച്ചേരാന് സാധിക്കുന്നു.
കേരളത്തില് നിന്ന് ഡല്ഹിയിലേക്ക്
കേരളമടക്കമുള്ള ദക്ഷിണേന്ത്യന് സംസ്ഥാനങ്ങളില് നിന്നും ഡല്ഹിയിലേക്ക് യാത്ര ചെയ്യാന് എളുപ്പമാണ്. കൂടുതല് പേരും ആശ്രയിക്കുക ട്രെയിനിനെയായിരിക്കും. സമയലാഭത്തിനായി വിമാനമാര്ഗം യാത്ര ചെയ്യുന്നവരും നിരവധിയാണ്. ഡല്ഹിയിലെ ഇന്ദിരാഗാന്ധി അന്താരാഷ്ട്ര വിമാനത്താവളത്തിലേക്ക് പ്രമുഖ നഗരങ്ങളില് നിന്നെല്ലാം ഫ്ളൈറ്റുകള് ലഭ്യമാണ്. ട്രെയിന് എടുക്കാന് ആഗ്രഹിക്കുന്നവര്ക്ക് ന്യൂഡല്ഹി റെയില്വേ സ്റ്റേഷന് (എന്ഡിഎല്എസ്) വരെ ടിക്കറ്റ് ബുക്ക് ചെയ്യാം. ഇതിനുപുറമെ, നഗരത്തില് മറ്റ് മൂന്ന് റെയില്വേ സ്റ്റേഷനുകളുമുണ്ട് - ഹസ്രത്ത് നിസാമുദ്ദീന് റെയില്വേ സ്റ്റേഷന് (എന്ജെഎം), ഓള്ഡ് ഡല്ഹി റെയില്വേ സ്റ്റേഷന് (ഡിഎല്ഐ), ആനന്ദ് വിഹാര് റെയില്വേ ടെര്മിനല്. നല്ലൊരു ബസ് ശൃംഖല വഴി സമീപത്തുള്ള നിരവധി പട്ടണങ്ങളുമായും നഗരങ്ങളുമായും ഡല്ഹി ബന്ധപ്പെട്ടിരിക്കുന്നു.
Also Read: ഒരു നഗരം; ഒരു ഭാഗത്ത് തിരക്ക്, മറു ഭാഗം ശാന്തം
ഡല്ഹിയില് നിന്ന് മണാലിയിലേക്ക്
മണാലിയെന്നു കേള്ക്കുമ്പോള് അങ്ങു ദൂരെ എവിടെയോ സ്ഥിതി ചെയ്യുന്ന ഒരു ഹില്സ്റ്റേഷനാണെന്നും എത്തിപ്പെടാന് ബുദ്ധിമുട്ടാണെന്നും ചിന്തിക്കുന്നവരുണ്ടാകും. എന്നാല് ഡല്ഹിയിലെത്തിയാല് വലിയ ബുദ്ധിമുട്ടുകള് കൂടാതെ പോകാന് പറ്റിയ സ്ഥലമാണ് മണാലി. ആഡംബര ബസിലോ വിമാനത്തിലോ നിങ്ങള്ക്ക് എളുപ്പത്തില് മണാലി പിടിക്കാം.
വിമാന മാര്ഗം
മണാലിയുടെ ഏറ്റവും അടുത്തുള്ള വിമാനത്താവളം ഏകദേശം 50 കിലോമീറ്റര് അകലെയുള്ള ഭൂന്തറിലാണ്. ഭൂന്തറിനെ ചണ്ഡിഗഡും ഡല്ഹിയുമായി ബന്ധിപ്പിക്കുന്ന ആഭ്യന്തര വിമാനങ്ങള് ഇവിടെ നിന്ന് പതിവായി സര്വീസ് നടത്തുന്നു. നിങ്ങള് വിമാനത്താവളത്തില് എത്തിക്കഴിഞ്ഞാല്, നിങ്ങളുടെ സൗകര്യത്തിനനുസരിച്ച് ആഗ്രഹിക്കുന്ന ലക്ഷ്യസ്ഥാനത്തേക്ക് കൊണ്ടുപോകുന്നതിന് പ്രീ-പെയ്ഡ് ടാക്സികള് ഉണ്ടാകും. മണാലിയിലേക്കോ പുറത്തേയ്ക്കോ പോകുന്നതിന് ഫ്ലൈറ്റുകളെ മാത്രം ആശ്രയിക്കരുത്. പൂര്ണമായും ആശ്രയിച്ചാല് ചിലപ്പോള് പണികിട്ടും. കാലാവസ്ഥ പ്രതികൂലമായാല് ഫ്ളൈറ്റ് സര്വീസുകള് താല്ക്കാലികമായി നിര്ത്തിവയ്ക്കാന് സാധ്യതയുണ്ട്. അതിനാല് കാലാവസ്ഥയെക്കുറിച്ച് അറിഞ്ഞിട്ട് വേണം ഫ്ളൈറ്റുകള് ബുക്ക് ചെയ്യാന്.
Also Read: കൊവിഡ് 19: പേമാരിയില് പോലും കുലുങ്ങാത്ത ഡബ്ബാവാലകള്ക്ക് സംഭവിച്ചത്
റോഡ് മാര്ഗം
ഡല്ഹിയില് നിന്ന് മണാലിയിലേക്ക് ബസ് സര്വീസ് ലഭ്യമാണ്. 550 കിലോമീറ്റര് ദൂരമുള്ള യാത്രയാണ്. ലെ, ഷിംല, കുളു, ധര്മ്മശാല, ന്യൂഡല്ഹി തുടങ്ങിയ പ്രശസ്തമായ ടൂറിസ്റ്റ് ഹോട്ട്സ്പോട്ടുകളുമായി മണാലിയെ റോഡ് മാര്ഗം ബന്ധിപ്പിച്ചിട്ടുണ്ട്. എസി വോള്വോ ബസുകളില് ഒരു രാത്രി കൊണ്ട് ഡല്ഹിയില് നിന്ന് മണാലിയില് എത്തിച്ചേരാനാകും.
ട്രെയിന് മാര്ഗം
ട്രെയിനില് യാത്ര ചെയ്യാന് ഉദേശിക്കുന്നെങ്കില് ഒരു കാര്യം മനസ്സിലാക്കുക. നേരിട്ട് മണാലിയുമായി ബന്ധിപ്പിച്ചിട്ടില്ല. പത്താന്കോട്ട്, ചണ്ഡിഗഡ് എന്നീ റെയില്വേ സ്റ്റേഷനുകളെ ആശ്രയിക്കാം. പത്താന്കോട്ട് റെയില്വേ സ്റ്റേഷനില് നിന്ന് 290 കിലോമീറ്ററും ചണ്ഡിഗഡ് സ്റ്റേഷനില് നിന്ന് 315 കിലോമീറ്ററുമാണ് മണാലിയിലേക്കുള്ള ദൂരം. ഡല്ഹിയില് നിന്ന് മണാലിയിലേക്ക് പോവുകയാണെങ്കില് ചണ്ഡിഗഡ് വരെ പോകാം. തുടര്ന്ന് യാത്രയ്ക്കായി ടാക്സിയെ ആശ്രയിക്കാം. ബസ് മാര്ഗവും പോകാനാകും. ട്രെയിനില് യാത്ര ചെയ്യാന് ഉദേശിക്കുന്നവര് മുന്കൂട്ടി ടിക്കറ്റുകള് ബുക്ക് ചെയ്യണം.