ഒടുവില് യാത്രക്കാര്ക്കായി വിമാനത്താവളം തുറന്നു കൊടുക്കാന് മഹാരാഷ്ട്രയും തീരുമാനിച്ചു. രാജ്യത്ത് കൊവിഡ് 19 ഏറ്റവും കൂടുതല് ഭീതി പടര്ത്തുന്ന സംസ്ഥാനമെന്ന നിലയില് മഹാരാഷട്രയില് സര്ക്കാര് കടുത്ത നിയന്ത്രണങ്ങളാണ് ഏര്പ്പെടുത്തിയിരുന്നത്. വിമാന സര്വീസുകള് ഉടന് തുടങ്ങേണ്ടതില്ലെന്ന നിലപാടിലായിരുന്നു. എന്നാല് ഏറ്റവുമൊടുവിലായി മഹാരാഷ്ട്രയില് നിന്ന് വിമാനസര്വീസുകള് തുടങ്ങുമെന്ന വാര്ത്തകളാണ് പുറത്തു വരുന്നത്. മുംബൈയില് നിന്ന് 25 വിമാനങ്ങള് പുറത്തേക്കും തിരിച്ചും സര്വീസ് നടത്താനുള്ള അനുവാദമാണ് സര്ക്കാര് നല്കിയിരിക്കുന്നത്. അതായത് മുംബൈയില് നിന്ന് 25 ഫ്ളൈറ്റുകള് പറന്നുയരും അതുപോലെ തന്നെ 25 ഫ്ളൈറ്റുകള് ഇന്ത്യയിലെ മറ്റ് പ്രധാനപ്പെട്ട സംസ്ഥാനങ്ങളില് നിന്ന് യാത്രക്കാരുമായി മുംബൈയില് ലാന്റ് ചെയ്യുകയും ചെയ്യും. ക്രമേണ സര്വീസുകളുടെ എണ്ണം വര്ദ്ധിപ്പിക്കുമെന്നും അറിയിച്ചിട്ടുണ്ട്.
കൊവിഡ് 19 ഭീതി
മഹാരാഷ്ട്രയില് കൊവിഡ് 19 ബാധിതരുടെ എണ്ണം ക്രമാതീതമായി വര്ദ്ധിച്ചതാണ് ആശങ്കയ്ക്ക് ഇടയാക്കിയത്. മറ്റ് സംസ്ഥാനങ്ങള് ആഭ്യന്തര വിമാന സര്വീസുകള് ആരംഭിക്കുമെന്ന് പ്രഖ്യാപിച്ചപ്പോളും മഹാരാഷ്ട്രയില് ഇതുമായി ബന്ധപ്പെട്ട് ആശങ്ക നിലനിന്നിരുന്നു. ഈ ആശങ്കകള്ക്കൊടുവിലാണ് ആഭ്യന്തര സര്വീസുകള് ആരംഭിക്കുമെന്ന പ്രഖ്യാപനം വന്നിരിക്കുന്നത്. മുംബൈ അന്താരാഷ്ട്ര വിമാനത്താവളം തുറക്കാന് കൂടുതല് സമയം ആവശ്യപ്പെട്ടുകൊണ്ട് മഹാരാഷ്ട്ര മുഖ്യമന്ത്രി ഉദ്ദവ് താക്കറെ കേന്ദ്ര വ്യോമയാന മന്ത്രി ഹര്ദീപ് സിംഗ് പുരിയുമായി ചര്ച്ച നടത്തിയിരുന്നു. കൊവിഡ് 19 ഭീഷണി സൃഷ്ടിക്കുന്ന സാചര്യത്തില് ഇനിയും സമയം വേണ്ടി വരുമെന്നാണ് മുഖ്യമന്ത്രി പറഞ്ഞത്. എന്നാല് ആശങ്കകള്ക്ക് വിരാമമിട്ട് മുംബൈയില് നിന്ന് വിമാനങ്ങള് സര്വീസ് നടത്തുമെന്ന് ഇപ്പോള് റിപ്പോര്ട്ടുകള് വന്നു.
Also Read: ക്രൂരമായ ക്വാറന്റൈന്; ഫോണുമില്ല ഇന്റര്നെറ്റുമില്ല
പ്രത്യേകം സജ്ജീകരണങ്ങള്
സര്വീസുകള് തുടങ്ങുന്നതിന് മുന്നോടിയായി മുംബൈയ് അന്താരാഷ്ട്ര വിമാനത്താവളത്തിലെ സജ്ജീകരണങ്ങളെക്കുറിച്ചുള്ള റിപ്പോര്ട്ട് തരാന് മുഖ്യമന്ത്രി ഉദ്ധവ് താക്കറെ വിമാനത്താവളത്തിലെ അധികൃതരോട് ആവശ്യപ്പെട്ടിട്ടുണ്ട്. മുംബൈ വിമാനത്താവളം റെഡ് സോണിലായതിനാലാണ് നിയന്ത്രണങ്ങള് കൂടുതല് കര്ശനമാക്കുന്നത്. സംസ്ഥാനത്തെ മറ്റ് വിമാനത്താവളങ്ങളായ നാഗ്പൂര്സ പൂനെ എന്നിവയും റെഡ് സോണില് തന്നെയാണ്. യാത്രക്കാരുടെ സുരക്ഷ തന്നെയാണ് ഇവിടങ്ങളില് പ്രധാനമായും ശ്രദ്ധിക്കേണ്ടത്. സംസ്ഥാനത്ത് മുന്ഗണന അനുസരിച്ച് വിമാന സര്വീസുകള് നടത്തണമെന്ന് നിര്ദേശമുണ്ട്. വിദേശ യാത്രക്കാര്, ചികിത്സാ സംബന്ധിയായ സാമഗ്രികളുമായി പോകുന്ന വിമാനങ്ങള്, വിദ്യാര്ത്ഥികള് എന്നിവയ്ക്ക് മുന്ഗണന നല്കും. അനാവശ്യമായ യാത്രകള് ഒഴിവാക്കണമെന്നും അഭ്യര്ത്ഥിച്ചിട്ടുണ്ട്.