'രജിത് കുമാർ - കൃഷ്ണപ്രഭ വിവാഹചിത്രം': വൈറലായ ഈ ചിത്രത്തിന് പിന്നിലെ യാഥാർത്ഥ്യം ഇതാണ്!

സോഷ്യൽ മീഡിയയെ ഞെട്ടിച്ചുകൊണ്ടായിരുന്നു ഇന്ന് ഉച്ചയോടെ ഒരു വിവാഹചിത്രം പ്രത്യക്ഷപ്പെട്ടത്. ബിഗ്ബോസ് താരം രജിത് കുമാറും നടിയും നർത്തകിയുമായ കൃഷ്ണപ്രഭയും വിവാഹിതരായി നിൽക്കുന്ന ചിത്രം ഞൊടിയിടയിലാണ് വൈറലായത്. ബിഗ് ബോസ് സീസണ്‍ 2 ല്‍ എത്തിയതോടെയാണ് ജനശ്രദ്ധ നേടിയ ഡോക്ടര്‍ രജിത് കുമാറിൻ്റെ വിവാഹം കഴിഞ്ഞോ എന്ന മട്ടിൽ സോഷ്യൽ മീഡിയകളിൽ ചർച്ചകൾ പുരോഗമിക്കുകയായിരുന്നു. ചിത്രം കൈയ്യിൽ കിട്ടിയവരെല്ലാം അതപ്പപ്പോൾ തന്നെ സംഗതി സത്യമെന്ന് കരുതി വാട്ട്സാപ്പിലൂടെ ഉടൻ തന്നെ ഫോർവേഡ് ചെയ്തു.

Also Read: 'മാനസ മൈന'യിലൂടെ മലയാളികളുടെ ഹൃദയം കീഴടക്കിയ സലിൽ ദായുടെ ഓർമ്മകൾക്ക് 25 വയസ്സ്

എന്നാ പിന്നാലെയാണ് സംഗതിയുടെ യാഥാർത്ഥ്യം പുറംലോകം അറിയുന്നത്. ഈ വിവാഹ ചിത്രം യാഥാർത്ഥ്യമല്ല. ഒരു ഷൂട്ടിനായാണ് ഇരുവരും വിവാഹ ഗെറ്റപ്പിൽ പ്രത്യക്ഷപ്പെട്ടത്. സ്വകാര്യചാനലിൻ്റെ സറ്റയർ പരിപാടിയ്ക്കായി നടന്ന ഷൂട്ടിലാണ് ഈ ചിത്രം പകർത്തിയത്. ഇരുവരും വരണമാല്യം ചാർത്തി നിൽക്കുന്നതും പരസ്പരം മധുരം പങ്കുവെക്കുന്നതുമായ ചിത്രങ്ങളാണ് സോഷ്യൽ മീഡിയയിൽ വൈറലായത്. കൃഷ്ണപ്രഭയും രജിത് കുമാറും തുളസിമാലയണിഞ്ഞ് വധൂവരന്‍മാരെ പോലെ നില്‍ക്കുന്ന ചിത്രമായിരുന്നു ആദ്യം പുറത്തെത്തിയത്. മധുരം കൈമാറുന്നതിന്റേയും ചിത്രം പിന്നാലെയെത്തുകയായിരുന്നു. ഇതോടെയാണ് സംഗതി സത്യമെന്ന് കരുതി പലരും ഫോർവേഡ് ചെയ്തത്.

Also Read: സിനിമയിൽ ഇടം കിട്ടാതിരുന്ന പാട്ടുകൾ ഇവിടെ കേൾക്കാം; യൂട്യൂബ് ചാനലുമായി 'ജാതിക്കാതോട്ട'ത്തിന്‍റെ ഈണക്കാരൻ

രജിത് കുമാറിന് വലിയ ആരാധകരാണുള്ളത്. ആരുമറിയാതെ തങ്ങളുടെ പ്രിയതാരം വിവാഹിതനായോ എന്ന സംശയം ആരാധകർക്കുമുണ്ടായി. രജിത് കുമാർ ഫാന്‍സ് ഗ്രൂപ്പുകളിലും ഈ ചിത്രം വലിയ ചർച്ചയായി മാറിയിരുന്നു. ഒടുവിലാണ് സംഗതിയുടെ സത്യാവസ്ഥ പുറത്ത് വന്നത്. ഏഷ്യാനെറ്റിലെ പുതിയ സറ്റയർ പരിപാടിയുടെ ചിത്രീകരണത്തിനിടയിലെ രംഗമാണ് ഇത്. ബിഗ്ബോസിന് ശേഷം യൂട്യൂബിലൂടെ വിശേഷങ്ങൾ പങ്കുവെക്കാറുള്ള രജിത്ത് കുമാർ തനിക്ക് സിനിമകളിലേക്ക് അവസരങ്ങൾ ലഭിച്ചു തുടങ്ങിയതായി മുൻപ് സൂചന നൽകിയിരുന്നു.


ഏഷ്യാനെറ്റിൻ്റെ ഹാസ്യ പരമ്പരയിൽ രജിത് കുമാർ പ്രധാന വേഷം അവതരിപ്പിക്കുന്നുണ്ടെന്നും പരിപാടിയുടെ പ്രൊമോ വീഡിയോ ഉടൻ പുറത്ത് വിടുമെന്നും ഏഷ്യാനെറ്റ് ന്യൂസ് സ്ഥിരീകരിച്ചിട്ടുണ്ട്. പരിപാടിയുടെ സംപ്രേഷണ സമയം തീരുമാനിച്ചിട്ടില്ലെന്നും റിപ്പോർട്ടിലുണ്ട്. കൃഷ്ണപ്രഭയാണ് പരമ്പരയിൽ മറ്റൊരു പ്രധാന കഥാപാത്രത്തെ അവതരിപ്പിക്കുന്നതെന്നും റിപ്പോർട്ടിൽ പറയുന്നു.