ചെറ്റക്കുടിലിൽ നിന്നും തുടങ്ങി; പഠനത്തിൽ മിടുക്കൻ; അവഗണനകൾ താണ്ടിയെത്തിയ അഖിൽ മാരാർ: ബിഗ് ബോസ് വീട്ടിൽ 22 ആം ദിനം പോരാട്ടവും!

നോമിനേഷൻ ഫ്രീ കാർഡിനുവേണ്ടിയുള്ള മത്സരത്തിൽ മത്സരബുദ്ധിയോടെയാണ് ഓരോ ഗെയിമറും നിൽക്കുന്നത്. ആദ്യം തന്നെ ഒറ്റകെട്ടായി ശോഭയെ മത്സരത്തിൽ നിന്നും പുറത്താക്കുന്നു. ശോഭ സേഫ് ഗെയിം ആണ് കാഴ്ചവയ്ക്കുന്നത് എന്നാണ് ഗോപിക ആരോപിച്ചത്. പതിനാറുപേരും ഒറ്റകെട്ടായി എടുത്ത തീരുമാനത്തിൽ ശോഭ മത്സരത്തിൽ നിന്നും പുറത്താവുകയും ചെയ്തു. എന്നാൽ ഇവരുടെ കൈയ്യിൽ നിലവിൽ ഒരു നോമിനേഷൻ ഫ്രീ കാർഡ് ഉണ്ടെന്നതാണ് അവർക്ക് ആശ്വാസം നൽകുന്നത്.

സ്‌മോക്കിങ് ഏരിയയിൽ ഗോപികയേകുറിച്ച് ചർച്ച നടത്തുന്ന ഷിജുവും അഖിലും ഇതേ ടാസ്കിനെക്കുറിച്ചുള്ള ചർച്ചയാണ് നടത്തുന്നത്. തനിക്ക് കപ്പ് അടിക്കണം എന്ന ആഗ്രഹം ഒന്നുമില്ല പക്ഷെ തനിക്ക് നൂറു ദിവസം വീട്ടിൽ നിൽക്കണം, അതിനായി ഗെയിം കളിക്കും എന്നാണ് മനീഷയുടെ തുറന്നു പറച്ചിൽ.
പിന്നീട് സ്‌പോൺസേർഡ് ടാസ്ക്കിൽ പങ്കെടുത്ത കുടുംബത്തിനു കൈ നിറയെ സമ്മാനങ്ങളും ലഭിക്കുന്നുണ്ട്.

എന്റെ കഥ സെഗ്മെന്റിൽ കഥ പറയാൻ എത്തുന്നത് അഖിൽ മാരാർ ആയിരുന്നു. 3 ഘട്ടം ആയിട്ടാണ് തന്റെ ജീവിതം എന്ന് പറഞ്ഞുകൊണ്ടാണ് അഖിൽ കഥ പറഞ്ഞുതുടങ്ങിയത്. അഖിൽ രാജ്, അഖിൽ കോട്ടാത്തല, അഖിൽ മാരാർ എന്നിങ്ങനെയുള്ള ജീവിതകഥയാണ് മാരാർ തുറന്നുപറയുന്നത്. കണ്ണുനീരിന്റെ ഉപ്പുരസം കലർന്ന ജീവിത കഥ ആയിരുന്നു എങ്കിലും പൊട്ടിച്ചിരികളോടെയാണ് അഖിലിന്റെ ജീവിതത്തെ മത്സരാർത്ഥികൾ ഏറ്റെടുത്തത്. ഒരു സന്ദര്ഭത്തെയും ഹാസ്യത്തിൽ കലർത്തിയാണ് അഖിൽ അവതരിപ്പിച്ചത്.

പഠനത്തിൽ മിടുക്കനായ അഖിലിന്റെ കുട്ടിക്കാലം ഒരു ചെറ്റകുടിലിൽ നിന്നും തുടങ്ങിയതാണ്. ട്യൂഷൻ പഠിപ്പിച്ചും മറ്റുമാണ് പഠിക്കാനുള്ള ചിലവ് താൻ കണ്ടെത്തിയത് എന്നും അഖിൽ പറയുന്നുണ്ട്. കോളേജ് കാലഘട്ടത്തിൽ തനിക്ക് ഉണ്ടായ പ്രണയത്തെക്കുറിച്ചും, പരാജയത്തെക്കുറിച്ചും തുറന്നു പറഞ്ഞ അഖിലിന്റെ വിവാഹം നടന്ന കഥയെകുറിച്ചാണ് പിന്നീട് താരം സംസാരിച്ചത്. ലക്ഷങ്ങൾ ശമ്പളമുള്ള ജോലി ഉപേക്ഷിച്ചു സിനിമയിലേക്ക് ഇറങ്ങിത്തിരിച്ച കഥയും രസകരമായി അഖിൽ അവതരിപ്പിച്ചു.

തന്റെ ജീവിതത്തിൽ സംഭവിച്ചിട്ടുള്ളതെല്ലാം മനസ്സിന്റെ ശുദ്ധികൊണ്ടാണ് എന്ന് പറയുകയാണ് അഖിൽ. ആരെയും താൻ ചതിച്ചിട്ടില്ല. ഒരാളെയും പറ്റിക്കാൻ ആഗ്രഹിച്ചിട്ടില്ല എന്ന് പറഞ്ഞ അഖിൽ തന്റെ ജീവിതത്തിലെ ഏറ്റവും വലിയ സമ്പാദ്യങ്ങൾ മക്കളായ പ്രകൃതിയും, പ്രാർത്ഥനയും ആണ് എന്നും പറയുന്നു. പിന്നെ എന്തിനും കൂടെ നിന്ന തന്റെ ഭാര്യ ലക്ഷ്മിയും അടങ്ങുന്നതാണ് കുടുംബം എന്നും തുറന്നുപറയുന്നതോടെ 22 ആം ദിനം അവസാനിക്കുന്നു.