ഭര്‍ത്താവിനെ ദൈവത്തെപ്പോലെ പൂജിക്കുന്ന പെണ്ണാണ് ഞാന്‍ ; വീണ കുലസ്ത്രീയെന്ന് ജസ്ല!

ബിഗ് ബോസ് വീട്ടിലെ തീവ്ര വിശ്വാസികളില്‍ ഒരാളായ വീണയും അവിശ്വാസിയായ ജസ്ലയും തമ്മിലുള്ള ഏറ്റുമുട്ടില്‍ സംഘര്‍ഷഭരിതമായ മുഹൂര്‍ത്തങ്ങളാണ് സൃഷ്ടിച്ചത്. വിശ്വാസത്തെക്കുറിച്ച് പറഞ്ഞുതുടങ്ങിയെങ്കിലും അവിശ്വാസിയായ ജസ്ലയുടെ വാക്കുകളെ ഉള്‍ക്കൊള്ളാന്‍ വീണ തയ്യാറായിരുന്നില്ല. വിശ്വാസത്തെക്കുറിച്ച് വാ തോരാതെ സംസാരിക്കാനായിരുന്നു വീണയുടെ ലക്ഷ്യം. പക്ഷെ തന്റെ അവകാശങ്ങളെക്കുറിച്ച് എണ്ണി പറഞ്ഞ ജസ്ലയ്ക്ക് മുന്നില്‍ പിടിച്ചുനില്‍ക്കാന്‍ വീണ കുറച്ചധികം വിയര്‍ത്തു.

താലിയും സിന്തൂരവും തന്റെ വിശ്വാസമാണെന്നും ഭര്‍ത്താവിനെ ദൈവത്തെ പോലെ പൂജിക്കുന്ന ഒരു പെണ്ണാണ് താനെന്നുമൊക്കെയുള്ള വീണയുടെ വാക്കുകളെ കേള്‍ക്കുന്ന ജസ്ല ഇതല്ലാത്ത ഒരു വിഭാഗമുണ്ടാകില്ലേ എന്ന ന്യായമായ ചോദ്യമാണ് ഉന്നയിച്ചത്. എന്നാല്‍ അത് വെറും ന്യൂനപക്ഷമാണെന്നും ഭൂരിപക്ഷത്തിന്റെ അഭിപ്രായങ്ങള്‍ക്കാണ് വില കല്‍പ്പിക്കേണ്ടത് എന്നുമായിരുന്നു വീണയുടെ വാക്കുകള്‍. ന്യൂനപക്ഷം, ഭൂരിപക്ഷം തുടങ്ങിയ പദപ്രയോഗങ്ങള്‍ തെറ്റാണെന്നും ഒരു ഇന്ത്യന്‍ പൗരനെന്ന നിലയില്‍ ഭരണഘടന ഉറപ്പുനല്‍കിയിട്ടുള്ള അവകാശം എല്ലാവര്‍ക്കും ഒരുപോലെ അര്‍ഹതപ്പെട്ടതാണെന്നും ജസ്ല പറയുന്നു.

READ ALSO: ബ്ളാക്ക് ആൻഡ് വൈറ്റ് പ്രണയത്തിൽ റോവ്; അതിനൊരു കാരണം ഉണ്ടാകില്ലേ;

ജസ്ലയുടെ വാക്കുകളെ കേള്‍ക്കാന്‍ പോലും കൂട്ടാക്കാതെ ഭരണഘടനയെ പാടെ തള്ളിപ്പറയുകയായിരുന്നു വീണ. ഭരണഘടന പഠിച്ചിട്ടല്ല താന്‍ ഇവിടെവരെ എത്തിയതെന്നും തനിക്ക് ഭരണഘടനയെക്കാള്‍ വലുത് ദൈവം ആണെന്നുമൊക്കെ വീണ പറഞ്ഞു. വീണയുടെ പ്രതികരണത്തെ കുലസ്ത്രീ എന്ന ഒറ്റ വാക്കിലേക്ക് ചുരുക്കുകയായിരുന്നു ജസ്ല.

ജസ്ലയുടെ സമത്വവാദങ്ങളെ ഇല്ലാതാക്കാം എന്ന ആഗ്രഹവുമായി ഇറങ്ങി പുറപ്പെട്ട വീണ ഒടുക്കം സ്വയം തോല്‍വി സമ്മതിക്കുകയായിരുന്നു. ഞാന്‍ വിശ്വസിക്കുന്ന എന്റെ ദൈവത്തിനുപോലും ഇവരെ മാറ്റാന്‍ കഴിയില്ലെന്ന വീണയുടെ ഡയലോഗ് യഥാര്‍ത്ഥത്തില്‍ ജസ്ലയുടെ വിജയമായിരുന്നു.