ഉപ്പും മുളകിനും എന്തു പറ്റി? ബാലുവും നീലുവും പിള്ളേരും പിന്മാറിയോ; നിരവധി സംശയങ്ങളുയി സോഷ്യൽ മീഡിയ!

ബാലുവും നീലുവും പിള്ളേരും ഇല്ലാതെ ദിവസങ്ങളായി ഉപ്പും മുളകും സംപ്രേക്ഷണം ചെയ്യുന്നതിനെതിരെ പ്രേക്ഷകർ. ബാലുവും കുടുംബവും ഇല്ലാതെ എന്ത് പാറമട വീട്, എന്ത് ഉപ്പും മുളകും എന്നാണ് പ്രേക്ഷകരുന്നയിക്കുന്ന പ്രധാന ചോദ്യം. പരമ്പര ആയിരം എപ്പിസോഡുകൾ പിന്നിട്ടപ്പോൾ തന്നെ കഥാഗതിയിൽ വലിയ രീതിയിലുള്ള മാറ്റമുണ്ടായിരുന്നു. അതിൽ പ്രധാനമായും നടന്നത് കേന്ദ്ര കഥാപാത്രങ്ങളിൽ ഒരാളായിരുന്ന ലച്ചു(ജൂഹി)വിൻ്റെ പിന്മാറ്റം ആയിരുന്നു. നിരവധി ഊഹാപോഹങ്ങൾക്ക് ഇടനൽകിയ ശേഷം ഏറെ കൊട്ടിഘോഷിച്ചു കൊണ്ടാടിയ ലച്ചുവിന്റെ വിവാഹം സീരിയൽ ചരിത്രത്തിൻ്റെ തന്നെ ഭാഗമായി മാറിക്കഴിഞ്ഞ ഒരധ്യായമാണ്.

ലച്ചുവിന്റെ വിവാഹവുമായി ബന്ധപെട്ടു തന്നെ സോഷ്യൽ മീഡിയയിൽ നിരവധി ഗോസിപ്പുകളും പ്രചരിച്ചിരുന്നു. വിവാഹത്തോടെ താരം പരമ്പരയിൽ നിന്നും പിന്മാറുകയാണെന്നും പ്രേക്ഷകർ നേരത്തേ തന്നെ വിധി എഴുതിയിരുന്നു. എന്നാൽ അന്ന് സോഷ്യൽ മീഡിയയ്ക്ക് എതിരെ താരം രംഗത്ത് വന്നിരുന്നെങ്കിലും അധികം വൈകാതെ തന്നെ ജൂഹി പരമ്പരയിൽ നിന്നും പിന്മാറി. പഠിക്കാനും യാത്ര ചെയ്യാനും സമയം കണ്ടെത്താനായാണ് തൻ്റെ പിന്മാറ്റം എന്ന് വ്യക്തമാക്കി ജൂഹി പിന്നീട് രംഗത്തെത്തിയിരുന്നു. ഇതൊക്കെ പ്രേക്ഷകര്‍ ആകാംക്ഷയോടെ ഏറ്റെടുത്ത സംഭവങ്ങളാണ്.

ലച്ചുവിന്റെ പിന്മാറ്റത്തിന് ശേഷം കഥ സന്ദർഭങ്ങൾ മാറ്റി മാറ്റിമറിച്ചുകൊണ്ട് ഇപ്പോൾ അണിയറ പ്രവര്‍ത്തകര്‍ ഉപ്പും മുളകും പരമ്പര 1050 ാം എപ്പിസോഡിൽ എത്തിച്ചിരിക്കുകയാണ്. എന്നാൽ കഥ മുൻപോട്ട് പോകുമ്പോൾ തങ്ങളുടെ പ്രിയപ്പെട്ട താരങ്ങൾ എവിടെ എന്ന ചോദ്യമാണ് പ്രേക്ഷകർ ഇപ്പോൾ ഉന്നയിക്കുന്ന പ്രധാനകാര്യം. ലച്ചുവിന് പിന്നാലെ ഞങ്ങളുടെ ബാലുവും നീലുവും പിള്ളേരും പിന്മാറിയതാണോ എന്ന സംശയമാണ് ഇപ്പോൾ ആരാധകർക്കുള്ളത്.

ALSO READ: എന്നെ സംബന്ധിച്ചിടത്തോളം അദ്ദേഹം ഇപ്പോൾ തന്നെ വിജയിച്ചു; രജിത്തിന്‌ പിന്തുണയുമായി പേളിയും!

പരമ്പരയുടേതായി പുറത്ത് വിടുന്ന ഓരോ പ്രമോ വീഡിയോയുടെയും എപ്പിസോഡുകളുടെയും ചുവടെ കമൻ്റുകളായി അവർ തങ്ങളുടെ ആശങ്ക പങ്ക് വയ്ക്കുന്നുമുണ്ട്. എന്നാൽ ഇപ്പോൾ ഉപ്പും മുളകിലെ വിഷ്ണു എന്ന മുടിയന്റെ കഥാപാത്രമായി എത്തുന്ന റിഷിയുടെ തന്നെ യൂ ട്യൂബ് ചാനലിലൂടെ പ്രിയ താരങ്ങളായ മുടിയനും ശിവാനിയും പ്രേക്ഷകർക്കിടയിലേക്ക് എത്തുന്നത് സംശയത്തിൻ്റെ ആക്കം കൂട്ടുന്നതായി അനുമാനിക്കപ്പെടുകയാണ് ഇപ്പോൾ.

ഇങ്ങനെ പോകാൻ ആണ് ഉദ്ദേശ്യം എങ്കിൽ ഞങ്ങൾ പരമ്പര കാണുന്നത് നിർത്തും എന്നും, ആയിരം എപ്പിസോഡുകൾ ആയപ്പോൾ തന്നെ നിങ്ങൾക്ക് പരമ്പര നിർത്തിക്കൂടായിരുന്നോ എന്നും ആരാധകർ ചോദിക്കുന്നുണ്ട്. അതേസമയം എന്തുകൊണ്ട് തങ്ങൾ എപ്പിസോഡുകളിൽ എത്തുന്നില്ല എന്ന കാര്യത്തിൽ പരമ്പരയിലെ മുഖ്യതാരങ്ങളാരും തന്നെ പ്രതികരിച്ചിട്ടില്ല.