വിവാഹം ഉടന്‍
നടന്‍ ആദിയുമായുള്ള നിക്കി ഗല്‍റാണിയുടെ വിവാഹം ഉടന്‍ ഉണ്ടാകും എന്നാണ് കേള്‍ക്കുന്നത്. ആദ്യം അടുത്ത ബന്ധുക്കളുടെ സാന്നിധ്യത്തില്‍ സ്വകാര്യമായി നിശ്ചയം നടത്താനാണത്രെ തീരുമാനിച്ചിരിയ്ക്കുന്നത്. പിന്നീട് ആര്‍ഭാടമായി ബന്ധുക്കളെയും സുഹൃത്തുക്കളെയും എല്ലാം ക്ഷണിച്ച് വിവാഹ ചടങ്ങുകളും നടത്തും.
ആദിയും നിക്കിയും
2015 ല്‍ പുറത്തിറങ്ങിയ യാഗവറിയനും നാന്‍ കാക്ക എന്ന ചിത്രത്തിലാണ് ഇരുവരും ഒന്നിച്ച് അഭിനയിച്ചത്. അപ്പോള്‍ മുതല്‍ ഇരുവരും നല്ല സുഹൃത്തുക്കളായിരുന്നു. പിന്നീട് മരഗദ നാണയം എന്ന ചിത്രത്തിന് വേണ്ടിയും ഒന്നിച്ചു. അതിനിടയില്‍ ഇരുവരും പ്രണയത്തിലായി എന്നാണ് ഗോസിപ്പുകള്‍ പറയുന്നത്.
പ്രണയ ഗോസിപ്പ് ശക്തിപ്പെട്ടത്
2020 ല്‍ ആദിയുടെ അച്ഛന്റെ പിറന്നാള്‍ ആഘോഷത്തില്‍ നിക്കി ഗല്‍റാണിയുടെ സാന്നിധ്യം ശ്രദ്ധേയമായിരുന്നു. മറ്റ് സിനിമാ പ്രവര്‍ത്തകരൊന്നും ഇല്ലാതെ നിക്കി മാത്രം ആദിയുടെ കുടുംബത്തിനൊപ്പം ചേര്‍ന്ന് നില്‍ക്കുന്ന ഫോട്ടോകളും വൈറലായി. തുടര്‍ന്ന് ഹൈദരബാദ് എയര്‍പോര്‍ട്ടില്‍ വച്ചും നിക്കിയെയും ആദിയെയും ഒരുമിച്ച് കണ്ട പാപ്പരാസികള്‍ ആ പ്രണയ വാര്‍ത്ത ശരിവച്ചു.
നിഷേധിക്കാതെ രണ്ട് പേരും
പ്രണയ ഗോസിപ്പുകള്‍ ശക്തിമായി പ്രചരിയ്ക്കുമ്പോഴും നിക്കിയോ ആദിയോ വിഷയത്തോട് പ്രതികരിക്കാന്‍ തയ്യാറായില്ല. ഇരുവരുടെയും മൗനവും പാപ്പരാസികളെ സംബന്ധിച്ച് ആ പ്രണയ ഗോസിപ്പ് അടിച്ചുറപ്പിക്കാനുള്ള കാരണമായിരുന്നു. എന്തായാലും ഇപ്പോള്‍ വിവാഹം വരെ വന്നു നില്‍ക്കുന്നു ഗോസിപ്പുകള്‍.
മലയാളത്തിലൂടെ തുടക്കം
മലയാളി അല്ലെങ്കിലും, സ്വന്തം വീട്ടിലെ കുട്ടിയായി മലയാളികള്‍ സ്വീകരിച്ച നടിയാണ് നിക്കി ഗല്‍റാണി. 1983 എന്ന നിവിന്‍ പോളി ചിത്രത്തിലൂടെയാണ് തുടക്കം. തുടര്‍ന്ന് വെള്ളിമൂങ്ങ, ഇവന്‍ മര്യാദരാമന്‍, ഒരു സെക്കന്റ്ക്ലാസ് യാത്ര, രാജമ്മ അറ്റ് യാഹു തുടങ്ങിയ സിനിമകളില്‍ അഭിനയിച്ചു. കന്നട, തെലുങ്ക്, തമിഴ് സിനിമകളിലും സജീവമാണ് നിക്കി.