അച്ഛന്‍ പോയിട്ട് 25 വര്‍ഷം, പ്രയാസമുള്ള തീരുമാനം എടുക്കുമ്പോള്‍ ഇപ്പോഴും അച്ഛന്റെ വാക്കുകളാണ് തന്നെ നയിക്കുന്നത് എന്ന് മിഥുന്‍

മിഥുന്‍ രമേശ് എന്നാല്‍ ടെലിവിഷന്‍ പ്രേമികള്‍ക്ക് വളരെ അധികം പ്രിയങ്കരനാണ്. കോമഡി ഉത്സവം എന്ന ഷോയുടെ വിജയം തന്നെ മിഥുന്റെ അവതരണം കൊണ്ടാണ് എന്ന് പറഞ്ഞാലും കൂടിപോകില്ല. സോഷ്യല്‍ മീഡിയയിലും വളരെ അധികം സജീവമാണ് മിഥുന്‍. രസകരമായ പോസ്റ്റുകള്‍ നിരന്തരം ഇന്‍സ്റ്റഗ്രാമില്‍ പങ്കുവയ്ക്കാറുണ്ട്. എന്നാല്‍ ഏറ്റവും ഒടുവില്‍ മിഥുന്‍ പങ്കുവച്ചിരിയ്ക്കുന്നത് അല്പം ഇമോഷണലായ പോസ്റ്റ് ആണ്.

അച്ഛന്റെ ഇരുപത്തിയഞ്ചാം ചരമ വാര്‍ഷികത്തെ കുറിച്ചാണ് പോസ്റ്റ്. 'അച്ഛന്‍ നമ്മളെ വിട്ട് പോയിട്ട് 25 വര്‍ഷങ്ങള്‍. ഞാന്‍ ഏതൊരു പ്രയാസമായ തീരുമാനം എടുക്കുമ്പോഴും അച്ഛന്റെ വാക്കുകള്‍ എന്നെ സ്വാധീനിക്കാറുണ്ട്. ഇപ്പോള്‍ എനിക്ക് എവിടെയെങ്കിലും, ആര്‍ക്കെങ്കിലും പോസിറ്റീവിറ്റ് പകര്‍ന്ന് നല്‍കാന്‍ കഴിയുന്നുണ്ട് എങ്കില്‍ അത് എനിക്ക് അച്ഛന്‍ പഠിപ്പിച്ചു തന്നതാണ്. ഒരുപാട് മിസ്സ് ചെയ്യുന്നു അച്ഛാ' എന്ന് പറഞ്ഞുകൊണ്ടാണ് മിഥുന്റെ പോസ്റ്റ്.

സഹോദരങ്ങളായ നിഥിന്‍ രമേശിനെയും ഷീല രമേശിനെയും ടാഗ് ചെയ്തുകൊണ്ടാണ് മിഥുന്റെ പോസ്റ്റ്. അച്ഛന്‍ പൊലീസ് യൂനിഫോമില്‍ നില്‍ക്കുന്ന ഒരു സ്‌റ്റൈലന്‍ ചിത്രവും പോസ്റ്റിനൊപ്പം പങ്കുവച്ചിട്ടുണ്ട്. ടൊവിനോ തോമസ്, ദീപ്തി വിധുപ്രതാപ്, ജിസ് ജോയ്, സാജിദ് യാഹിയ, റാണി സരണ്‍ തുടങ്ങി നിരവധി സെലിബ്രിറ്റികള്‍ പോസ്റ്റിന് താഴെ ലൈക്കുകളും കമന്റുകളുമായി എത്തിയിട്ടുണ്ട്.


ലൈഫ് ഈസ് ബ്യൂട്ടിഫുള്‍ എന്ന ഫാസില്‍ സിനിമയിലൂടെയാണ് മിഥുന്‍ കരിയര്‍ ആരംഭിയ്ക്കുന്നത്. നായകനായും സഹനായകനായും വില്ലനായും മുപ്പതോളം സിനിമകളില്‍ അഭിനയിച്ചു. സിനിമയില്‍ ഡബ്ബിങ് ആര്‍ട്ടിസ്റ്റായും പ്രവൃത്തിച്ച മിഥുന്‍ ടെലിവിഷന്‍ ഷോകളിലും പരമ്പരകളിലും സജീവമായിരുന്നു. ആറോളം മെഗാ പരമ്പരകളില്‍ അഭിനയിച്ചിട്ടുണ്ട്, അതിലധികം ടിവി ഷോകള്‍ ഹോസ്റ്റ് ചെയ്യുകയും ചെയ്തു. റേഡിയോ ജോക്കി എന്ന നിലയിലും മിഥുന്‍ അംഗീകാരം നേടിയിട്ടുണ്ട്.