കോവിലിൽ പുലർവേളയിൽ!!! സെറ്റും മുണ്ടും അണിയാൻ ഇഷ്ടം; ചിത്രങ്ങളുമായി ഗൗരി കൃഷ്ണൻ

പൗർണമി തിങ്കൾ എന്ന പരമ്പരയിലൂടെ മലയാളികളുടെ പ്രിയങ്കരിയായ താരമാണ് ഗൗരി കൃഷ്ണൻ. അടുത്തിടെ പൗർണമി തിങ്കളിന്റെ സംവിധായകൻ മനോജ്‌ പേയാടുമായുള്ള താരത്തിന്റെ വിവാഹ നിശ്ചയം കഴിഞ്ഞിരുന്നു. അഭിനയത്തിനും നൃത്തത്തിനും പുറമേ ഒരു യൂട്യൂബ് വ്ലോഗർ കൂടിയാണ് താരം.

എന്നും തനിക്ക് സാരികൾ ഇഷ്ടമാണെന്ന് ഗൗരി തന്റെ ഇൻസ്റ്റഗ്രാമിൽ തന്നെ പറഞ്ഞിട്ടുണ്ട്. മാത്രമല്ല പലപ്പോഴായി ഈ ഇഷ്ടം വ്യക്തമാക്കുന്ന ചിത്രങ്ങളും താരം പങ്കുവയ്ക്കാറുണ്ട്. താരത്തിന്റെ വിവാഹനിശ്ചയ ചിത്രങ്ങളും ശ്രദ്ധിക്കപ്പെട്ടിരുന്നു. മഞ്ഞ നിറത്തിലെ പട്ടുസാരി ധരിച്ചുള്ള ഗൗരിയുടെ ചിത്രങ്ങൾക്ക് ആരാധകർ മികച്ച അഭിപ്രായമാണ് പറഞ്ഞത്.

സെറ്റും മുണ്ടും അണിയാൻ ഇഷ്ടം എന്നാണ് ചിത്രങ്ങൾ പങ്കുവച്ച് ഗൗരി കുറിച്ചിരിക്കുന്നത്. മയിൽപ്പീലി ബോട്ടീക് ആണ് ഗൗരിയുടെ വസ്ത്രങ്ങൾക്ക് പിന്നിൽ. കറുത്ത നിറത്തിലെ ബ്ലൗസാണ് താരം സെറ്റിനൊപ്പം ധരിച്ചിരിക്കുന്നത്. മേക്കപ്പ് ഒന്നുമില്ലാതെ സിംപിളായാണ് ഗൗരി ഫോട്ടോയ്ക്ക് പോസ് ചെയ്തിരിക്കുന്നത്. ക്ഷേത്രത്തിൽ നിന്നുള്ള ചിത്രങ്ങളാണ് താരം പങ്കുവച്ചിരിക്കുന്നത്. ഇതിന് മുൻപും താരം സാരി ചിത്രങ്ങൾ പങ്കുവച്ചിട്ടുണ്ട്.

മഴവിൽ മനോരമയിൽ സംപ്രേഷണം ചെയ്തിരുന്ന അനിയത്തി എന്ന പരമ്പരയിലൂടെയാണ് ഗൗരി അഭിനയരംഗത്തേക്ക് എത്തുന്നത്. പിന്നീട് കാണാ കൺമണി, മാമാങ്കം, സീത, എന്ന് സ്വന്തം ജാനി, അയ്യപ്പ ശരണം തുടങ്ങി ഒട്ടേറെ സീരിയലുകളിൽ അഭിനയിച്ചു. പൗർണമി തിങ്കളിലൂടെയാണ് ഗൗരി കൂടുതൽ ശ്രദ്ധിക്കപ്പെടുന്നത്.

വിഷ്ണു നായരാണ് പൗർണമി തിങ്കളിൽ ഗൗരിയുടെ നായകനായെത്തിയത്. ഇരുവരുടെയും അഭിനയ രംഗങ്ങൾ ഇരുകൈയ്യും നീട്ടിയാണ് പ്രേക്ഷകർ സ്വീകരിച്ചത്. പ്രേമി എന്നായിരുന്നു ഇരുവരുടേയും ഫാൻസ് പേജുകളിൽ നിറഞ്ഞു നിന്നിരുന്ന പേര്. വിഷ്ണുവിനെയാണോ താരം വിവാഹം കഴിക്കുന്നത് എന്ന തരത്തിലുള്ള വാർത്തകളും പ്രചരിച്ചിരുന്നു. എന്നാൽ മനോജുമായുള്ള താരത്തിന്റെ വിവാഹനിശ്ചയ വാർത്തയെത്തിയതോടെ ഇത്തരം പ്രചാരണങ്ങളും അവസാനിക്കുകയായിരുന്നു.