കല്യാണത്തിന് മുന്‍പൊരു ആഘോഷം കൂടി! കുടുംബസമേതം വീഡിയോയുമായി മാളവിക കൃഷ്ണദാസ്‌

ധനുമാസത്തിലെ തിരുവാതിരയെക്കുറിച്ച് പറഞ്ഞുള്ള വീഡിയോയുമായെത്തിയിരിക്കുകയാണ് മാളവിക കൃഷ്ണദാസ്. ഞങ്ങളുടെ വീട്ടില്‍ എല്ലാ വര്‍ഷവും ഇതാഘോഷിക്കാറുണ്ട്. പരമശിവന്റെ പിറന്നാളായാണ് ധനുമാസത്തിലെ തിരുവാതിരയെ വിശേഷിപ്പിക്കുന്നത്. അതേപോലെ ശ്രീപാര്‍വതിയുടേയും പരമശിവന്റെയും വിവാഹം നടന്ന നാളാണെന്നും ഐതിഹ്യമുണ്ട്. ശ്രീ പാര്‍വതി വ്രതമെല്ലാം നോറ്റ് വനത്തിലൂടെ ആടിയും പാടിയും വെറ്റില നുറുക്കിയും നദിയില്‍ നീന്തിത്തുടിച്ചും,തിരുവാതിര കളിച്ചും, ഫലങ്ങള്‍ കഴിച്ചും സന്തോഷമാക്കിയെന്നും പറയുന്നുണ്ട്. ഭര്‍ത്താവിന്റെ ആയുസിനും ആരോഗ്യത്തിനുമൊക്കെ വേണ്ടി സ്ത്രീകള്‍ തിരുവാതിര നോയമ്പ് നോക്കാറുണ്ട്. കല്യാണം കഴിയാത്തവര്‍ നല്ല വരനെ കിട്ടാനും, കല്യാണം നടക്കാനുമൊക്കെയായി വ്രതം എടുക്കുന്നു. ഞങ്ങളുടെ തറവാട്ടില്‍ പുരുഷന്‍മാരും ഈ ആഘോഷത്തില്‍ പങ്കെടുക്കാറുണ്ട്. തറവാട്ടില്‍ എല്ലാവരുമായി ഇത് വലിയ ആഘോഷമായിരുന്നു നേരത്തെ. ഇപ്പോള്‍ ഞങ്ങള്‍ കുറച്ച് പേരെയുള്ളൂ. ഞങ്ങളെല്ലാം കൂടി ചെറുതായൊന്ന് ആഘോഷിക്കുകയാണ്.
കുളി കഴിഞ്ഞ് കണ്ണൊക്കെ എഴുതി ഒരുങ്ങുന്നതും തിരുവാതിര സ്‌പെഷല്‍ വിഭവങ്ങളുമെല്ലാം മാളവിക വീഡിയോയില്‍ കാണിച്ചിരുന്നു. കൂവപ്പായസമാണ് തിരുവാതിരയില്‍ ഏറെ സ്‌പെഷലായത്. പഞ്ചാമൃതം ഞങ്ങള്‍ ഉണ്ടാക്കാറുണ്ട്. പിന്നെ പുഴുക്കും, ഇതൊക്കെയാണ് ഈ ദിവസത്തെ സ്‌പെഷല്‍. തിരുവാതിര ആഘോഷത്തെക്കുറിച്ചുള്ള ഓര്‍മ്മകളെക്കുറിച്ച് മാളവിക അമ്മൂമ്മയോട് ചോദിച്ചിരുന്നു.
നിരവധി പേരായിരുന്നു വീഡിയോയ്ക്ക താഴെയായി കമന്റുകളുമായെത്തിയത്. മാളു വീഡിയോയുമായി എത്തുമെന്ന് പ്രതീക്ഷിച്ചിരുന്നു, അത് തെറ്റിയില്ലെന്നായിരുന്നു ആരാധകരുടെ കമന്റുകള്‍. കല്യാണത്തിന് മുന്‍പുള്ള തിരുവാതിരയാണല്ലോ എന്നും ആരാധകര്‍ മാളവികയോട് ചോദിച്ചിരുന്നു. നായികനായകനിലെ സഹതാരമായ തേജസ് ജ്യോതിയും താനും വിവാഹിതരാവാന്‍ പോവുകയാണെന്ന് അടുത്തിടെയായിരുന്നു മാളവിക പറഞ്ഞത്. കല്യാണമുണ്ടെന്ന് പറഞ്ഞിരുന്നുവെങ്കിലും വരന്‍ ആരാണെന്ന് താരം വ്യക്തമാക്കിയിരുന്നില്ല. പെണ്ണുകാണല്‍ ചടങ്ങിന്റെ വീഡിയോയിലൂടെയായാണ് തേജസാണ് വരനെന്ന് പരസ്യമാക്കിയത്.