എല്ലുകളെല്ലാം പൊടിഞ്ഞുപോവുന്ന പോലെയുള്ള വേദനയാണെന്ന് പറഞ്ഞു! ഗർഭം മാത്രമല്ല പ്രസവരംഗങ്ങളിൽ അഭിനയിക്കാനും ബുദ്ധിമുട്ടി! സംശയം ചോദിച്ചത് സിന്ധു ചേച്ചിയോടാണെന്നും മരിയ പ്രിൻസ്

അമ്മ ഗര്‍ഭിണിയാണന്നെറിഞ്ഞതോടെയാണ് അനുവിലും മാറ്റങ്ങള്‍ വന്ന് തുടങ്ങിയത്. അച്ഛനും അമ്മയും ഒന്നിച്ച് ജീവിക്കുന്നതും അവര്‍ക്കൊരു കുഞ്ഞുണ്ടാവുന്നതുമൊന്നും അനുവിന് ഇഷ്ടമായിരുന്നില്ല. ഇത്രയധികം പൊസസീവാകരുതെന്നായിരുന്നു അനുവിനെക്കുറിച്ച് ആളുകള്‍ പറഞ്ഞത്. അനു എന്തിനാണ് ഇത്രയധികം പൊസസീവാകുന്നതെന്ന് ഞാനും ചിന്തിച്ചിരുന്നു. അമ്മയും അച്ഛനും ഒന്നിച്ച് കഴിയുന്നത് പോലും ഇഷ്ടമില്ലാത്ത അനുവിനെ സംബന്ധിച്ച് അമ്മ ഗര്‍ഭിണിയായത് താങ്ങാന്‍ പറ്റാത്ത കാര്യമായിരുന്നു. തനിക്കുള്ളതെല്ലാം പങ്കിടേണ്ടി വരുമെന്ന ചിന്തയായിരുന്നു അനുവിന്.

അനുവിനെപ്പോലെയാണ്, അനുവിന്റെ പോലെ തന്നെയുള്ള സ്വഭാവങ്ങളുള്ള മകളുണ്ടെന്ന് പറഞ്ഞ് ആളുകള്‍ എനിക്ക് മെസ്സേജ് അയച്ചിരുന്നു. അമ്മയുടെ കുഞ്ഞിനെ കൊല്ലുന്ന തരത്തിലുള്ള അനുവിന്റെ മാറ്റം അവതരിപ്പിക്കുകയെന്നത് ബുദ്ധിമുട്ടുള്ള കാര്യമായിരുന്നു. ഒത്തിരി വേരിയേഷന്‍സുള്ള ക്യാരക്ടറായിരുന്നു അത്. അതെനിക്ക് കൃത്യമായി ചെയ്യാനായതില്‍ സന്തോഷമുണ്ടെന്ന് മരിയ പറയുന്നു.

ഗര്‍ഭിണിയായി അഭിനയിക്കുന്നതായിരുന്നു ഏറ്റവും വലിയ വെല്ലുവിളി. എനിക്കങ്ങനെയൊരു എക്‌സ്പീരിയന്‍സില്ലാത്തതിനാല്‍ ഓണ്‍സ്‌ക്രീന്‍ അമ്മായിഅമ്മയായി അഭിനയിക്കുന്ന സിന്ധു ചേച്ചിയോടായിരുന്നു ഞാന്‍ സംശയങ്ങള്‍ ചോദിച്ചിരുന്നത്. ഗര്‍ഭിണിയായിരുന്ന സമയത്തും അനു അമ്മയോട് ദേഷ്യപ്പെടുന്നുണ്ടായിരുന്നു. ശബ്ദം ഉയര്‍ത്തേണ്ടി വരുന്ന സന്ദര്‍ഭങ്ങളില്‍ ബുദ്ധിമുട്ട്് വരുന്നത് പോലെയായാണ് അഭിനയിച്ചത്. റിയലിസ്റ്റിക്ക് ഫീലിന് വേണ്ടിയാണ് അങ്ങനെ ചെയ്തത്.

ഗര്‍ഭിണിയായത് മാത്രമല്ല പ്രസവരംഗം ചിത്രീകരിക്കുന്നതും വെല്ലുവിളിയായിരുന്നു. ശരീരത്തിലെ എല്ലുകളെല്ലാം നുറുങ്ങിപ്പോവുന്ന തരത്തിലുള്ള വേദനയാണ് ആ സമയത്തേതെന്നായിരുന്നു ആളുകള്‍ പറഞ്ഞിരുന്നത്്. അങ്ങനെയൊരു വേദന മുഖത്ത് വരുത്താനായി ശ്രമിച്ചിരുന്നു. പ്രസവരംഗം ചിത്രീകരിക്കുന്നതിനിടയില്‍ ബ്ലഡ് പ്രഷര്‍ കുറഞ്ഞ് ഞാന്‍ തലകറങ്ങി വീണിരുന്നു. നോര്‍മ്മലായതിന് ശേഷമായാണ് ബാക്കി സീനുകള്‍ എടുത്തതെന്നും മരിയ പറയുന്നു.