ഇങ്ങനെയൊക്കെ നടന്നാൽ മതിയോ? ഒരു കല്യാണം കഴിക്കണ്ടേ എന്ന് ആരാധകൻ; രസകരമായ മറുപടിയുമായി കുടുംബവിളക്കിലെ സഞ്ജന

രേഷ്മയ്ക്ക് പ്രശസ്തി നേടിക്കൊടുത്ത കഥാപാത്രമാണ് സഞ്ജന. ഭർത്താവിനേയും കുടുംബത്തേയും ഏറെ സ്നേഹിക്കുന്ന ഒരു പെൺകുട്ടിയായിട്ടാണ് രേഷ്മ പരമ്പരയിൽ എത്തുന്നത്. കുടുംബവിളക്കിൽ ആരെയാ ഇഷ്ടം എന്നാണ് ഒരു ആരാധകന്റെ ചോദ്യം എല്ലാവരേയും ഇഷ്ടാമാണെന്നാണ് രേഷ്മ ഇതിന് മറുപടി നൽകിയിരിക്കുന്നത്. സീരിയൽ ഒക്കെ എങ്ങനെ പോകുന്നു എന്ന ചോദ്യത്തിന് നന്നായി പോകുന്നുവെന്നായിരുന്നു താരത്തിന്റെ മറുപടി. സഞ്ജന എന്ന കഥാപാത്രത്തിൽ തൃപ്തയാണോ ചേച്ചി എന്നും ഒരാൾ ചോദിച്ചിരുന്നു. ഈ ചോദ്യത്തിന് തീർച്ചയായും അതേ എന്നാണ് രേഷ്മ മറുപടി പറഞ്ഞിരിക്കുന്നത്.

പഠിത്തമൊക്കെ കഴിഞ്ഞോ എന്നായിരുന്നു ഒരാൾക്ക് അറിയേണ്ടത്. കഴിഞ്ഞു എന്ന് താരം മറുപടി നൽകി. ചേച്ചീടേ പ്രായം എത്രയാണെന്ന് ചിലർ ചോദിച്ചു. 21 വയസാണ് തന്റെ പ്രായമെന്നായിരുന്നു താരത്തിന്റെ മറുപടി. ഇങ്ങനെയൊക്കെ നടന്നാൽ മതിയോ? ഒരു കല്യാണം കഴിക്കണ്ടേ എന്നായിരുന്നു ഒരു ആരാധികയുടെ കമന്റ്. വളരെ രസകരമായി വേണ്ടായേ‌‌, സമയം ഉണ്ടല്ലോ എന്നാണ് രേഷ്മ മറുപടി നൽകിയിരിക്കുന്നത്. നൂബിൻ ചേട്ടന്റെ കല്യാണത്തിനു പോകുന്നുണ്ടോ എന്നും ആരാധകർ ചോദിച്ചിട്ടുണ്ട്. പോകുമല്ലോ എന്നാണ് ഇതിന് മറുപടിയായി രേഷ്മ കുറിച്ചിരിക്കുന്നത്.

മിനിസ്ക്രീൻ രംഗത്തു തന്നെ നിരവധി സുഹൃത്തുക്കളുണ്ട് താരത്തിന്. മൗനരാഗം സീരിയലിലെ കല്യാൺ ഖന്ന, അമൃത നായർ, ആതിര മാധവ് തുടങ്ങി നിരവധി പേർ രേഷ്മയുടെ നല്ല സുഹൃത്തുക്കളാണ്. ഇവർക്കൊപ്പമുള്ള ചിത്രങ്ങളൊക്കെ താരം പങ്കുവയ്ക്കാറുമുണ്ട്. ഫോട്ടോഷൂട്ടുകളിലും വളരെ സജീവമാണ് രേഷ്മയിപ്പോൾ.

ആദ്യമൊക്കെ രേഷ്മയും നൂബിനും തമ്മിൽ പ്രണയത്തിലാണെന്ന തരത്തിൽ വാർത്തകൾ പ്രചരിച്ചിരുന്നു. എന്നാൽ ഈ ചോദ്യത്തിന് മറുപടിയുമായി രേഷ്മ തന്നെ രംഗത്തെത്തിയിരുന്നു. താനും നൂബിനും തമ്മിൽ സുഹൃത്തുക്കളാണെന്നും പ്രണയമില്ലെന്നുമായിരുന്നു താരം പറഞ്ഞത്.