അച്ഛനോടും അമ്മയോടും പറയാന്‍ പറ്റാത്ത കാര്യം ജീവയോട് പറഞ്ഞു, അന്ന് അവനിൽ ശ്രദ്ധിച്ച കാര്യമാണ് ഏറ്റവും ഇഷ്ടപ്പെട്ടത്, ഏറ്റവും മോശം സമയത്താണ് ജീവയെ കണ്ടുമുട്ടിയത് എന്ന് അപർണ

ടെലിവിഷന്‍ രംഗത്തെ മാതൃകാ ദമ്പതിമാരാണ് ജീവയും അപര്‍ണയും എന്ന് നിസംശയം പറയാം. സോഷ്യല്‍ മീഡിയയില്‍ സജീവമായ താര ജോഡികള്‍ ഓരോ തവണയും രസകരമായ ഗെയിമുമായി യൂട്യൂബില്‍ എത്താറുണ്ട്. പരസ്പരം അങ്ങോട്ടും ഇങ്ങോട്ടും ഇതുവരെ ചോദിക്കാത്ത ചോദ്യങ്ങളുമായിട്ടായിരുന്നു പുതിയ എപ്പിസോഡ്. ഏഴ് വര്‍ഷത്തിന് ഇടയില്‍ ഇതുവരെ അപര്‍ണയോട് ചോദിക്കാത്ത ചോദ്യങ്ങള്‍ ജീവ ചോദിച്ചു. അതിലൊരു ചോദ്യമായിരുന്നു, എന്ത് കൊണ്ട് തന്നെ ഇഷ്ടപ്പെട്ടു എന്നത്.

ജീവയുടെ ചോദ്യത്തിന് വളരെ വ്യക്തമായ മറുപടി അപര്‍ണ നല്‍കി. ജീവിതത്തിലെ ഏറ്റവും മോശം സമയത്ത് ആണ് ഞാന്‍ ജീവയെ പരിചയപ്പെട്ടത്. ആ സമയത്ത് എനിക്ക് എന്റെ അച്ഛനോടും അമ്മയോടും പറയാന്‍ പറ്റാത്ത ഒരു വിഷമം ജീവയോട് പറഞ്ഞു. അപ്പോള്‍ ഞാന്‍ ജീവയില്‍ ശ്രദ്ധിച്ച ഒരു കാര്യം, അവന്‍ എന്നെ ജഡ്ജ് ചെയ്തില്ല, എന്നെ സപ്പോര്‍ട്ട് ചെയ്തു. ആ സംസാരത്തില്‍ ഞങ്ങള്‍ക്ക് രണ്ട് പേര്‍ക്കും സമാനമായ ഒരുപാട് അനുഭവങ്ങള്‍ ഉണ്ടായിട്ടുണ്ട് എന്ന് മനസ്സിലായി.

ഇതേ അഭിപ്രായം തന്നെയാണ് ജീവയും പറഞ്ഞത്. ഞാന്‍ അപര്‍ണയെ കണ്ട് മുട്ടിയത് ജീവിതത്തിലെ ഏറ്റവും മോശം സമയത്ത് ആണ്. നമ്മള്‍ നല്ല സമയത്ത് കണ്ടു മുട്ടുന്നവര്‍ ചിലപ്പോള്‍ വിഷമഘട്ടത്തില്‍ ഇട്ടിട്ട് പോയേക്കാം. എന്നാല്‍ ഞങ്ങള്‍ കണ്ടുമുട്ടിയത് ജീവിതത്തിലെ ഏറ്റവും മോശം സമയത്ത് ആയത് കൊണ്ട് പരസ്പരം മനസ്സിലാക്ക ഒരുപാട് സാധിച്ചു എന്നാണ് ജീവ പറഞ്ഞത്.

തന്നില്‍ മാറ്റണം എന്ന് ആഗ്രഹിക്കുന്ന കാര്യം ഏതാണ് എന്നായിരുന്നു പിന്നീട് ജീവ അപര്‍ണയോട് ചോദിച്ചത്. അങ്ങനെ ഒന്നില്ല എന്ന് അപര്‍ണ പറഞ്ഞു. ജീവയില്‍ ഒന്നും മാറ്റണം എന്ന് ഞാന്‍ ആഗ്രഹിയ്ക്കുന്നില്ല. ഇത്രയും നല്ല മനുഷ്യനാവരുത്, കുറച്ചൊക്കെ മോശമാവണം എന്ന് ഞാന്‍ പറയാറുണ്ട്. പക്ഷെ അതും വേണ്ട. ജീവയെ ദൈവം സൃഷ്ടിച്ചിരിയ്ക്കുന്നത് ഇങ്ങനെയാണ്. അത് ഇങ്ങനെ തന്നെ നില്‍ക്കട്ടെ. എന്തെങ്കിലും മാറ്റം വരുത്തണം എന്ന് ഞാന്‍ ആവശ്യപ്പെട്ടാല്‍, അത് ദൈവത്തിന്റെ സൃഷ്ടിയെ തന്നെ മാറ്റാന്‍ പറയുന്നത് പോലെയാവും. അത് വേണ്ട എന്നായിരുന്നു അപര്‍ണയുടെ മറുപടി.