സൈബറാക്രമണങ്ങൾക്കെതിരെ നിയമനടപടിയുമായി ആര്യയും!; സൈബര്‍ സെല്ലില്‍ വിശ്വാസമുണ്ടെന്ന് താരം!

ബിഗ്ബോസ് സീസൺ 2 താരം ആര്യ സൈബറാക്രമണങ്ങൾക്കെതിരെ നിയമനടപടിയുമായി മുന്നോട്ടെത്തിയിരിക്കുകയാണ്. താരത്തിനെതിരെ സോഷ്യൽ മീഡിയയിൽ കടുത്ത ഭാഷയിൽ വിമർശനങ്ങളും ട്രോളുകളുമൊക്കെ ഉയർന്നിരുന്നു. ഷോയില്‍ പങ്കെടുത്ത വനിതാ മത്സരാര്‍ത്ഥികള്‍ക്കെതിരെയാണ് സാമൂഹ്യമാധ്യമങ്ങളില്‍ കൂടുതലായും വിമർശനങ്ങൾ ഉയർന്നത്. സ്ത്രീവിരുദ്ധതയും വംശീയതയും നിറഞ്ഞ സൈബര്‍ ആക്രമണമാണ് ഇവർക്കെതിരെ ഉണ്ടായിരുന്നത്.

Also Read: ദെെവമേ! ഇതെന്നെ കൊണ്ട് പറ്റുമോ? കരിയര്‍ മാറ്റിമറിച്ച സിനിമയെ കുറിച്ച് സെെജു കുറുപ്പ്

മുൻപ് ബിഗ്ബോസ് വീട്ടിൽ നിന്ന് പുറത്തായ മല്‍സരാര്‍ത്ഥികളായ മഞ്ജു പത്രോസും, ജസ്ല മാടശേരിയും അടക്കം തങ്ങള്‍ക്കെതിരായ സൈബറാക്രമണങ്ങൾക്കെതിരെ രംഗത്ത് വന്നിരുന്നു. അവരുടെ അതേ പാത പിന്തുടർന്നാണ് സിനിമാ ടെലിവിഷന്‍ താരമായ ആര്യ സൈബർ സെല്ലിന് മുന്നിൽ പരാതിയുമായി എത്തിയിരിക്കുന്നത്. ഇതിന് പിന്നാലെ ആര്യ സോഷ്യൽ മീഡിയയിൽ സൈബര്‍ സെല്ലില്‍ വിശ്വാസമുണ്ടെന്ന് കുറിച്ചിട്ടുമുണ്ട്.

തുടക്കം മുതല്‍ ആര്യ, മഞ്ജു പത്രോസ്, വീണാ നായര്‍, ജസ്ല മാടശേരി, ഫുക്രു എന്നിവര്‍ക്കെിരെ ബിഗ് ബോസ് മത്സരാര്‍ത്ഥിയായിരുന്ന ഡോ. രജിത്കുമാറിനെ അനുകൂലിക്കുന്നവരാണ് വ്യക്തിഹത്യാ സ്വഭാവത്തിലുള്ള ട്രോളുകളും ആക്രമണവും പടച്ചുവിടുന്നത്. ആര്യക്കെതിരെ രജിത് ആര്‍മി, ഡിആര്‍കെ ഫാന്‍സ് തുടങ്ങിയ ഗ്രൂപ്പുകളും രംഗത്ത് വന്നിരുന്നു. ആര്യ ബിഗ് ബോസ്സില്‍ മത്സരിക്കുന്ന സാഹചര്യത്തിലായിരുന്നു ആര്യയ്ക്കെതിരെ ശക്തമായ ഭാഷയിൽ സോഷ്യൽ മീഡിയയിൽ ആക്രമണമുണ്ടായിരുന്നത്.

Also Read: കളികൾ വേറെ ലെവലെന്ന് അഭി; ഇതെന്നാ പിള്ളേര് കളിയാണോയെന്ന് ആര്യയും; ബിഗ് ബോസിന് ശേഷം പ്രതികരണം!

ആ അവസ്ഥയിൽ ഫേക്ക് ഐഡി വഴിയുള്ള ആക്രമണത്തിനെതിരെ സൈബർ സെല്ലിൽ പരാതി സമർപ്പിക്കുമെന്നും മോശം കമന്റുകളും സ്ക്രീൻ ഷോട്ടുകളും സഹിതം സൈബര്‍ സെല്ലിന് പരാതിയായി നല്‍കുമെന്നും ആര്യയുടെ ഫേസ്ബുക്ക് പേജ് കൈകാര്യം ചെയ്യുന്ന അഡ്മിന്‍ താക്കീതായി മുന്നറിയിപ്പ് നൽകിയിരുന്നു.

കൊറോണാ വൈറസ് വ്യാപിക്കുന്നതിൻ്റെ പശ്ചാത്തലത്തിലാണ് ബിഗ് ബോസ് ഷോ അവസാനിപ്പിച്ചത്. തുടർന്നും ആര്യയെ പരിഹസിച്ചുകൊണ്ടുള്ള ട്രോളുകളും സ്ത്രീവിരുദ്ധ പോസ്റ്റുകളും സോഷ്യൽ മീഡിയയിൽ സജീവമായിരുന്നു. ഇതിന് പിന്നാലെയാണ് നിയമനടപടിയുമായി ആര്യ മുന്നോട്ട് പോകാൻ തീരുമാനിച്ചത്. സംസ്ഥാനത്തെ സൈബര്‍ സെല്‍ ശക്തമാണെന്നും അവരില്‍ വിശ്വാസമുണ്ട് എന്നുമാണ് ആര്യ ഫേസ്ബുക്കിൽ കുറിച്ചത്. ഈ പോസ്റ്റിന് താഴെയും നിരവധി പേരാണ് ആര്യയെ വെല്ലുവിളിക്കുന്ന തരത്തിലുള്ള ഭാഷ നിറഞ്ഞ കമന്റുകളുമായി എത്തുന്നത്.