കുഞ്ഞിനെ അടിച്ച് വളര്‍ത്തുന്നത് നല്ല കാര്യമല്ല! ഞാന്‍ അങ്ങനെ ചെയ്തിട്ടില്ല! മകനെക്കുറിച്ച് നിമ്മി അരുണ്‍ഗോപന്‍

അഭിനേത്രിയും അവതാരകയുമായ നിമ്മി അരുണ്‍ ഗോപന്‍ സോഷ്യല്‍മീഡിയയില്‍ സജീവമാണ്. കരിയറിലെയും ജീവിതത്തിലെയും കാര്യങ്ങളെക്കുറിച്ചെല്ലാം നിമ്മി സംസാരിക്കാറുണ്ട്. മകന്‍ ജനിച്ചതിനെക്കുറിച്ചും അതിന് ശേഷമുള്ള വിശേഷങ്ങളുമെല്ലാം വീഡിയോകളിലൂടെയായി പങ്കിടാറുണ്ട്. ഇ ടോക്ക് ലവ് എന്ന ചാറ്റ് ഷോയുമായും നിമ്മി എത്താറുണ്ട്. ഇത് ഞാന്‍ കുറച്ച് നാളായി മിസ് ചെയ്ത സംഭവമാണ്. നിങ്ങളുടെ ചോദ്യങ്ങളൊക്കെ എന്റെ മുന്നിലുണ്ട്. അതിനുള്ള മറുപടിയൊക്കെ തരാം. വേനല്‍ക്കാലമായതിനാല്‍ ഇപ്പോള്‍ അങ്ങനെയധികം പുറത്ത് പോവാറില്ല. വീടിനകത്തിരുന്ന് ചില്‍ ചെയ്യാറാണ് പതിവ്. ഇ ടോക്ക് ലവില്‍ പൊതുവെ ഭക്ഷണം കഴിച്ചാണ് സംസാരിക്കാറുള്ളത്. ഇത്തവണ ഒന്നും കഴിക്കാന്‍ തോന്നുന്നില്ല.
ബേബിയുടെ അടുത്ത് ദേഷ്യം വരാറുണ്ടോയെന്നായിരുന്നു ഒരാള്‍ ചോദിച്ചത്. ഇതുവരെ ആര്യന്‍ കുട്ടനോട് ദേഷ്യം തോന്നിയിട്ടില്ല. അവനെ ഇതുവരെ അടിച്ചിട്ടില്ല. ഇനി അടിക്കരുത് എന്നാണ് എന്റെ ഏറ്റവും വലിയ ആഗ്രഹം. കാരണം ഞാനൊക്കെ വളര്‍ന്നുവരുന്ന സമയത്ത് ഒത്തിരി തല്ല് കിട്ടിയിട്ടുണ്ട്. ഒന്ന് വീണ് എന്നറിഞ്ഞാല്‍ ആദ്യം അടിക്കുന്ന പതിവാണ്. എന്നെങ്കിലും ഒരു കുഞ്ഞുണ്ടായാല്‍ ഞാന്‍ അതിനെ അടിച്ച് വളര്‍ത്തില്ലെന്ന് തീരുമാനിച്ചിരുന്നു.
ചില സമയത്ത് ദേഷ്യവും വിഷമവുമൊക്കെ വരാറുണ്ട്. ഞാന്‍ അത് ബേബിയുടെ അടുത്ത് കാണാറില്ല. അവന്‍ ഒന്നും ചെയ്യുന്നില്ലല്ലോ, പിന്നെന്തിനാണ് അവനോട് ദേഷ്യപ്പെടുന്നത്. നമുക്ക് നെഗറ്റീവ് ഇമോഷന്‍ ഉണ്ടെങ്കില്‍ അത് എങ്ങനെയെങ്കിലും കളയുക. കുഞ്ഞിന്റെ അടുത്തേക്ക് ഒരിക്കലും നെഗറ്റീവ് ഇമോഷനുമായി പോവരുത്. കുഞ്ഞിനോടല്ല നിങ്ങള്‍ക്ക് ദേഷ്യമുള്ളത്. ആരുടെ അടുത്താണ് അത് കാണിക്കാന്‍ എളുപ്പം, കുഞ്ഞിന്റെ അത് കാണിക്കാമെന്ന് കരുതുന്നത് തെറ്റാണ്. നിങ്ങളെന്തിനാണ് ദേഷ്യം കാണിക്കുന്നതെന്ന് അതിന് അറിയുക പോലുമില്ല.
എപ്പോഴും ആള്‍ക്കാരെ കാണുമ്പോള്‍ ആര്യന്‍ കുട്ടന് മുഖത്ത് സന്തോഷം വേണം. സന്തോഷത്തോടെ വേണം അവനെ കാണാന്‍. നമ്മള്‍ കുഞ്ഞിനോട് ദേഷ്യത്തില്‍ പറഞ്ഞാല്‍ തിരിച്ചും അതേപോലെ പറയും. ദേഷ്യം നിയന്ത്രിക്കാനാവുന്നില്ലെങ്കില്‍ മിണ്ടാതിരിക്കുക. കുഞ്ഞിനെ അടിച്ച് വളര്‍ത്തുന്നത് നല്ലൊരു കാര്യമാണെന്ന് കരുതരുതെന്നുമായിരുന്നു നിമ്മി അരുണ്‍ഗോപന്‍ പറഞ്ഞത്.