ആ കുറുമ്പി ഡിംപിളിനെ മറന്നോ? താരം ഇന്ന് ഡോക്ടർ ആകാനുള്ള തയ്യാറെടുപ്പിലാണ്!

ഡിംപിൾ റോസ് എന്ന താരം ഇന്ന് മിനിസ്ക്രീനിൽ അത്ര സജീവം അല്ലെങ്കിലും ഇപ്പോഴും മലയാള മിനി സ്‌ക്രീൻ ആരാധകരുടെ മനസ്സിൽ വലിയ സ്ഥാനമാണ് താരത്തിന്റേത്. കുട്ടിത്തം തുളുമ്പുന്ന മുഖത്തിനും ചിരിക്കും ഇന്നും ഒരു മാറ്റവും വന്നിട്ടില്ല. വിവാഹശേഷം അഭിനയത്തിൽ നിന്നും വിട്ടു നിന്ന താരം തീർത്തും കുടുംബിനി ആയി ഒതുങ്ങി കൂടാതെ തിരക്കിലായിരുന്നു.

ചെറുപ്രായത്തിൽ തന്നെ അഭിനയത്തിൽ സജീവം ആയ ഡിംപിൾ ഇപ്പോൾ ഉപരിപഠനം പൂർത്തിയാക്കുന്ന തിരക്കിൽ ആണ് . അതിനു പൂർണ്ണ പിന്തുണ നൽകി ഭർത്താവ് ആൻസൺ ഫ്രാൻസിസും കുടുംബവും ഉണ്ട്.

2017 ലാണ് ബിസിനെസ്സ്മാനായ ആൻസണുമായി ഡിംപിൾ വിവാഹിതയാകുന്നത്. ശേഷം അഭിനയത്തിൽ നിന്നും വിട്ടുനിന്ന ഡിംപിൾ സമയം മലയാളത്തിന് നൽകിയ അഭിമുഖത്തിലൂടെ വിശേഷങ്ങൾ പങ്ക് വയ്ക്കുകയാണ്.


"അഭിനയത്തിലേക്ക് തിരിച്ചുവരവ് ഉടൻ ഉണ്ടാകില്ല. ഇപ്പോൾ പഠനം പൂർത്തിയാക്കണം. എംബിഎ കഴിഞ്ഞു. ഇനി ഡോക്ട്രേറ്റ് എടുക്കണം. അതിനുള്ള എൻട്രൻസിനായുള്ള ഒരുക്കത്തിലാണ് ഞാൻ. അഭിനയം മടുത്തിട്ടില്ല. അത് ഒരിക്കലും ഉണ്ടാവുകയും ഇല്ല. അഭിനയിക്കാൻ ആണെങ്കിലും പഠിക്കാൻ ആണെങ്കിലും ഭർത്താവിന്റെ പിന്തുണ ഉണ്ട്. ബിസിനെസ്സ് രംഗമാണ് ഭർത്താവിന്റേത് അതുകൊണ്ടുതന്നെ അദ്ദേഹത്തിന് സഹായകമായി എന്തങ്കിലും ചെയ്യണം എന്നുതന്നെയാണ് ആഗ്രഹം" മിനിസ്‌ക്രീനിന്റെ എക്കാലത്തെയും പ്രിയ നടി പറയുന്നു.

ALSO READ: 'എന്‍റെ മാതാവി'ലെ സുന്ദരികുട്ടി ഐലീൻ എലീസയുടെ വിശേഷങ്ങള്‍

അഞ്ചു വയസ്സിലാണ് ഡിംപിൾ ആഭിനയരംഗത്തേക്ക് എത്തുന്നത്. പങ്കജകസ്തൂരിയുടെ പരസ്യത്തിൽ ലെനയുടെ കൂടെയാണ് ഡിംപിൾ ആദ്യമായി ക്യാമറയ്ക്ക് മുൻപിൽ എത്തുന്നത്. പിന്നീട് കെ കെ രാജീവിന്റെ പൊരുത്തം എന്ന പരമ്പരയിൽ കല്ലുമോൾ എന്ന കഥാപാത്രത്തെ അവതരിപ്പിച്ചതോടുകൂടിയാണ് താരത്തിന് മിനിസ്‌ക്രീനിന്റെ ഉയരങ്ങൾ കീഴടക്കാൻ സാധിച്ചത് . വളരെ ചെറുപ്പത്തിൽ തന്നെ ബിഗ് സ്ക്രീനിലും തിളങ്ങിയ ഡിംപിൾ കാറ്റ് വന്നുവിളിച്ചപ്പോൾ തെങ്കാശിപ്പട്ടണം തുടങ്ങിയ സിനിമകളിലും അഭിനയിച്ചിട്ടുണ്ട്.

2000 ത്തിൽ ആരംഭിച്ച അഭിനയജീവിതം 2016 ൽ എത്തിയപ്പോൾ നാൽപ്പതോളം പരമ്പരകളിലാണ് ഡിംപിൾ തന്റെ അഭിനയമികവ് കാഴ്ചവച്ചത്. മിന്നുകെട്ടിലെ സരിത എന്ന കഥാപാത്രത്തെ ഇരുകൈയ്യും നീട്ടിയാണ് പ്രേക്ഷകർ സ്വീകരിച്ചത്.