അവരുടെ കിടപ്പറയിൽ എന്ത് സംഭവിച്ചു എന്ന് തിരയുന്നത് മോശം കാര്യം! ഞാൻ വിശ്വാസിയാണ്! പള്ളിക്കമ്മിറ്റി എനിക്കൊപ്പം നിന്നിട്ടുണ്ടെന്നും ഹെയ്ദി സാദിയ

സഹദിന്റെ ജെന്‍ഡറും സെക്ഷ്വാലിറ്റിയുമൊക്കെ മാറ്റിനിര്‍ത്തുക. അവനൊരു മനുഷ്യനാണ്. അവന്റെ ശരീരത്തില്‍ ഇപ്പോള്‍ നടന്നിട്ടുള്ള ബയോളജിക്കല്‍ പ്രോസസ് എന്ന് പറയുന്നത് ഏറെ പ്രധാനപ്പെട്ടതാണ്. നോര്‍മ്മലി സ്ത്രീയിലാണ് പ്രസവം നടക്കുന്നത്. പുരുഷനില്‍ നടക്കുമ്പോള്‍ അത് ചര്‍ച്ചാവിഷയമായിരിക്കും. പ്രസവ ശേഷം പോസ്റ്റ്പാര്‍ട്ടം ഡിപ്രഷന്‍ എന്നൊരു അവസ്ഥയുണ്ട്. അതിനെ അഭിമുഖീകരിക്കാന്‍ പോവുന്ന വ്യക്തിയാണ് സഹദ് എന്ന കാര്യം വിമര്‍ശിക്കുന്നവരും മനസിലാക്കേണ്ടതാണ്. ഒരു മാനുഷിക പരിഗണന കൊടുത്ത് അവനെ വിമര്‍ശിക്കുന്നവരൊക്കെ പിന്‍വാങ്ങണം എന്നാണ് പറയാനുള്ളത്.

സഹദിന്റെയും സിയയുടെയും ജീവിതത്തെക്കുറിച്ച് അറിയാന്‍ ആകാംക്ഷ കാണും. എന്നാല്‍ അനാവശ്യ ചര്‍ച്ചകളും പരിഹാസങ്ങളും നടത്തി സഹദിനൊരു ട്രോമ കൊടുക്കുന്നത് ശരിയല്ല. ഒരു പരിഗണന കൊടുത്ത് അവരെ അവരുടെ പാട്ടിന് വിടുക. അവര് സമൂഹത്തിന് ദ്രോഹം ചെയ്തു എന്നൊന്നും എനിക്ക് തോന്നുന്നില്ല. അവരെ ജഡ്ജ് ചെയ്തിട്ടൊന്നും കാര്യമില്ല.

റീച്ച് കൂട്ടാനായി ഈ വിഷയമൊക്കെ മോശമായി വ്യഖ്യാനിക്കുന്നവരുണ്ടാവും. പരിചയമുള്ളവരിലൊരാള്‍ ഇങ്ങനെ ചെയ്തത് കണ്ടപ്പോള്‍ എനിക്ക് സങ്കടം തോന്നിയിരുന്നു. അവരുടെ കിടപ്പറയില്‍ എന്താണ് സംഭവിച്ചത്. അത് അവരുടെ പേഴ്‌സണല്‍ കാര്യമല്ലേ. അതൊന്നും മറ്റൊരാൾ കാണുന്നില്ലല്ലോ, കണ്ടെങ്കില്‍ക്കൂടിയും അത് പറയാന്‍ പാടില്ലല്ലോ, പ്രൈവസിയെ ബാധിക്കുന്ന കാര്യമല്ലേ. ഇത് ആദ്യത്തെ സംഭവമായത് കൊണ്ടാണ് ഇത് പോലെ 10 പേർ വന്നാൽ തീരാവുന്ന കാര്യമേയുള്ളൂ.

ഞാനൊരു വിശ്വാസിയാണ്. ഓര്‍ത്തഡോക്‌സ് ചിന്താഗതിയുള്ള കുടുംബത്തില്‍ നിന്നാണ് ഞാന്‍ വരുന്നത്. സര്‍ജറിക്ക് മുന്നെ പല കാര്യങ്ങളെക്കുറിച്ചും നമ്മള്‍ റിസര്‍ച്ച് ചെയ്യും. നമ്മുടെ താല്‍പര്യമാണ് ഏറ്റവും പ്രധാനം.സ്ട്രഗിള്‍ ചെയ്ത് ഒറ്റയ്ക്ക് ജീവിക്കുന്ന വ്യക്തിയാണ് ഞാന്‍. എന്നെക്കുറിച്ച് ഒരു പ്രമുഖ പത്രത്തില്‍ പോസിറ്റീവായൊരു ഫീച്ചര്‍ വന്നിരുന്നു. ആ കട്ടിംഗും എടുത്ത് വന്ന് പള്ളിക്കമ്മിറ്റി എനിക്ക് പഠിക്കാനുള്ള സഹായങ്ങളൊക്കെ ചെയ്തിരുന്നു. കമ്യൂണിറ്റിയിലെ പലരേയും അവര്‍ സഹായിച്ചിരുന്നു.