അമൃതയും ബാലയും ഇനി രണ്ട് വ്യക്തികൾ; അവന്തിക ഇനി അമ്മയോടൊപ്പം!

ഐഡിയ സ്റ്റാർ സിംഗർ ഫെയിം അമൃത സുരേഷും ചലച്ചിത്ര നടൻ ബാലയും നിയമപരമായി ബന്ധം അവസാനിപ്പിച്ചു. ഇരുവരും കഴിഞ്ഞ ദിവസം എറണാകുളം കുടുംബ കോടതിയിൽ എത്തിയാണ് ബന്ധം അവസാനിപ്പിച്ചത്.

ഐഡിയ സ്റ്റാർ സിംഗർ റിയാലിറ്റി ഷോയിലൂടെയാണ് ഇരുവരും പ്രണയത്തിൽ ആകുന്നതും വിവാഹം കഴിക്കുന്നതും. 2010 ൽ ആയിരുന്നു ഇരുവരുടെയും വിവാഹം നടക്കുന്നത്. 2012ല്‍ മകള്‍ അവന്തിക ജനിച്ചു. ശേഷം 2016 മുതൽ ഇരുവരും വേര്‍പിരിഞ്ഞു താമസം ആരംഭിച്ചു. ഇരുവരുടെയും ജീവതത്തിൽ അസ്വാരസ്യങ്ങൾ നിലനിൽക്കുന്നു എന്ന് വാർത്തകൾ വന്നെങ്കിലും, എല്ലാ കുടുംബത്തിലും ഉള്ള പോലെയുള്ള ചെറിയ ചെറിയ വിഷയങ്ങൾ മാത്രമാണ് ഞങ്ങൾക്കിടയിലും നിലനിൽക്കുന്നതെന്ന് അമൃത സോഷ്യൽ മീഡിയയിലൂടെ വ്യക്തമാക്കുകയും ചെയ്തിരുന്നു. എന്നാൽ തുടർന്ന് പോകില്ല എന്ന് മനസിലായതോടെയാണ് വിവാഹ മോചനത്തിനായി പരസ്പര ധാരണയോടെ ഇരുവരും നിയമ നടപടികള്‍ സ്വീകരിച്ചതും ഇപ്പോൾ വിവാഹ മോചിതരായതും.



ALSO READ: അമൃതയുടെ ചിത്രത്തിനെ അനുകൂലിച്ചും പ്രതികൂലിച്ചും സോഷ്യൽ മീഡിയ!

ഏഴു വയസ്സുള്ള ഏകമകള്‍ അവന്തികയെ അമ്മയായ അമൃതയ്‌ക്കൊപ്പം വിടാനും ഇരുവരും തമ്മില്‍ ധാരണയായി. ഇടക്കാലത്ത് ബാലയോടൊപ്പം മകൾ കഴിയുന്നതിന്റെ വീഡിയോ സമൂഹ മാധ്യമങ്ങളിൽ വൈറൽ ആയിരുന്നു. ഒരു ദുഷ്ട ശക്തിയ്ക്കും ഞങ്ങളെ വേർപിരിക്കാൻ ആകില്ല എന്ന ക്യാപ്ഷ്യനോടെ ബാല മകളുടെ ജന്മദിനത്തിൽ പങ്ക് വച്ച ഫോട്ടോയും ആരാധകർ വിഷമത്തോടെയാണ് സ്വീകരിച്ചത്. ഇരുവരോടും ഒരുമിച്ചുപോകാൻ ആരാധകർ അഭ്യർത്ഥിച്ചുവെങ്കിലും കഴിഞ്ഞ ദിവസം വൈകിട്ടോടെ ഇരുവരും തമ്മിലുള്ള ദാമ്പത്യ ബന്ധത്തിന് തിരശ്ശീല വീണു.ബാല സുഹൃത്തുക്കള്‍ക്കൊപ്പവും അമൃത കുടുംബത്തിന് ഒപ്പവുമാണ് കോടതിയില്‍ എത്തിയത്.