എല്ലാ വേദനകളും മാറി അവന്‍ പെട്ടന്ന് ജീവിതത്തിലേക്ക് തിരിച്ചുവരട്ടെ, അവന് വേണ്ടി പ്രാര്‍ത്ഥിക്കണം; കാര്‍ത്തിക് പ്രസാദിന് എന്താണ് സംഭവിച്ചത് എന്ന് വിശദീകരിച്ച് ബീന ആന്റണി

ഏഷ്യനെറ്റില്‍ സംപ്രേക്ഷണം ചെയ്യുന്ന മൗനരാഗം എന്ന സീരിയലിലൂടെ പ്രേക്ഷകര്‍ക്ക് ഏറെ പരിചിതനാണ് കാര്‍ത്തിക് പ്രസാദ്. സീരിയില്‍ ബൈജു എന്ന നിഷ്‌കളങ്ക കഥാപാത്രമായിട്ടാണ് കാര്‍ത്തിക് എത്തുന്നത്. ദിവസങ്ങള്‍ക്ക് മുന്‍പ് കാര്‍ത്തിക്കിന് ഒരു അപകടം സംഭവിച്ചതായി വെളിപ്പെടുത്തി എത്തിയിരിക്കുകയാണ് ഇപ്പോള്‍ നടി ബീന ആന്റണി. മൗനരാഗത്തില്‍ വില്ലത്തിയായി അഭിനയിക്കുന്നത് ബീന ആന്റണിയാണ്. കാര്‍ത്തിക് പ്രസാദിന്റെ ഇപ്പോഴത്തെ അവസ്ഥയെ കുറിച്ച് ബീന ആന്റണി ഇന്‍സ്റ്റഗ്രാമില്‍ വീഡിയോ പങ്കുവയ്ക്കുകയായിരുന്നു.

''കാര്‍ത്തിക്കിന് എന്താണ് സംഭവിച്ചത്, അവസ്ഥ ഗുരുതരമാണോ എന്നൊക്കെ ചോദിച്ച് പലരും ഇന്‍ബോക്‌സില്‍ എനിക്ക് മെസേജ് അയക്കുന്നുണ്ട്. ശരിയാണ് ദിവസങ്ങള്‍ക്ക് മുന്‍പ് കാര്‍ത്തിക്കിന് ഒരു അപകടം സംഭവിച്ചിരുന്നു. മൗനരാഗത്തിന്റെ ഷൂട്ടിങ് കഴിഞ്ഞ് രാത്രിയില്‍ മടങ്ങവെ ഒരു ബസ് വന്ന് ഇടിയ്ക്കുകയായിരുന്നു. അപകടം കുറച്ച് സീരിയസ് ആയിരുന്നു. ഉടനെ തിരുവനന്തപുരത്തുള്ള സ്വകാര്യ ആശുപത്രിയില്‍ എത്തിച്ചു.''

''ഐസിയുവില്‍ ആയിരുന്നു. മൗനരാഗത്തിലെ മറ്റ് സഹപ്രവര്‍ത്തകര്‍ എല്ലാം കാര്‍ത്തിയെ ചെന്ന് കണ്ടിരുന്നു. അപകട നില തരണം ചെയ്തു. പക്ഷേ ഇനി എഴുന്നേറ്റ് നടക്കാന്‍ കുറച്ച് ദിവസങ്ങള്‍ എടുക്കും. കാലിന് നല്ല കാര്യമായ പരിക്ക് സംഭവിച്ചിട്ടുണ്ട്. രണ്ട് കാലിന്റെയും മസില്‍സും തൊലിയും എല്ലാം പോയിട്ടുണ്ട്. അതിന്റെ പല സര്‍ജ്ജറികളും നടന്നുകൊണ്ടിരിക്കുകയാണ്. പ്ലാസ്റ്റിക് സര്‍ജ്ജറി രണ്ട് - മൂന്നെണ്ണം കഴിഞ്ഞു. ഇനിയും ഒന്ന് രണ്ട് സര്‍ജ്ജറിയുണ്ട്. അത് കഴിഞ്ഞിട്ട് പൊട്ടല്‍ സംഭവിച്ചതിന്റെ ഒരു സര്‍ജ്ജറി കൂടെ വേണം എന്നാണ് പറഞ്ഞത്.''

''കോഴിക്കോട്ടുകാരനാണ് കാര്‍ത്തിക്. അപകടം സംഭവിച്ചപ്പോള്‍ ഭാര്യയും മറ്റ് ബന്ധുക്കളും എല്ലാം തിരുവനന്തപുരത്ത് വന്ന് നില്‍ക്കുകയായിരുന്നു. ഇപ്പോള്‍ കാര്‍ത്തിയെ കോഴിക്കോടുള്ള ആശുപത്രിയിലേക്ക് മാറ്റി. ഇതുവരെ ഞാന്‍ കാര്‍ത്തിക്കുമായി സംസാരിച്ചിട്ടില്ല, ഭാര്യയോട് സംസാരിച്ചിരുന്നു. ഇപ്പോള്‍ ഭയങ്കര വേദനയാണ്. അതിനുള്ള പെയിന്‍ കില്ലറുകള്‍ കഴിക്കുന്നുണ്ട് എന്നാണ് പറഞ്ഞത്. ഇതാണ് ഇപ്പോള്‍ കാര്‍ത്തിക്കിന്റെ അവസ്ഥ''

''എല്ലാവരും കാര്‍ത്തിക്കിന് വേണ്ടി പ്രാര്‍ത്ഥിക്കണം. സീരിയലിലെ കഥാപാത്രത്തെ പോലെ തന്നെ യഥാര്‍ത്ഥ ജീവിതത്തിലും വളരെ നിഷ്‌കളങ്കനാണ് കാര്‍ത്തിക്. എല്ലാ വേദനകളും മാറി അവന്‍ പെട്ടന്ന് സാധാരണ ജീവിതത്തിലേക്ക് തിരിച്ചുവപട്ടെ എന്ന് പാര്‍ത്ഥിക്കാം, എല്ലാവരുടെയും പ്രാര്‍ത്ഥന അവനൊപ്പം വേണം''- ബീന ആന്റണി പറഞ്ഞു