ഞങ്ങളായിട്ട് ഒഴിവാക്കിയതല്ല! ജീവയും അപര്‍ണയും വീഡിയോയില്‍ ഇല്ലാത്തതിനെക്കുറിച്ച് കുക്കുവും ദീപയും പറഞ്ഞത്

റിയാലിറ്റി ഷോയിലൂടെയായി ശ്രദ്ധിക്കപ്പെട്ടയാളാണ് കുക്കു എന്ന സുഹൈദ് എന്ന കുക്കു. കുക്കുവിന്റെ ഭാര്യ ദീപയും പ്രേക്ഷകര്‍ക്ക് പരിചിതരാണ്. യൂട്യൂബ് ചാനലിലൂടെയായും ഇവര്‍ വിശേഷങ്ങള്‍ പങ്കിടാറുണ്ട്. കാശ്മീര്‍ ട്രിപ്പിലെ വിശേഷങ്ങളെക്കുറിച്ച് പറഞ്ഞുള്ള വീഡിയോ വൈറലായിക്കൊണ്ടിരിക്കുകയാണ്. ഫ്‌ളാറ്റില്‍ നിന്നും ഇറങ്ങിയത് മുതലുള്ള വിശേഷങ്ങളായിരുന്നു കുക്കുവും ദീപയും പങ്കുവെച്ചത്.ജീവയും അപര്‍ണയും ലിജോയും ചിപ്പിയുമെല്ലാം ഇവര്‍ക്കൊപ്പമുണ്ടായിരുന്നു. ഡല്‍ഹിയിലേക്കായിരുന്നു ആദ്യം പോയത്. ഫ്‌ളൈറ്റില്‍ ഞങ്ങളൊക്കെ നല്ല ഉറക്കത്തിലായിരുന്നുവെന്നായിരുന്നു കുക്കു പറഞ്ഞത്. കാശ്മീരിലേക്ക് പോവുമ്പോള്‍ ഉപയോഗിക്കാനുള്ള ജാക്കറ്റൊന്നും വാങ്ങിയിട്ടില്ല. അതൊക്കെ വാങ്ങാന്‍ പോവുകയാണ്. കൂട്ടത്തിലാര്‍ക്കും ഹിന്ദി അറിയില്ല. എന്നാലും ഞങ്ങള്‍ ബാര്‍ഗെയ്ന്‍ ചെയ്യുമെന്നായിരുന്നു കുക്കു പറഞ്ഞത്.
ജീവയും അപര്‍ണയും ട്രിപ്പിലുണ്ടായിരുന്നെങ്കിലും ഇവരെ വീഡിയോയില്‍ കാണിച്ചിരുന്നില്ല. ഇതേക്കുറിച്ചായിരുന്നു ആരാധകര്‍ ചോദിച്ചത്. അപര്‍ണ ചേച്ചിയുടെ ചാനലിന് എന്ത് പറ്റി, അവിടെയും വീഡിയോ ഇല്ലല്ലോയെന്നും ആരാധകര്‍ ചോദിച്ചിരുന്നു.
പ്രമോയിലും ഈ വീഡിയോയുടെ താഴെയായും ജീവ അപര്‍ണ എവിടെ എന്ന കമന്റ് കണ്ടു. അവരെ ഒഴിവാക്കിയോ എന്നൊക്കെ ചോദിച്ചു. ഞങ്ങള്‍ ആരേയും ഒഴിവാക്കിയിട്ടില്ല. അവര്‍ തല്‍ക്കാലം യൂട്യൂബില്‍ നിന്നും ഒരു ചെറിയ ഗ്യാപ്പ് എടുത്തിരിക്കുകയാണ്. ബാക്കി എല്ലാം അവര്‍ തന്നെ വിശദമായി നിങ്ങളോട് നേരിട്ട് പറയും. ഞങ്ങളെ തെറ്റിദ്ധരിക്കരുത് എന്നായിരുന്നു കുക്കുവും ദീപയും വീഡിയോയുടെ താഴെ കുറിച്ചത്. അവര്‍ ബിഗ് ബോസിലേക്ക് പോവുകയാണോയെന്നായിരുന്നു ഒരാള്‍ ചോദിച്ചത്. ജീവ പുതിയ ഷോ ചെയ്യുന്നുണ്ട്, അതിനാല്‍ ബിഗ് ബോസില്‍ പോവാന്‍ സാധ്യത കുറവാണ്. ഇപ്പോഴാണ് കാര്യം മനസിലായത്. തെറ്റിദ്ധാരണയും മാറിയെന്നും ആരാധകര്‍ പറഞ്ഞിരുന്നു. കാശ്മീര്‍ യാത്രയിലെ ചിത്രങ്ങള്‍ ജീവയും അപര്‍ണയും ഇന്‍സ്റ്റഗ്രാമിലൂടെ പങ്കുവെച്ചിരുന്നു.