അന്നൊരു ഫോട്ടോ എടുത്തപ്പോള്‍ സ്വപ്‌നത്തില്‍പ്പോലും ഞാന്‍ വിചാരിച്ചിട്ടില്ല ദേവിക നമ്പ്യാര്‍ എന്റെ ഭാര്യയാവുമെന്ന്! വിജയ് മാധവിന്റെ കുറിപ്പ് വൈറല്‍

കഴിഞ്ഞ വര്‍ഷം ഇതേ സമയത്തായിരുന്നു ഞങ്ങളുടെ വിവാഹനിശ്ചയം കഴിഞ്ഞതെന്ന് വിജയ് മാധവ് പറയുന്നു. ഫേസ്ബുക്കിലും ഇന്‍സ്റ്റഗ്രാമിലുമായാണ് അദ്ദേഹം എന്‍ഗേജ്‌മെന്റ് ഓര്‍മ്മകള്‍ പങ്കുവെച്ചത്.
ഞങ്ങളുടെ വിവാഹ നിശ്ചയം കഴിഞ്ഞിട്ട് ഇന്ന് ഒരു വർഷം തികഞ്ഞു, എന്റെ സുഹൃത്ത്‌ സുദീപേട്ടൻ കഴിഞ്ഞ ദിവസം അയച്ചു തന്നതാണ് ഈ ചിത്രം. 2012 ൽ ഒരു വാലെന്റൈൻസ് സ്പെഷ്യൽ ആൽബത്തിന്റെ റെക്കോർഡിങ് വേളയിൽ ഈ പടം എടുത്തപ്പോൾ സത്യമായിട്ടും സ്വപ്നത്തിൽ പോലും ഞാൻ വിചാരിച്ചിട്ടില്ല ദേവിക നമ്പ്യാർ എന്റെ ഭാര്യയായി മാറും, ഇത് എഴുതിക്കൊണ്ടിരിക്കുമ്പോൾ എന്റെ കൂടെ ഇങ്ങനെ ഉണ്ടാവുമെന്നും എന്നുമായിരുന്നു വിജയ് മാധവ് കുറിച്ചത്.
പ്രണയവിവാഹമല്ല ഞങ്ങളുടേതെന്ന് ദേവികയും വിജയും വ്യക്തമാക്കിയിരുന്നു. അഭിനയത്തില്‍ മാത്രമല്ല പാട്ടിലും കഴിവുള്ള ദേവിക സീരിയലിനായി ഒരു പാട്ട് പാടിയിരുന്നു. പരമ്പരയ്ക്കായി പാട്ട് പഠിക്കാനായി പോയപ്പോഴാണ് വിജയിനെ ആദ്യമായി കണ്ടത്. ഗുരുവായൂരമ്പലത്തില്‍ വെച്ചായിരുന്നു ഇരുവരും വിവാഹിതരായത്. വിവാഹത്തിന്റെ ചിത്രങ്ങളും വീഡിയോയുമെല്ലാം സോഷ്യല്‍മീഡിയയിലൂടെ വൈറലായിരുന്നു. യൂട്യൂബ് ചാനലിലൂടെയായും ഇരുവരും വിശേഷങ്ങള്‍ പങ്കിടാറുണ്ട്.
ഐഡിയ സ്റ്റാര്‍ സിംഗര്‍ റിയാലിറ്റി ഷോയിലൂടെയായാണ് വിജയ് മാധവ് ശ്രദ്ധിക്കപ്പെട്ടത്. പാട്ട് മാത്രമല്ല സംഗീത സംവിധാനവും തനിക്ക് പ്രിയപ്പെട്ടതാണെന്നും വിജയ് വ്യക്തമാക്കിയിരുന്നു. ആരാധികമാരൊക്കെയുണ്ടായിരുന്നുവെങ്കിലും നേരത്തെ പ്രണയമൊന്നുമില്ലായിരുന്നുവെന്ന് വിജയ് മാധവ് പറഞ്ഞിരുന്നു.
വേണമെങ്കില്‍ വിവാഹത്തില്‍ നിന്ന് പിന്‍മാറാമെന്ന് എന്‍ഗേജ്‌മെന്റ് കഴിഞ്ഞതിന് ശേഷം ദേവികയോട് വിജയ് മാധവ് പറഞ്ഞിരുന്നു. മാഷേ എന്ന് വിളിച്ചാണ് ദേവിക വിജയിനെ പരിചയപ്പെട്ടത്. വിവാഹശേഷവും അതേവിളി തുടരുകയായിരുന്നു. പെട്ടെന്ന് അത് മാറ്റാനാവില്ലെന്നും മാറ്റാന്‍ ശ്രമിക്കുന്നുണ്ടെന്നും ഇരുവരും പറഞ്ഞിരുന്നു.