കുടുംബം വലുതാകുന്നു; വിഷ്ണുവിന്റെ മടിയിൽ നിറയെ ക്യൂട്ടീസ്; വീഡിയോ പങ്കിട്ട് മീര

അങ്ങനെയാണ് മുയലുകളുടെ കുഞ്ഞുങ്ങൾക്ക് ഭക്ഷണം കൊടുക്കേണ്ടത് എന്ന ക്യാപ്ഷ്യനോടെ വീട്ടിൽ എത്തിയ പുത്തൻ അംഗങ്ങളെ പരിചയപ്പെടുത്തുകയാണ് മീര. വിഷ്ണുവിന്റെ മടിയിൽ ഇരിക്കുന്ന മുയൽകുഞ്ഞന്മാരുടെ വീഡിയോ ആണ് കുടുംബം വലുതാകുന്നു എന്ന ക്യാപ്ഷനുമായി മീര പങ്കുവച്ചത്.

അതേസമയം ഞങ്ങൾ തെറ്റിദ്ധരിച്ചുപോയി, ഇത് വല്ലാത്ത സർപ്രൈസ് ആയി പോയി ഞങ്ങൾക്ക് എന്നുള്ള കമന്റുകളും ആരാധകർ മീരയ്ക്കായി നൽകുന്നുണ്ട്.

സിവിൽ എൻജിനീയറിങ്‌ ബിരുദധാരിയായ മീര ആ പ്രൊഫഷൻ പാടെ മാറ്റിവെക്കുകയായിരുന്നു. ഒരിക്കൽ ഒരു ചാനലിൽ ജോലി ചെയ്യുന്ന സുഹൃത്തിനെ പിക്ക് ചെയ്യാൻ വേണ്ടി പോയപ്പോൾ അവിടെ വച്ച് കഥാകൃത്ത് ഉണ്ണി ആറിനെ കണ്ടു. അദ്ദേഹം ഒരു സീരിയലിലേക്ക് കഥാപാത്രത്തെ തിരയുന്ന സമയത്തായിരുന്നു ആ കൂടിക്കാഴ്ച. ശേഷം സ്‌ക്രീൻ ടെസ്റ്റ് നടന്നു. അങ്ങനെയാണ് മിനിസ്ക്രീനിലേക്കുള്ള തന്റെ രംഗപ്രവേശമെന്ന് മീര ഒരിക്കൽ മനോരമക്ക് നൽകിയ അഭിമുഖത്തിൽ പറഞ്ഞിട്ടുണ്ട്.

2020- ൽ ആണ് മീരയുടെ വിവാഹം നടക്കുന്നത്. പത്തനംതിട്ട മല്ലപ്പള്ളി സ്വദേശിയായ വിഷ്ണുവാണ് മീരയെ സ്വന്തമാക്കിയത്. താൻ ചെന്ന് കയറിയത് ഒരു കൂട്ടുകുടുംബത്തിലേക്ക് ആണ് എന്ന് മീര പറഞ്ഞിട്ടുണ്ട്. നഗരത്തിന്റെ ബഹളത്തിൽ ജീവിച്ച ഞാൻ കയറിച്ചെന്നത് തികച്ചും ഗ്രാമാന്തരീക്ഷമുള്ള പ്രദേശത്തേക്കാണ്, അത് ഒരുപാട് സന്തോഷം നൽകുന്നുണ്ട് എന്ന് മീര പറഞ്ഞിരുന്നു. മാത്രമല്ല ഗ്രാമാന്തരീക്ഷവും, ഷൂട്ടിങ് തിരക്കുകൾ ഒഴിയുമ്പോൾ നാട്ടിലേക്കുള്ള യാത്രയും കുക്കിങ്ങും ഒക്കെ മീര വ്ളോഗിൽ ഉൾപ്പെടുത്താറുണ്ട്.

മീര സിവിൽ എൻജിനീയർ കൂടി ആയതുകൊണ്ട് സ്വന്തമായി ഒരു വീട് വയ്ക്കുക എന്നതാണ് തന്റെ ഏറ്റവും വലിയ സ്വപ്നമെന്ന് മീര പറഞ്ഞിട്ടുണ്ട്. ആറ്റുകാലിൽ കുറച്ചു ഭൂമിയുണ്ട്. മൺവീടുകൾ തന്നെ ആകർഷിച്ചിട്ടുണ്ട് എന്നും അവിടെ ഒരു മൺവീട് ആഗ്രഹിക്കുന്നുവെന്നും മീര പറഞ്ഞിരുന്നു. പ്ലാൻ ഒക്കെ വരപ്പിച്ച് പണിതുടങ്ങാനിരുന്നപ്പോഴാണ് കൊറോണ വന്നത് എന്നും മീര വ്യക്തമാക്കിയിരുന്നു. വീടെന്ന സ്വപ്നം അധികം വൈകാതെ നടത്താനുള്ള ശ്രമത്തിലാണ് വിഷ്ണുവും മീരയും.