മൃദുലയുടെ സഹോദരി പാർവതിക്ക് വിവാഹം; വരൻ കുടുംബവിളക്ക് ക്യാമറാമാൻ!

പൂക്കാലം വരവായി, ഭാര്യ തുടങ്ങിയ പരമ്പരകളിലെ താരം മൃദുലയുടെ സഹോദരിയാണ് പാർവ്വതി. ഡാൻസുകാരി കൂടിയായ പാർവ്വതി ബിബിഎ ബിരുദധാരി കൂടിയാണ്. ശീതൾ ആയി മികച്ച അഭിനയം ആണ് പാർവതി കുടുംബവിളക്കിൽ കാഴ്ചവക്കുന്നത്.

കുടുംബവിളക്ക് പരമ്പരയിലെ ക്യാമറ മാൻ അരുൺ ആണ് പാർവതിയെ സ്വന്തം ആക്കിയത്. മൂന്നുമാസത്തെ പ്രണയമാണ് വിവാഹത്തിൽ എത്തിയതെന്ന് പാർവതി സമയം മലയാളത്തോട് പറഞ്ഞു. അരുണിന്റെ വീട്ടിൽ നിന്നും നല്ല പിന്തുണയാണ് ലഭിക്കുന്നത് എന്നും പാർവ്വതി കൂട്ടിചേർത്തു.

പ്രണയബന്ധത്തെക്കുറിച്ചു വീട്ടുകാർക്ക് അറിവുണ്ടായിരുന്നില്ല. വിവാഹത്തിനുശേഷമാണ് എല്ലാവരും അറിഞ്ഞതെന്നും വളരെ പെട്ടെന്ന് നടന്ന ചടങ്ങ് ആയിരുന്നതായും പാർവതി പറഞ്ഞു. പാലോട് വന ദുർഗ്ഗ ക്ഷേത്രത്തിൽ വച്ചായിരുന്നു വിവാഹ ചടങ്ങുകൾ എന്നും താരം പറഞ്ഞു.

തന്റെ ആദ്യ സീരിയൽ ആണ് കുടുംബവിളക്ക്. ഇനി ആ പരമ്പരയിൽ തുടരുമോ എന്ന കാര്യത്തിൽ തീരുമാനം ആയിട്ടില്ല. അതേ പരമ്പരയിലെ ക്യാമറ മാൻ ആണ് അരുൺ. അവിടെ വച്ചാണ് പരിചയപ്പെടുന്നതും പ്രണയത്തിൽ ആകുന്നതും എന്നും പാർവതി പറയുന്നു.