അന്ന് ഈ ഫോട്ടോ എടുക്കുമ്പോള്‍ കരുതിയില്ല, ജീവിതം മുഴുവന്‍ ചേര്‍ന്ന് നില്‍ക്കാന്‍ പോകുന്ന ആളാണ് എന്ന്; ഡിസംബര്‍ 3ന്റെ പ്രത്യേകതയെ കുറിച്ച് റാണി

ഒരിടവേളയ്ക്ക് ശേഷം ടെലിവിഷന്‍ ലോകത്ത് സജീവമായിരിയ്ക്കുകയാണ് ശരണ്‍. കൈയ്യ് എത്തും ദൂരത്ത് എന്ന സീരിയലില്‍ ശരണ്‍ ശക്തമായ വേഷം ചെയ്യുമ്പോള്‍ ഭാര്യ റാണി ശരണ്‍ സിനിമകളില്‍ സഹതാര വേഷങ്ങളിലും സജീവമാവുകയാണ്. ഇപ്പോഴിതാ തങ്ങളുടെ ജീവിതത്തിലെ ഏറ്റവും പ്രധാനപ്പെട്ട ഒരു ദിവസത്തെ കുറിച്ച് പറഞ്ഞുകൊണ്ട് എത്തിയിരിയ്ക്കുകയാണ് റാണി.

ഡിസംബര്‍ 3 എന്ന ദിവസത്തിന്റെ പ്രത്യേകതയെ കുറിച്ചാണ് റാണിയുടെ പോസ്റ്റ്. ഒരു ഡിസംബര്‍ 3 ന് ആയിരുന്നു റാണിയുടെയും ശരണിന്റെയും വിവാഹ നിശ്ചയം. ആദ്യമായി ശരണിനെ കണ്ടപ്പോള്‍ എടുത്ത ഫോട്ടോയ്‌ക്കൊപ്പമാണ് ഈ ദിവസത്തിന്റെ പ്രത്യേകതയെ കുറിച്ച് താരപത്‌നി ഇന്‍സ്റ്റഗ്രാമില്‍ കുറിച്ചത്.

'ഈ ഫോട്ടോ 2000 നവംബര്‍ 10 ആം തിയ്യതി എടുത്തത് ആണ്. ഞാന്‍ ചെയര്‍പേഴ്‌സണ്‍ ആയ വര്‍ഷം ഏട്ടന്‍ കോളജില്‍ ആര്‍ട്‌സ് ഡേ ഉദ്ഘാടനത്തിന് വന്ന ദിവസം. അന്ന് ഒരുപാട് ഫോട്ടോകള്‍ക്കൊപ്പം ഇങ്ങനെ ഒരു ഫോട്ടോ എടുക്കുമ്പോള്‍ അറിയില്ലായിരുന്നു എന്നും ജീവിതത്തില്‍ ചേര്‍ന്ന് നില്‍ക്കേണ്ട ആള്‍ ആയി മാറും ഈ ചുവപ്പ് ഷര്‍ട്ടുകാരന്‍ എന്ന്.

ഇന്ന് ഒരു ഡിംസംബര്‍ 3. 2003 ഡിസംബര്‍ 3 ന് ആണ് ഇരു വീട്ടുകാരും ഞങ്ങള്‍ ഒരുമിച്ചെന്ന തീരുമാനത്തെ ഔദ്യോഗികമായി ഉറപ്പിച്ചത്. ഡിസംബര്‍ 3 വിവാഹ നിശ്ചയ ദിവസം ഈ രണ്ട് പേര്‍ എനിക്ക് സ്‌നേഹത്തിന്റെ രണ്ട് അറ്റവും അര്‍ത്ഥവും ആണ്..'- റാണി സരണ്‍ കുറിച്ചു. അപര്‍ണ രാജീവ്, രശ്മി സോമന്‍ തുടങ്ങിയവര്‍ എല്ലാം ചിത്രത്തിന് താഴെ കമന്റുമായി എത്തിയിട്ടുണ്ട്.