ഡിസ്ചാര്‍ജ് ചെയ്ത് വീട്ടിലെത്തി! ഇനി രണ്ട് മാസം റെസ്റ്റ്! ആരോഗ്യാവസ്ഥയെക്കുറിച്ച് രഞ്ജിത്ത് രാജ്‌

ടെലിവിഷന്‍ പ്രേക്ഷകര്‍ക്ക് പ്രിയങ്കരനായ താരമാണ് രഞ്ജിത്ത് രാജ്. നായകനും വില്ലനുമൊക്കെയായി തിളങ്ങിയ രഞ്ജിത്ത് സോഷ്യല്‍മീഡിയയിലും സജീവമാണ്. കരിയറിലെയും ജീവിതത്തിലെയും വിശേഷങ്ങളെല്ലാം അദ്ദേഹം പങ്കിടാറുണ്ട്. അഭിനേത്രിയായ ഉഷയുടെ മകനാണ് രഞ്ജിത്ത്. അമ്മയ്ക്ക് പിന്നാലെയായാണ് മകനും അഭിനയത്തില്‍ സജീവമായത്. ഓട്ടോഗ്രാഫ് പരമ്പരയില്‍ ജെയിംസ് എന്ന കഥാപാത്രത്തെ അവതരിപ്പിച്ചത് രഞ്ജിത്തായിരുന്നു. ഗംഭീര സ്വീകാര്യതയായിരുന്നു സീരിയലിന് ലഭിച്ചത്. ജെയിംസളിയന്‍ എന്നായിരുന്നു ആരാധകരും രഞ്ജിത്തിനെ വിളിച്ചിരുന്നത്. ഇടയ്ക്ക് അഭിനയത്തില്‍ നിന്നും മാറി നിന്നെങ്കിലും മികച്ച തിരിച്ചുവരവായിരുന്നു അദ്ദേഹം നടത്തിയത്. ഓട്ടോഗ്രാഫിനെ വെല്ലുന്ന തരത്തിലുള്ള ക്യാരക്ടര്‍ പിന്നീടൊരിക്കലും എനിക്ക് കിട്ടിയില്ല. നെഗറ്റീവ് ക്യാരക്ടര്‍ ചെയ്തത് കൊണ്ട് കുറേക്കാലം അങ്ങനെയുള്ള ക്യാരക്ടറുകളായിരുന്നു ലഭിച്ചത്. അഭിനയപ്രാധാന്യമുള്ള ക്യാരക്ടറാണെങ്കില്‍ നെഗറ്റീവ് ചെയ്യാനും മടിയില്ലെന്നും മുന്‍പ് രഞ്ജിത്ത് വ്യക്തമാക്കിയിരുന്നു.
വിദേശത്താണ് രഞ്ജിത്തിന്റെ ഭാര്യ. മകള്‍ക്കൊപ്പമുള്ള വീഡിയോയുമായും നടന്‍ എത്താറുണ്ട്. 2017 ലായിരുന്നു രഞ്ജിത്തും ധന്യയും വിവാഹിതരായത്. അയര്‍ലണ്ടില്‍ നഴ്‌സാണ് ധന്യ. ഫേസ്ബുക്കിലൂടെയായി ചാറ്റ് ചെയ്തായിരുന്നു രഞ്ജിത്തും ധന്യയും പ്രണയത്തിലായത്. പ്രണയത്തെക്കുറിച്ചും വിവാഹത്തെക്കുറിച്ചുമൊക്കെയുള്ള രഞ്ജിത്തിന്റെ വാക്കുകള്‍ വൈറലായിരുന്നു.
രഞ്ജിത്ത് ആശുപത്രിയിലാണെന്ന തരത്തിലുള്ള വാര്‍ത്തകള്‍ കഴിഞ്ഞ ദിവസം വൈറലായിരുന്നു. ആശുപത്രിയില്‍ നിന്നുള്ള ചിത്രങ്ങളും പ്രചരിച്ചിരുന്നു. പ്രിയ നടന് എന്താണ് പറ്റിയതെന്ന തരത്തിലുള്ള ചര്‍ച്ചകളും സോഷ്യല്‍മീഡിയയില്‍ അരങ്ങേറിയിരുന്നു. ഇപ്പോഴിതാ രഞ്ജിത്ത് തന്നെ തന്റെ ആരോഗ്യത്തെക്കുറിച്ച് പറഞ്ഞെത്തിയിരിക്കുകയാണ്. ഇന്‍സ്റ്റഗ്രാം സ്റ്റോറിയിലൂടെയായാണ് അദ്ദേഹം ഇതേക്കുറിച്ച് പ്രതികരിച്ചത്. ഡിസ്ചാര്‍ജ് ചെയ്ത് വീട്ടിലെത്തി, ഇനി രണ്ട് മാസം വിശ്രമം എന്നായിരുന്നു അദ്ദേഹം കുറിച്ചത്.