മത്തി സുകുവിന്റെ വില്ലത്തിയായ മകള്‍! വേണിയായി തിളങ്ങിയ സോനു സതീഷ് ഇപ്പോള്‍ മറ്റൊരു യാത്രയിലാണ്! അജയിന്റെ പിന്തുണയോടെ ലക്ഷ്യം പൂര്‍ത്തിയാക്കാനൊരുങ്ങി നടി!

സോനുവിനെക്കുറിച്ച് പറയുമ്പോള്‍ പ്രേക്ഷക മനസ്സിലേക്ക് ആദ്യമെത്തുന്നത് മത്തി സുകുവിന്റെ മകളായ വേണിയാണ്. സ്ത്രീധനമെന്ന പരമ്പരയിലെ കഥാപാത്രത്തിന്റെ പേരിലാണ് സോനു ഇന്നും അറിയപ്പെടുന്നത്. വില്ലത്തരവും മണ്ടത്തരവുമൊക്കെയായി വേണിയായി മികച്ച പ്രകടനമായിരുന്നു നടി പുറത്തെടുത്തത്. ആയിരം പിന്നിട്ട് സ്ത്രീധനം കുതിച്ചപ്പോള്‍ സോനുവിനും അത് ഗുണകരമായി മാറുകയായിരുന്നു. കുടുംബ പ്രേക്ഷകരെയാകെ കൈയ്യിലെടുത്തായിരുന്നു നടി നീങ്ങിയത്.

കുഞ്ഞുന്നാള്‍ മുതലേ കലാരംഗത്ത് സജീവമായിരുന്നു സോനു. ചെറുപ്പത്തിലെ നൃത്തം അഭ്യസിക്കുന്നുണ്ടായിരുന്നു. കലാതിലകം നേടി സ്‌കൂളിന്റെ അഭിമാനമായി മാറിയതിനെക്കുറിച്ച് മുന്‍പ് താരം തന്നെ തുറന്നുപറഞ്ഞിരുന്നു. അഭിനയവും നൃത്തവും മാത്രമല്ല പഠനത്തിലും മിടുമിടുക്കിയായിരുന്നു സോനു. 9ാം ക്ലാസില്‍ പഠിക്കുമ്പോഴായിരുന്നു വാല്‍ക്കണ്ണാടിയുടെ അവതാരകയായത്. സൂപ്പര്‍ ഡാന്‍സില്‍ പങ്കെടുത്തതോടെയാണ് മാധവത്തിലേക്ക് അവസരം ലഭിച്ചത്.

ഭരതനാട്യം, കുച്ചിപ്പുഡി, നാടോടിനൃത്തം തുടങ്ങി ഡാന്‍സില്‍ അസാമാന്യ വൈഭവമുണ്ട് സോനുവിന്. അഭിനയത്തിനൊപ്പം തന്നെ നൃത്തവും കൂടെക്കൂട്ടിയിട്ടുണ്ട്. തിരക്കുകള്‍ക്കിടയിലും നൃത്ത പരിശീലനം മറക്കാറില്ല. കുച്ചിപ്പുഡിയില്‍ ഡോക്ടറേറ്റ് എടുക്കാനുള്ള തയ്യാറെടുപ്പിലാണ് താനെന്ന് സോനു നേരത്തെ പറഞ്ഞിരുന്നു.

ഭാര്യയെന്ന പരമ്പരയില്‍ അഭിനയിച്ച് വരുന്നതിനിടയിലായിരുന്നു സോനു വിവാഹിതയായത്. ആന്ധ്ര സ്വദേശിയായ അജയ് യാണ് താരത്തെ ജീവിതസഖിയാക്കിയത്. പ്രണയവിവാഹമായിരുന്നു ഇവരുടേത്. ഇരുവീട്ടുകാരും ചേര്‍ന്നായിരുന്നു വിവാഹം നടത്തിയത്. ബാംഗ്ലൂരില്‍ ഐടി എഞ്ചിനീയറായി ജോലി ചെയ്തുവരികയാണ് അജയ്.

മകളെ ഡോക്ടറാക്കണമെന്നായിരുന്നു സോനുവിന്റെ അമ്മ ആഗ്രഹിച്ചത്. മെഡിസിന്‍ കിട്ടാതെ വന്നതോടെയാണ് ആര്‍ട്‌സ് എടുത്തത്. ലിറ്ററേച്ചറിലും കുച്ചിപ്പുഡിയയിലും പിജി എടുത്ത സോനുവിന് ജെആര്‍എഫും ലഭിച്ചിട്ടുണ്ട്. ഡോക്ടറേറ്റെടുത്ത് ഡോക്ടറാവാനുള്ള ശ്രമത്തിലാണ് താനെന്ന് സോനു വ്യക്തമാക്കിയിരുന്നു.