സീരിയൽ ഷൂട്ടിങ്ങുകൾ മുടങ്ങിയാലെന്താ ഞങ്ങൾക്ക് സിനിമയുണ്ടല്ലോ എന്ന ആശ്വാസത്തിലാണ്‌ ടെലിവിഷൻ പ്രേക്ഷകർ എന്ന് തോനുന്നു. ഇക്കഴിഞ്ഞ ടിആർപി റേറ്റിംഗ് പ്രകാരം വീണ്ടും ഒന്നാം സ്ഥാനം ഒരു സിനിമാക്കാണ്. മോഹൻലാലിന്റെ ദൃശ്യം 2 വിനു ശേഷം ഇപ്പോൾ റേറ്റിംഗ് ചാർട്ട് കീഴടക്കിയിരിക്കുന്നത് മെഗാ സ്റ്റാറിന്റെ ഹൊറർ ത്രില്ലർ 'ദി പ്രീസ്റ്റ്' ആണ്. ജൂൺ നാലാം തീയതി ആയിരുന്നു ഈ ചിത്രത്തിന്റെ വേൾഡ് ടെലിവിഷൻ പ്രീമിയർ.
ഇത്തവണ രണ്ടാം സ്ഥാനം കുടുംബവിളക്കിനാണ്. സിദ്ധാർഥും വേദികയും തമ്മിലുള്ള സ്വരച്ചേർച്ചകളിലൂടെയാണ് ഇപ്പോൾ സീരിയൽ കടന്നു പോകുന്നത്. മീര വാസുദേവ്, കെ കെ മേനോൻ, അമൃത നായർ, ശരണ്യ ആനന്ദ് എന്നിവരാണ് ഈ പരമ്പരയിൽ മുഖ്യ വേഷത്തിൽ എത്തുന്നത്.
മൂന്നാം സ്ഥാനത്തു അമ്മയറിയാതെ ആണ്. ഇക്കഴിഞ്ഞ ആഴ്ചയാണ് സീരിയലിലേക്ക് അമ്പാടിയായി നടൻ നിഖിൽ നായർ തിരിച്ചുവരും എന്ന് ഔദ്യോഗിക പ്രഖ്യാപനം ഉണ്ടായത്.
സൂരജിന്റെ പിന്മാറ്റം പാടാത്ത പൈങ്കിളിയെ അത്രയ്ക്ക് ബാധിച്ചിട്ടില്ല എന്നാണ് ടിആർപി റിപ്പോർട്ടുകൾ സൂചിപ്പിക്കുന്നത്. ഈ ആഴ്ചയും നാലാം സ്ഥാനത്തു തന്നെയാണ് സീരിയൽ. ദേവ എന്ന കഥാപാത്രം അവതരിപ്പിച്ചിരുന്ന സൂരജ് സീരിയലിൽ നിന്ന് ഈയിടെ പിന്മാറുകയും പുതുമുഖ നടൻ ലക്ജിത് ദേവയായി എത്തുകയും ചെയ്തിരുന്നു സീരിയലിൽ.
നലീഫ് - ഐശ്വര്യ റംസായി എന്നിവർ മുഖ്യവേഷത്തിൽ എത്തുന്ന മൗനരാഗമാണ് ഇത്തവണ അഞ്ചാം സ്ഥാനത്തു. കഴിഞ്ഞ ആഴ്ചത്തെ റേറ്റിംഗിൽ ഈ സ്ഥാനത്തു ഉണ്ടായിരുന്ന കൂടെവിടെ ടോപ് 5 വിൽ നിന്ന് പുറത്തായിട്ടുണ്ട്.