വീണ്ടും സജീവം
രാജസ്ഥാന്‍ സ്വദേശിയായിരുന്നു ജൂഹിയുടെ പിതാവ്. റുസ്തഗി എന്നത് അച്ഛന്റെ സംഭാവനയാണ്. തൃപ്പൂണിത്തുറ സ്വദേശിനിയായിരുന്നു ജൂഹിയുടെ അമ്മ. പപ്പ കൂടെയില്ലാത്തതിനാല്‍ അമ്മയാണ് ലൊക്കേഷനില്‍ തനിക്ക് കൂട്ടുവരുന്നതെന്ന് ജൂഹി പറഞ്ഞിരുന്നു. അടുത്തിടെയായിരുന്നു അമ്മയുടെ വിയോഗം. മകനൊപ്പം ബൈക്കില്‍ സഞ്ചരിക്കവെയായിരുന്നു അപകടം സംഭവിച്ചത്. പപ്പയ്ക്ക് പിന്നാലെ അമ്മയും പോയതോടെ ജൂഹിയും ചിരാഗും തനിച്ചാവുകയായിരുന്നു. എല്ലാം അമ്മയ്ക്ക് അറിയാവുന്നതല്ലേ, എനിക്കിനി ആരാണുള്ളതെന്നായിരുന്നു ജൂഹി ചോദിച്ചത്. ജൂഹിയുടെ സങ്കടം ആരാധകരേയും വേദനിപ്പിച്ചിരുന്നു. നാളുകള്‍ക്ക് ശേഷം ജോലിയില്‍ സജീവമായിരിക്കുകയാണ് ജൂഹി.
ചിരിച്ച മുഖം
സാരിയണിഞ്ഞ് ചിരിച്ച മുഖത്തോടെയായിരുന്നു ജൂഹി ചിത്രങ്ങള്‍ക്ക് പോസ് ചെയ്തത്. ഈ ചിരിയാണ് ഞങ്ങള്‍ കാണാനാഗ്രഹിച്ചതെന്നായിരുന്നു ആരാധകര്‍ പറഞ്ഞത്. ദസറയെന്ന ക്യാപ്ഷനോടെ പങ്കിട്ട ചിത്രം ക്ഷണനേരം കൊണ്ടാണ് വൈറലായി മാറിയത്. ആരാധകര്‍ മാത്രമല്ല താരങ്ങളും കമന്റുകളുമായെത്തിയിട്ടുണ്ട്. മോഡേണ്‍ വേഷങ്ങള്‍ മാത്രമല്ല നാടന്‍ ലുക്കിലുള്ള ചിത്രങ്ങളും ജൂഹി ഇന്‍സ്റ്റഗ്രാമില്‍ പോസ്റ്റ് ചെയ്യാറുണ്ട്.
അമ്മയെക്കുറിച്ച്
ചെറുപ്രായത്തില്‍ തന്നെ പപ്പയെ നഷ്ടമായതിനാല്‍ അമ്മയായിരുന്നു എല്ലാം. ദൂരെയുള്ള ലൊക്കേഷനിലേക്ക് കൂട്ടുവന്നത് ചേട്ടനായിരുന്നു. അമ്മയുമായി ഏറെ അടുപ്പമുണ്ടായിരുന്നു ജൂഹിക്ക്. മകളുടെ വിവാഹവും മകന്റെ ജോലിയുമൊക്കെയായിരുന്നു ഭാഗ്യലക്ഷ്മി രഘുവീറും സ്വപ്‌നം കണ്ടത്. ഡോക്ടര്‍ റോവിനുമായി പ്രണയത്തിലാണ് ജൂഹി. ഒരു ആല്‍ബം ചിത്രീകരണത്തിനിടയിലായിരുന്നു ഇരുവരും ആദ്യമായി കണ്ടത്. പെട്ടെന്ന് തന്നെ അടുത്ത സുഹൃത്തുക്കളുമായി മാറിയ ഇരുവരും പ്രണയത്തിലാവുകയായിരുന്നു. റോവിനൊപ്പമുള്ള ചിത്രങ്ങള്‍ നേരത്തെ ജൂഹി പങ്കിട്ടിരുന്നു.
ആഗ്രഹിച്ച വരവ്
ഉപ്പും മുളകും അവസാനിപ്പിച്ചുവെങ്കിലും താരങ്ങളോടുള്ള ഇഷ്ടം ഇപ്പോഴും അതേ പോലെയുണ്ടെന്നാണ് ആരാധകര്‍ പറയുന്നത്. ഇടയ്ക്ക് എരിവും പുളിയിലൂടെ ഉപ്പും മുളകും താരങ്ങള്‍ ഒന്നിച്ചെത്തിയിരുന്നു. പാറുക്കുട്ടിയും മുടിയനും കേശുവും ശിവയും ലച്ചുവും ബാലുവും നീലുവും ഒരുമിച്ചുള്ള ചിത്രീകരണ വീഡിയോ അടുത്തിടെ വൈറലായി മാറിയിരുന്നു. ഉപ്പും മുളകും തിരിച്ചെത്തുകയാണോയെന്നായിരുന്നു ആരാധകരുടെ ചോദ്യങ്ങള്‍. താരങ്ങള്‍ ഒന്നിച്ചുള്ള ചിത്രങ്ങളും വീഡിയോയും വൈറലായതോടെ ആരാധകരും ആ സന്തോഷവാര്‍ത്ത കാത്തിരിക്കുകയാണ്.