അനിരുദ്ധ് അല്ല ആനന്ദ്
കുടുംബവിളക്കില്‍ അനിരുദ്ധ് എന്ന കഥാപാത്രം നെഗറ്റീവ് ഷേഡുള്ള സമയത്ത് പുറത്ത് പോകുമ്പോള്‍ അമ്മമാരും അമ്മൂമ്മാരും എല്ലാം തൊഴുത് പ്രാകുമായിരുന്നു. അമ്മയെ ഒരുപാട് വെറുക്കുന്ന മകനായിരുന്നു അനിരുദ്ധന്‍. പക്ഷെ യഥാര്‍ത്ഥ ജീവിതത്തില്‍ ഒരിക്കലും അമ്മയോട് അങ്ങനെയൊന്നും സംസാരിക്കാത്ത ആളാണ് ഞാന്‍. വളരെ സങ്കടത്തോടെയാണ് അത്തരം രംഗങ്ങള്‍ എല്ലാം ചെയ്തിരുന്നത്. ആനന്ദും അനിരുദ്ധുമായി യാതൊരു ബന്ധവും ഇല്ല.
ആദ്യത്തെ അനുഭവം
അഭിനയിക്കണം എന്ന മോഹവുമായിട്ട് തന്നെയാണ് ഞാന്‍ ആങ്കറിങ് ഫീല്‍ഡിലേക്ക് വരുന്നത്. ആ സമയത്ത് ഒരുപാട് പ്രൊഡക്ഷന്‍ കണ്‍ട്രോളറെയും സംവിധായകരെയും എല്ലാം പോയി കാണുമായിരുന്നു. അങ്ങനെ ഒരു സംവിധായകന്റെ മുന്നിലെത്തി. ഒരുപാട് നാളായി കേള്‍ക്കാന്‍ ആഗ്രഹിച്ച 'സ്റ്റാര്‍ട്ട് ക്യാമറ ആക്ഷന്‍' കേട്ടു. ഉടനെ കട്ട് പറഞ്ഞു, അഭിനയിക്കാന്‍ അറിയില്ല എന്ന് പറഞ്ഞ് തിരിച്ചയച്ചു.
ഇറക്കിവിട്ടു
ഒരു സീരിയലില്‍ അഭിനയിക്കാന്‍ ചെന്നപ്പോഴായിരുന്നു ആ അനുഭവം. രണ്ട് മൂന്ന് തവണ അദ്ദേഹം ശ്രമിച്ചു. പക്ഷെ സാധിച്ചില്ല. നിന്റെ മുഖത്ത് എക്‌സ്പ്രഷനൊന്നും വരില്ല, നിനക്ക് അഭിനിയക്കാന്‍ അറിയില്ല എന്ന് പറഞ്ഞ് അദ്ദേഹം പാക്കപ്പ് വിളിച്ച്, എന്നെ പറഞ്ഞുവിടുകയായിരുന്നു. വളരെ വിഷമത്തോടെയാണ് അന്ന് ഞാന്‍ അവിടെ നിന്നും ഇറങ്ങിയത്.
അന്ന് എടുത്ത തീരുമാനം
അന്ന് വീട്ടിലെത്തി അമ്മയോടും അമ്മൂമ്മയോടും, ഷൂട്ട് ചെയ്തിട്ടുണ്ട് അവര്‍ക്ക് ഇഷ്ടമാണെങ്കില്‍ ടെലികാസ്റ്റ് ചെയ്യും എന്ന് കള്ളം പറഞ്ഞു. പക്ഷെ ഭാര്യയോട് സത്യങ്ങള്‍ തുറന്ന് പറഞ്ഞു. വല്ലാത്ത ഒരു അവസ്ഥയായിരുന്നു അത്. അത്രയധികം ആളുകളുടെ മുന്നില്‍ വച്ച് 'നിനക്ക് അഭിനയിക്കാന്‍ അറിയില്ല' എന്ന് പറഞ്ഞ് ഇറക്കി വിട്ടത് സഹിക്കാന്‍ പറ്റാത്ത സങ്കടമായി. പക്ഷെ ഭാര്യ എനിക്ക് ആശ്വാസം തന്നു. സാരമില്ല, നമുക്കൊരു ഷോര്‍ട്ട് ഫിലിം എങ്കിലും ചെയ്യാം എന്ന് പറഞ്ഞപ്പോഴാണ്, ഓകെ നമുക്ക് ഇനിയും അവസരങ്ങളുണ്ട് എന്ന് മനസ്സിലാവുന്നത്. അന്ന് തീരുമാനിച്ചതാണ് നടനാവണം എന്ന്.
ദൈവത്തിന്റെ അനുഗ്രഹം
എന്നെക്കാള്‍ കഴിവും സൗന്ദര്യവും ഉള്ള ഒരുപാട് പേരുണ്ട്. പക്ഷെ അവരില്‍ നിന്ന് നമുക്ക് സ്വപ്രയത്‌നം കൊണ്ട്, ഇന്ന് ഒരു പ്രൈം ചാനലിലെ ടോപ് സീരിയല്‍ ചെയ്യാന്‍ പറ്റുന്നുണ്ട് എങ്കില്‍ അത് ദൈവാനുഗ്രഹം തന്നെയാണ്. അല്ലാതെ ഞാന്‍ വലിയ സംഭവം ആയത് കൊണ്ടല്ല. ആദ്യമായി സീരിയല്‍ ചെയ്ത്, അത് ടെലിക്കാസ്റ്റ് ചെയ്ത ദിവസം അച്ഛന് പറഞ്ഞതാണ്, എത്ര ഉയരങ്ങളില്‍ പോയാലും സഹജീവികളോടുള്ള പെരുമാറ്റത്തില്‍ മാറ്റമുണ്ടാവരുത് എന്ന്. അന്ന് അച്ഛന് കൊടുത്ത വാക്ക് ഇന്നും പാലിക്കാന്‍ ഞാന്‍ ശ്രദ്ധിക്കാറുണ്ട്- ആനന്ദ് നാരായണന് പറഞ്ഞു