എന്റെ ആദ്യത്തെ കുഞ്ഞ്! നിന്നെ ഓര്‍ക്കാത്ത ഒരുനിമിഷം ജീവിതത്തിലില്ല! മോനുക്കുട്ടനെക്കുറിച്ച് ലിന്റു റോണി

സ്വര്‍ഗത്തില്‍ നിന്ന് അവനിപ്പോള്‍ പിറന്നാള്‍ ആഘോഷിക്കുന്നുണ്ടാവും. ഞങ്ങളെയൊക്കെ നീ കാണുന്നുണ്ടാവുമെന്നാണ് കരുതുന്നത്. ഞങ്ങള്‍ നിന്നെ എത്രത്തോളം സ്‌നേഹിക്കുന്നുണ്ടെന്നും മിസ് ചെയ്യുന്നുണ്ടെന്നും മനസിലാവുമെന്ന് കരുതുന്നു. എന്നും എന്റെ ആദ്യത്തെ കുട്ടി നീയാണ്. നിന്നെക്കുറിച്ച് ചിന്തിക്കാത്ത ഒരൊറ്റ ദിവസവും എന്റെ ജീവിതത്തില്‍ ഇല്ലെന്നുമായിരുന്നു ലിന്റു ഫേസ്ബുക്കില്‍ കുറിച്ചത്. മോനുക്കുട്ടനൊപ്പമുള്ള ഫോട്ടോയും പങ്കുവെച്ചിരുന്നു.

ഒരുകാലത്ത് ഞങ്ങളുടെ കുടുംബത്തിലെ ഏക ആണ്‍തരിയായിരുന്നു മോനുക്കുട്ടന്‍. ഇപ്പോള്‍ കൊച്ചുമക്കളില്‍ രണ്ട് ആണ്‍കുട്ടികളുണ്ട്. മോനുക്കുട്ടന് വേണ്ടി ജോലിയൊക്കെ മാറ്റിവെച്ചിരുന്നു മമ്മി. അവനെ കൊണ്ടുപോയി വല്ല സ്‌കൂളിലും ആക്കൂ എന്നൊക്കെ പലരും പറഞ്ഞിട്ടുണ്ട്. അതൊന്നും ചെയ്യാതെ അവനെ 27 വര്‍ഷം നന്നായി നോക്കിയിരുന്നു മമ്മിയും പപ്പയും. ജീവിതത്തില്‍ ഞങ്ങളേറ്റവും കൂടുതല്‍ മിസ് ചെയ്യുന്നത് മോനുക്കുട്ടനെയാണ്. ഞങ്ങളുടെ എല്ലാവരുടെയും ഫസ്റ്റ് ബേബി അവനായിരുന്നു.

27 വര്‍ഷക്കാലം ഞങ്ങളെല്ലാം അവനെ നോക്കി. ഇപ്പോള്‍ അവന്‍ സേഫാണെന്നാണ് വിശ്വസിക്കുന്നത്. എന്റെയും അക്കയുടെയും കല്യാണത്തിനെല്ലാം അവനുണ്ടായിരുന്നു. കൂടുതല്‍ കഷ്ടപ്പെടുത്തണ്ടെന്ന് തോന്നിയത് കൊണ്ടായിരിക്കണം ദൈവം അവനെ നേരത്തെ വിളിച്ചതെന്നായിരുന്നു മുന്‍പ് ലിന്റു പറഞ്ഞത്. അവനെക്കുറിച്ച് പറയുമ്പോള്‍ ഇമോഷണലായിപ്പോവുമെന്നും മുന്‍പൊരു വീഡിയോയില്‍ ലിന്റു പറഞ്ഞിരുന്നു.

മോനുക്കുട്ടന്‍ സ്‌പെഷല്‍ കിഡായിരുന്നു. സംസാരിക്കാനൊന്നും കഴിയുമായിരുന്നില്ല. ഒരു ദിവസം ഉറക്കത്തിനിടയില്‍ അവന്‍ ഞങ്ങളെ വിട്ട് പോവുകയായിരുന്നു. അവന് വയ്യാത്തതിനാല്‍ കാര്യങ്ങളെല്ലാം ഞങ്ങള്‍ കൃത്യമായി ചെയ്ത് കൊടുക്കുമായിരുന്നു. യാതൊരുവിധ കുറവും അറിയിക്കാതെയാണ് ഞങ്ങള്‍ അവനെ നോക്കിയത്. അവന്റെ വരവോടെയാണ് മമ്മി ജോലി ഉപേക്ഷിച്ച് മുഴുവന്‍ സമയവും അവനൊപ്പം നില്‍ക്കുകയായിരുന്നു. കുഞ്ഞുങ്ങളെ പരിചരിക്കുന്ന പോലെയാണ് ഞങ്ങളെല്ലാം അവന്റെ കാര്യങ്ങള്‍ നോക്കിയതെന്നും ലിന്റു വ്യക്തമാക്കിയിരുന്നു.