ഡി ജൂനിയർ വേദിയിലേക്ക് വരുന്നതിനുമുമ്പ് ബിജുമേനോനോട് സംയുക്ത വർമ്മ പറഞ്ഞത്!

മലയാളം സിനിമാ മേഖലയിൽ ബിജു എത്തിയിട്ട് 25 വർഷങ്ങൾ തികയുകയാണ് ഇപ്പോൾ. സഹനായകനില്‍ത്തുടങ്ങി പിന്നീട് നായകനിരയിലേക്ക് മാറിയ താരത്തിന്റെ ശബ്ദ ഗാംഭീര്യം എടുത്തു പറയേണ്ടതാണ്. മലയാളത്തിന്റെ പ്രിയ നായികയെ വിവാഹം കൂടി കഴിച്ചതോടെ ബിജുവിനോടുള്ള മലയാളികളുടെ ആരാധന ഇരട്ടിച്ചു.

സിനിമാ തിരക്കുകൾക്കിടയിലും താരം ടെലിവിഷൻ പരിപാടികളിൽ പങ്കെടുക്കാനുള്ള സമയവും കണ്ടെത്താറുണ്ട്. കഴിഞ്ഞ ദിവസം ബിജു മേനോൻ ഡി 5 വേദിയിൽ എത്തിയ വീഡിയോ ഇപ്പോൾ സോഷ്യൽ മീഡിയയിൽ വൈറലാണ്.

ഡി 5 വേദിയിൽ എത്തിയപ്പോൾ, ബിജു മേനോൻ പങ്ക് വച്ച വാക്കുകളാണ് പ്രേക്ഷകരെ ആകെ ചിരിപ്പിച്ചത്. ആദ്യമായി തന്നെ ഡാൻസ് ചെയ്യിപ്പിച്ചത് പ്രസന്നൻ ആണെന്നും, പക്ഷെ ഡാൻസ് തനിക്ക് വഴങ്ങില്ലെന്ന് മനസിലായപ്പോൾ താൻ നിർത്തിവച്ചിരിക്കുകയാണെന്നും പറഞ്ഞപ്പോൾ, ഇനിയും അവസരം ഉണ്ട് ഈ വേദിയിൽ വച്ച് വീണ്ടും ആരംഭിക്കാം എന്ന് പറയുന്ന അവതാരകയോട് ഇപ്പോൾ സംയുക്ത വിളിച്ചെന്നും, വേദിയിൽ ഡാൻസ് എങ്ങാനും ചെയ്‌താൽ ഇനി വീട്ടിലേക്ക് തിരികെ വരണ്ട എന്നാണ് അവൾ എന്നോട് പറഞ്ഞത്. ബിജു ഇത് പറഞ്ഞു തീർന്നതും വേദിയിൽ ആകെ പൊട്ടിച്ചിരി ഉണർന്നു.

ജഡ്ജസ്സിൽ ഒരാളായ മിയയ്ക്ക് പേരിട്ടതിനെ പറ്റിയുള്ള കഥ അവതാരക തിരക്കിയപ്പോഴും വളരെ രസകരമായ രീതിയിലാണ് ബിജു മേനോൻ മറുപടി നൽകിയത്. മിയയ്ക്കാണ് താൻ പേര് നൽകിയതെന്നും, ആദ്യം ഏതോ സ്പോർട്സ് താരത്തിന്റെ പേരുമായിട്ടാണ് അവൾ വന്നതെന്നും, അവളുടെ മുഖവും രൂപവും ഒക്കെ വച്ച് നോക്കിയപ്പോൾ മിയ എന്ന പേര് നല്ലതാണ് എന്ന് തോന്നിയതായും ബിജു മേനോൻ പറയുന്നു.

ബിജു മേനോന്റെ പുതിയ സിനിമയായ 41 ലെ നായിക നിമിഷ സജയനും ഡി 5 ഡാൻസിലേക്ക് എത്തിയിരുന്നു. നായികനായകനിലൂടെ ശ്രദ്ധേയായി മാറിയ മാളവികയാണ് പരിപാടിയുടെ അവതാരക. സിനിമാതാരം മിയ, ഡാൻസ് മാസ്റ്റർ പ്രസന്ന, പാരീസ് ലക്ഷ്‌മി എന്നിവരാണ് ജഡ്ജസായി എത്തുന്നത്.