ഏറ്റവും നെഗറ്റീവായി കണ്ട ഉയരക്കൂടുതലാണ് എന്റെ ജീവിതം മാറ്റിമറിച്ചത്! മോഡലിംഗ് ജീവിതത്തെക്കുറിച്ച് ഋതു മന്ത്ര

മിസ് ഇന്ത്യയില്‍ കേരളത്തില്‍ നിന്നും അധികം ആളുകളൊന്നുമുണ്ടായിരുന്നില്ല. കഴിവുള്ള ആളുകള്‍ ഇവിടെയുണ്ടായിട്ടും പലര്‍ക്കും അറിയില്ലായിരുന്നു എങ്ങനെയാണ് മത്സരത്തില്‍ പങ്കെടുക്കുന്നതെന്ന്. കേരളത്തെ പ്രതിനിധീകരിക്കുന്നതിന് വേണ്ടിയാണ് പോയത്. 2018ലായിരുന്നു ഞാന്‍ മത്സരിച്ചത്. 2016 ല്‍ അപ്ലൈ ചെയ്തിരുന്നുവെങ്കിലും അത് റിജക്റ്റായിരുന്നു. 2 വര്‍ഷത്തിന് ശേഷമായാണ് പിന്നീട് അവസരം കിട്ടിയത്. ഉയരക്കൂടുതലായിരുന്നു പ്ലസ് പോയന്റായി മാറിയത്. നല്ല കഴിവും സൗന്ദര്യവും ആത്മവിശ്വാസമുള്ളവരായിരുന്നു അവിടെയുണ്ടായിരുന്നത്. ഇവിടെ നിന്ന് ഓടിയാലോ എന്നായിരുന്നു ആദ്യം തോന്നിയത്.
സൗന്ദര്യം മാത്രമല്ല ആത്മവിശ്വാസവുമുണ്ടെങ്കില്‍ മാത്രമേ ആ മത്സരത്തില്‍ വിജയിക്കാനാവൂ. അവിടെ പോയാല്‍ നമ്മുടെ ലെവലേ മാറിക്കിട്ടൂ. കേരളമെന്താണെന്ന് കാണിച്ച് കൊടുക്കണമെന്നുണ്ടായിരുന്നു. പത്രത്തിലുണ്ടായിരുന്നു ഞാന്‍ മത്സരിക്കാന്‍ പോവുന്നത്. എന്നെ അറിയാവുന്നവര്‍ക്ക് ഞാന്‍ മത്സരിക്കുന്നതിനെക്കുറിച്ച് അറിയാമായിരുന്നു. വല്യ ഹൈപ്പൊന്നുമുണ്ടായിരുന്നില്ല. മിസ് ടാലന്റഡ് സൗത്തായിരുന്നു എനിക്ക് കിട്ടിയത്.
കണ്ണൂരില്‍ നിന്നും കൊച്ചിയിലേക്ക് മാറി. കണ്ണൂരില്‍ ഒരു വീട് വെക്കണമെന്നാണ് ആഗ്രഹം. അമ്മയ്ക്കും കണ്ണൂരാണ് ഇഷ്ടം. സുഹൃത്തിനൊപ്പം ഒരു ഷോ കാണാന്‍ പോയിരുന്നു. നല്ല ഉയരമുണ്ടല്ലോ, എന്ത് നീ മോഡലിംഗ് ട്രൈ ചെയ്യാത്തതെന്നായിരുന്നു അന്ന് ഡിസൈനര്‍ ചോദിച്ചത്. അങ്ങനെയാണ് ഞാന്‍ എന്റര്‍മെന്റ് ഇന്‍ഡസ്ട്രിയിലേക്ക് എത്തിയത്. സ്‌കൂളില്‍ ഉയരം കൂടുതലാണെന്ന് പറഞ്ഞ് എല്ലാവരും കളിയാക്കും. ടീച്ചേഴ്‌സൊക്കെ പുറകില്‍ ഇരിക്കാന്‍ പറയുമായിരുന്നു. കലാമത്സരങ്ങളില്‍ പാട്ടിലായിരുന്നു എന്റെ ശ്രദ്ധ. ഇന്ന് നെഗറ്റീവായി കാണുന്ന ഒരു ഫീച്ചറായിരിക്കും നാളെ നിങ്ങള്‍ക്ക് ഗുണകരമായി മാറുക, എനിക്ക് അങ്ങനെയായിരുന്നു. പോക്കറ്റ് മണിക്ക് വേണ്ടിയായിരുന്നു ആദ്യം മോഡലിംഗ് ചെയ്തത്. മാഗസിനുകളിലെല്ലാം ഫോട്ടോ വരാന്‍ തുടങ്ങിയതോടെയാണ് കോണ്‍ഫിഡന്‍സ് കൂടിയത്. കഷ്ടപ്പെട്ടാണ് മോഡലിംഗില്‍ പിടിച്ച് നിന്നത്. അതിനിടയിലായിരുന്നു ബിഗ് ബോസിലേക്ക് ക്ഷണം ലഭിച്ചതും ജീവിതം മാറിമറിഞ്ഞതെന്നും ഋതു പറയുന്നു.