സരിഗമപയില്‍
സ രി ഗ മ പ വേദിയില്‍ ഭാവന എത്തിയത് മുതല്‍ സോഷ്യല്‍ മീഡിയയില്‍ ഷോ വേറെ ലെവലിലാണ്. ഷോയില്‍ ഭാവന 'പരമപദം' എന്ന പാട്ടിന് ചുവട് വച്ച വീഡിയോ എല്ലാം ഇതിനോടകം വൈറലായിക്കഴിഞ്ഞു. അതിനിടയിലാണ് സൂപ്പര്‍ഹിറ്റ് ആയ സിനിമയിലെ ഒരു സൂപ്പര്‍ ഹിറ്റ് ഗാനത്തിന്റെ ഷൂട്ടിങ് അനുഭവം പങ്കുവച്ച് ഭാവന എത്തിയിരിയ്ക്കുന്നു.
കറുപ്പിനഴക് ഷൂട്ടിങ് സമയം
വിയത്‌നാം, സ്വിറ്റ്‌സര്‍ലാന്റ് എന്നിവടങ്ങളിലൊക്കെയായിട്ടാണ് കറുപ്പിനഴക് എന്ന പാട്ട് ചിത്രീകരിച്ചത്. ദുബായി അല്ലാതെ ഇന്ത്യ വിട്ട് മറ്റൊരിടത്ത് പോകാത്ത എനിക്ക് അത് പുതിയ ഒരു അനുഭവം ആയിരുന്നു- ഭാവന പറഞ്ഞു തുടങ്ങി. ഞാനും മീര ചേച്ചിയും ചാക്കോച്ചന്‍ പൃഥ്വി ജയേട്ടന്‍.. ഞങ്ങളെല്ലാവരും അടിച്ച് പൊളിച്ചാണ് ഷൂട്ടിങിന് പോകുന്നത്. ഭയങ്കര എക്‌സൈറ്റ്‌മെന്റ് ആയിരുന്നു.
ആ സൈക്കില്‍ രംഗം
പൊതുവെ സാധാരണ രീതിയില്‍ നടന്നാലും വീഴുന്ന ഒരു ടൈപ്പ് ആളാണ് ഞാന്‍. ഷൂട്ടിങിന് പോയപ്പോള്‍ സൈക്കിളില്‍ ഒരു കയറ്റം ഇറങ്ങുന്ന ഭാഗമുണ്ട്. അവിടെ എന്തായാലും ഞാന്‍ വീഴും എന്ന് എനിക്ക് ഉറപ്പുള്ളത് കൊണ്ട് പരമാവധി ശ്രദ്ധിച്ച് ആണ് ഞാന്‍ സൈക്കില്‍ ചവിട്ടുന്നത്. എന്തായാലും ഞാന്‍ വീഴും എന്ന് പ്രൊഡ്യൂസറും മറ്റുമെല്ലാം ഉറപ്പിച്ചിരുന്നു.
ദേ കിടക്കുന്ന താഴെ
വീഴും എന്ന് ഉറപ്പായപ്പോള്‍ പ്രൊഡ്യൂസര്‍ അങ്കില്‍ പെട്ടന്ന് പിന്നില്‍ നിന്ന് പിടിച്ചു, ഞാന്‍ തലകുത്തി മറിഞ്ഞ് താഴെ വീണു. എന്റെ ജീന്‍സും ടോപ്പും എല്ലാം കീറി. ഞാന്‍ നടു റോഡില്‍ ഇരുന്ന് കരയുകയാണ്. കരയുകയാണെന്ന് പറഞ്ഞാല്‍ നല്ല കരച്ചില്‍. ഇപ്പോള്‍ ആണെങ്കില്‍, ഇറ്റ്‌സ് ഓകെ, കുഴപ്പമില്ല എന്നൊക്കെ പറഞ്ഞ് എഴുന്നേറ്റ് പോരുമായിരുന്നു. അന്ന് പക്ഷെ എനിക്ക് പതിനേഴ്, പതിനെട്ട് വയസ്സേയുള്ളൂ. ഇരുന്ന് കരഞ്ഞു. പോട്ടെ സാരമില്ല എന്നൊക്കെ പറഞ്ഞ് അവസാനം എന്നെ എഴുന്നേല്‍പിച്ച് കൊണ്ടുവരികയായിരുന്നു - ഭാവന പറഞ്ഞു