ബിഗ് ബോസിൽ നിന്നും ഹോട്ടൽ മുറിയിലെത്തിയപ്പോൾ ആദ്യം അറിഞ്ഞ സങ്കടവാർത്ത! നന്ദു മഹാദേവയെക്കുറിച്ച് കിടിലം ഫിറോസ്! എന്റെ നന്ദു എങ്ങും പോയിട്ടില്ലെന്ന് അമ്മ!

ഓരോ പ്രവർത്തനങ്ങൾക്കും വിളിക്കും . ആശംസകൾ ,സപ്പോർട്ട് ഒക്കെ അറിയിക്കും. ചികിത്സാ സംബന്ധമായി ഞാനും വിളിക്കും . ഇടയ്ക്കു പോയി കാണും . ഒരിക്കൽ രണ്ട് ആഗ്രഹങ്ങൾ പറഞ്ഞു എന്നോട് .1.ഇക്കാ ,എനിക്കൊരു പുസ്തകം ഇറക്കണം .2.എനിക്കൊരു സെന്റർ തുടങ്ങണം .അസുഖം ബുദ്ധിമുട്ടിപ്പിക്കുന്നവർക്കായി ഒരു കൂടാരം . രണ്ടും സാധിച്ചു കൊടുക്കാം എന്ന് ഞാൻ വാക്ക് നൽകിയിരുന്നു . ഇടക്കവനൊന്ന് ഡൗൺ ആയപ്പോ അവനെയും കൊണ്ടൊരു യാത്ര പ്ലാൻ ചെയ്തിരുന്നതാണ് .ആരോഗ്യ പ്രശ്നങ്ങൾ കാരണം അതും നീണ്ടുപോയി .

വർഷങ്ങൾക്കിപ്പുറം ബിഗ് ബോസ്സ് ഹൗസില്‍ കയറുന്നതിനു തലേന്ന് ഞാൻ വിളിച്ചു ."മോനേ ,നാളെ കയറും .ഞാനിറങ്ങുംവരെ പിടിച്ചു നിൽക്കണം .തിരിച്ചിറങ്ങി നാടെത്തിയാൽ നിന്നെ വന്നു കാണും .""ഇക്ക പോയി വായോ .ഞാനിവിടെ തന്നെ ഉണ്ടാകും !!"ആ മറുപടി കേട്ട് സമാധാനത്തോടെയാണ് ഞാൻ ഷോയിലേക്ക് കയറിയത് .ഷോ 95-ആം ദിവസത്തിൽ നിന്നപ്പോൾ ഹോട്ടൽമുറിയിൽ വന്നു കയറിയ ഉടൻ അറിഞ്ഞ വാർത്ത ചെക്കൻ പോയി എന്നതാണ്.കുറേ നേരം ഇരുന്നു കരഞ്ഞു .ഒരുപാട് നേരം വെറുതെയിരുന്ന് സ്വയം പഴിച്ചു .ഒത്തിരിയേറെ ദിവസങ്ങൾ അവൻ ഇടനെഞ്ചിൽ ഇരുന്നു സംവദിച്ചു. ഒടുവിൽ ഒന്ന് കാണാൻ പോലും പറ്റാത്തതിന്റെ വല്ലാത്ത നോവ് കുത്തിനോവിച്ചു . പ്രിയപ്പെട്ടവരൊക്കെ വിളിച്ചു പറഞ്ഞു :ഇക്ക ജയിച്ചു വരുന്നത് കാണാൻ കാത്തിരിക്കുകയായിരുന്നു അവനെന്ന്, ഒരുപാട് വേദനിച്ചിരുന്നുവെന്ന്.

വോട്ടിങ്ങിന്റെ നാളുകളിൽ മനസ്സിൽ കിടക്കുന്ന സങ്കടം ഇവിടെകുറിച്ചിട്ടാൽ അതും വോട്ട് പിടിക്കാനുള്ള തന്ത്രമാണെന്ന് പറയും എന്ന് പൂർണ ബോധ്യമുള്ളതുകൊണ്ട് ഉള്ളിൽ കൊണ്ടുനടന്നു .ലോക് ഡൗൺ കഴിഞ്ഞൊന്ന് അവിടെവരെ പോകാൻ ശ്രമിച്ചപ്പോൾ ലോക് ഡൗൺ പിന്നെയും നീട്ടി !തളം കെട്ടിക്കിടക്കുന്ന തടാകങ്ങൾക്ക് വല്ലാത്ത നോവുഭാരം തന്നെയാകും. മോനേ ,നീയില്ല എന്നല്ല .നീയേ ഉള്ളൂ ,ലക്ഷക്കണക്കിന് മലയാളികളുടെ ആത്മാവിൽ ,അതിജീവനത്തിന്റെ ഊർജബിന്ദുവായി നീയുണ്ടാകും .ലോകമുള്ള കാലം വരെ .നീയുറങ്ങുന്ന മണ്ണ് തൊട്ട് ഒരുപാടു നേരം വെറുതെയിരിക്കണം .കുറേ സങ്കടങ്ങൾ പറഞ്ഞു തീർക്കണം .പൂർത്തിയാക്കാൻ കാത്തു വച്ച നിന്റെ സ്വപ്നങ്ങളൊക്കെയും സാധ്യമാക്കിത്തരണം.

ഇടക്കെപ്പോഴോ നീ പറഞ്ഞതോർക്കുന്നു ,ഇനി ഒരു ജന്മം ഉണ്ടെങ്കിൽ നമുക്കൊക്കെ സഹോദരങ്ങളായി പിറക്കണം. ഒന്നിച്ചൊരുപാട് കാലം പൊറുക്കണം. ഒരുപാടുപേർക്കായി ജീവിച്ചു മരിക്കണം. കാത്തിരിക്കുകയാണ് ഞാനും. നിന്റെ വേദനയിലും ചിരിക്കുന്ന മുഖമാണ് എന്നെ ഒരുപാടുനാളുകൾ വഴിനടത്തിയത്. അവഹേളനത്തിന്റെ കാലത്ത് ആത്മാഭിമാനത്തെ കുത്തി നോവിച്ചവരുടെ മുന്നിൽ ചിരിച്ചു നിന്നത് നിന്നെയോർത്താണ് .നിന്റെ ചിരി ഉള്ളിൽ സൂക്ഷിച്ചുകൊണ്ടാണ്.

തീരെ വയ്യാത്ത അവസ്ഥയിൽ നമ്മളോടുവിൽ കണ്ടപ്പോൾ എന്റെ കൈ ചേർത്ത് വച്ച് നീ ഒരുപാടു നേരം സംസാരിച്ചിരുന്നു .നിഷ്കളങ്കമായ അതേ ചിരിയോടെ നീ പറഞ്ഞതൊക്കെയും നിന്റെ തിരിച്ചുവരവിനെ കുറിച്ചായിരുന്നല്ലോ. ഒന്നുകൂടി വായോ, അതേ പുഞ്ചിരി ചേർത്ത് കൈപിടിച്ച് കുറച്ചുനേരം അടുത്തിരിക്കു .ഞാൻ നിന്നെ ഉള്ളുനിറയെ ഒന്ന് കണ്ടോട്ടെയെന്നുമായിരുന്നു ഫിറോസ് കുറിച്ചത്.

ഫിറോസിന്റെ കുറിപ്പിന് കീഴിലായി കമന്റുമായി നന്ദുവിന്റെ അമ്മയും എത്തിയിരുന്നു. എന്റെ നന്ദു എങ്ങും പോയിട്ടില്ല. നിങ്ങളെ പോലെ ഉള്ളവരുടെ ഉള്ളിൽ കൂടി ആയിരക്കണക്കിന് നന്ദു മഹാദേവമാർ ഉയർന്നു വരും. എന്റെ മോനു മരണം ഇല്ല, ഒരു നിമിഷം എങ്കിൽ ഒരു നിമിഷം പുകയരുത് ജ്വലിക്കണം ആളി കത്തണം. എന്നും സ്നേഹവും ബഹുമാനവും ഫിറോസ്‌ എന്നായിരുന്നു കമന്റ്. അവനുണ്ട് .അവനേയുള്ളു ഇടനെഞ്ചിൽ ആദ്യം, അന്നുമിന്നുമെന്നുമായിരുന്നു മറുപടി. എനിക്ക് അറിയാം ഫിറോസ്‌ വിളിച്ചതും സംസാരിച്ചതും ഒക്കെ എന്നോട് പറഞ്ഞിരുന്നു. ഞങ്ങൾ ഒരുമിച്ചു ആണ് ബിഗ് ബോസ് കാണുന്ന നിങ്ങൾ കരയുന്ന കണ്ടപ്പോൾ അവൻ ആകെ വിഷമിച്ചു പോയെന്നും ലേഖ പറഞ്ഞിരുന്നു .