അച്ഛനെ ഉപേക്ഷിച്ച് ഇറങ്ങി
അച്ഛന് കള്ള് കുടിച്ച് വന്നാലുള്ള എന്റര്ടൈന്മെന്റ് ആയിരുന്നു ഞങ്ങളുടെ അമ്മ എന്നാണ് കുഞ്ചൂസും, കുഞ്ചൂസിന്റെ ടാട്ടനും പറയുന്നത്. മദ്യപിച്ച് വന്ന് എന്നും അമ്മയെ തല്ലുമായിരുന്നു. കുഞ്ഞായിരുന്ന ചേട്ടനെ എടുത്ത് എറിയുന്നതും അച്ഛന്റെ വിനോദമായിരുന്നു. കുഞ്ചൂസ് ആവുന്നതിന് മുന്പേ തന്നെ അച്ഛനെ ഉപേക്ഷിച്ച് ഇറങ്ങാന് അമ്മ ശ്രമിച്ചിരുന്നു. അന്ന് സാധിച്ചില്ല. പിന്നീട് കുഞ്ചൂസും ജനിച്ച ശേഷം, കുഞ്ചൂസിന് മൂന്ന് വയസ്സ് പ്രായമായപ്പോഴാണ് അച്ഛനോട് പറയാതെ ആ വീട് വിട്ട് മക്കളെയും കൂട്ടി അമ്മ ഇറങ്ങിയത്.
മൂന്ന് പേരും ജീവിച്ചു
നേരെ പോയത് അമ്മയുടെ തറവാട് വീട്ടിലേക്കാണ്. അവിടെ വലിയൊരു കൂട്ടു കുടുംബമാണ്. സാമ്പത്തികമായി വലിയ പിന്ബലം ഒന്നും ഇല്ല. അങ്ങനെ അമ്മയുടെ അച്ഛന് കുറച്ച് സ്ഥലം കൊടുത്ത് അവിടെ ചെറ്റ കുത്തികൊടുത്തു. പിന്നെ അമ്മയും രണ്ട് മക്കളും അവിടെയായി താമസം. പാടത്ത് പണിക്ക് പോയും, വാര്ക്ക പണിക്ക് പോയും എല്ലാം മക്കളെ പോറ്റാനുള്ള ഓട്ടത്തിലായിരുന്നു അമ്മ. അതിനയില് തിന്നാനും കുടിക്കാനും ധരിക്കാനും ഒന്നും ഇല്ലാത്ത അവസ്ഥ ഉണ്ടായിട്ടുണ്ട്. ചെറ്റയില് ബാത്രൂം സൗകര്യം പോലും ഉണ്ടായിരുന്നില്ല. വളരെ അധികം കഷ്ടപ്പെട്ടിട്ട് ആണെങ്കിലും അമ്മയും രണ്ട് മക്കളും തങ്ങളുടെ സ്നേഹം കൊണ്ട് ഒരു സ്വര്ഗ്ഗം തീര്ത്തു.
അമ്മയ്ക്ക് കാന്സര്
അത്യാവശ്യം മോശമല്ലാത്ത രീതിയില് കഥ മുന്നോട്ട് പോയിക്കൊണ്ടിരിയ്ക്കുമ്പോഴാണ് അമ്മയ്ക്ക് കാന്സര് ആണ് എന്ന് അറിയുന്നത്. വിവരം അറിഞ്ഞപ്പോള് തന്നെ മക്കളെ വിചാരിച്ച് അമ്മ പൊട്ടിക്കരയുകയായിരുന്നു. തിരുവനന്തപുരം കാന്സര് സെന്ററില് അമ്മ ചികിത്സയ്ക്ക് ആയി പോയപ്പോള് മക്കള് തറവാട്ട് വീട്ടില് നിന്നു. അവിടം കൊണ്ടും ദുരന്ത ജീവിതം തീരുന്നില്ല. അവിടെ നിന്ന് കരകയറി മുന്നോട്ട് വന്നെങ്കിലും പണിക്ക് പോകാതെ കുഞ്ഞ് മക്കളെയും കൊണ്ട് ജീവിക്കാന് കഴിയില്ലല്ലോ, അസുഖം കണക്കിലെടുക്കാതെ ജോലിക്ക് പോയതോടെ കൈ നീര് വന്ന് വീര്ത്ത് പോലെയായി. പക്ഷെ അതൊന്നും അമ്മ ബുദ്ധിമുട്ട് ആയി കണ്ടില്ല.
തീ കൊളുത്തി ആത്മഹത്യയ്ക്ക് ശ്രമിച്ചു
കാന്സറിന്റെ ചികിത്സ ഒരു ഭാഗത്ത് നടക്കുന്നു, മക്കളെ നോക്കാനും പറ്റുന്നില്ല, മാനസികമായി ഒരുപാട് തകര്ന്ന് നില്ക്കുന്ന അവസ്ഥയിലാണ് അമ്മ ആ കടുംകൈ ചെയ്തത്. മക്കള് ടിവി കാണാന് അപ്പുറത്തെ വീട്ടിലേക്ക് പോയ സമയത്ത് അമ്മ സ്വയം തീ കൊളുത്തി മരിക്കാന് ശ്രമിച്ചു. പകുതി വെന്ത അമ്മയുടെ ശരീരവുമായി മൂന്ന് മാസം മെഡിക്കല് കോളേജില് കഴിഞ്ഞ കഥയും കണ്ണീരോടെയാണ് സുചിത്രയും സുജിനും പറഞ്ഞത്. അപ്പോള് സുചിത്ര മൂന്നാം ക്ലാസില് പഠിക്കുകയായിരുന്നുവത്രെ. കൈയ്യിലുണ്ടായിരുന്ന പുസ്തകങ്ങള് മെഡിക്കല് കോളേജില് പലര്ക്കും വിറ്റ് പൈസയാക്കി അമ്മയ്ക്ക് ചായ വാങ്ങി കൊടുക്കുമായിരുന്നുവത്രെ.
ആ ഒരു കാലം
അമ്മ ആത്മഹത്യയ്ക്ക് ശ്രമിച്ചതാണ് എന്ന് മൂന്ന് വര്ഷങ്ങള്ക്ക് ശേഷമാണ് മക്കള് അറിഞ്ഞത്. പക്ഷെ ഒരിക്കലും തങ്ങളെ ഒറ്റയ്ക്ക് ആക്കി അമ്മ പോകാന് ശ്രമിച്ചു എന്ന് വിശ്വസിക്കാന് സുജിനും സുചിത്രയും തയ്യാറല്ലായിരുന്നു. അതുകൊണ്ട് ആരോടും അമ്മ ആത്മഹത്യ ചെയ്യാന് ശ്രമിച്ചതാണ് എന്ന് ഇരുവരും പറഞ്ഞിരുന്നില്ല. അപകടം പറ്റിയതാണ് എന്ന് തന്നെയാണ് പറഞ്ഞിരുന്നത്. ആ അവസ്ഥയില് സഹായിക്കാന് ആരും കൂടെ ഉണ്ടായിരുന്നില്ല. അച്ഛനെ വിളിച്ച് വിവരം പറഞ്ഞിട്ടും വന്നില്ല. ദുരന്ത കാലത്ത് യാതൊരു സഹായവും ചെയ്യാത്ത അച്ഛന് പിന്നീട് ഒരു അപകടം പറ്റിയപ്പോള് നോക്കിയത് അമ്മയാണ്. എഴുന്നേറ്റ് നില്ക്കാം എന്ന് ആയപ്പോള് അമ്മയെ തല്ലി അച്ഛന് പോയി. പിന്നീട് പലപ്പോഴും മദ്യപിയ്ക്കുമ്പോള് അമ്മയെ വിളിച്ച് വഴക്ക് പറയാറുണ്ട്.
ജീവിതത്തിലെ മാറ്റം
സുജിന് കുറച്ച് വലുതായപ്പോള് പല പണിയ്ക്കും ശ്രമിച്ചു. അതിനിടയില് ഒരു വിവാഹവും കഴിഞ്ഞു. അമ്മ ജോലിയ്ക്ക് പോയും, ചേട്ടന് ഓട്ടോറിക്ഷ ഓടിച്ചു കുഞ്ചൂസ് കോളേജില് പോയും ജീവിതം മുന്നോട്ട് പോയി. ഒരു ഘട്ടം എത്തിയപ്പോള് അമ്മയോട് ജോലിക്ക് പോകേണ്ട എന്ന് ചേട്ടന് പറഞ്ഞു. ഓട്ടോറിക്ഷയുടെ വരുമാനത്തില് മാത്രം മുന്നോട്ട് പോകുമ്പോഴാണ് കൊറോണക്കാലം വന്നത്. ആ സമയത്ത് ആണ് യൂട്യൂല് സജീവമായത്. അതോടെ ജീവിതവും മാറി.
ഇപ്പോള് സന്തോഷം സമാധാനം
മാസം അഞ്ച് ലക്ഷം വരെ വരുമാനം വന്നിട്ടുണ്ട്. കുഞ്ചൂസിന്റെ കല്യാണം അടക്കം എല്ലാ ചെലവും നടന്നത് യൂട്യൂബ് വരുമാനത്തിലൂടെയാണ്. ഇപ്പോള് ഞങ്ങള് അനുഭവിയ്ക്കുന്ന എല്ലാ സുഖ സൗകര്യങ്ങളും വന്നത് അങ്ങനെയാണ്. ഞാനും ടാട്ടനും അമ്മയുമായി തുടങ്ങിയ കുടുംബം ഇപ്പോള് വലുതായി. എന്റെ ഭര്ത്താവും ടാട്ടന്റെ ഭാര്യയും ഞങ്ങളുടെ മക്കളും എല്ലാമായി സന്തുഷ്ട കുടുംബം
ടാട്ടന്റെ പ്രണയ വിവാഹം
യൂട്യൂബിലൂടെ ലക്ഷങ്ങള് വാരുന്നതിന് മുന്പേ തന്നെയായിരുന്നു സുജന്റെ വിവാഹം. അതും ഒരു സംഭവമായിരുന്നു. അപ്പോള് പൊന്നൂസിന് പതിനെട്ട് വയസ്സ് പൂര്ത്തിയായിരുന്നില്ല. പെണ്ണിന്റെ വീട്ടുകാര് കേസ് കൊടുത്ത് സുജിനെ അറിസ്റ്റ് ചെയ്യുകയും തല്ലുകയും ഒക്കെ ചെയ്തിട്ടുണ്ട്. പിന്നീട് പതിനെട്ട് വയസ്സ് പൂര്ത്തിയായപ്പോള് പൊന്നൂസ് തന്നെ വിളിച്ച് പറഞ്ഞു. അതോടെ ഇനി പിരിയില്ല എന്ന് തീരുമാനിച്ച് കെട്ടുകയാണ്. വിവാഹ ശേഷമാണ് ടാട്ടന് കുറച്ച് ഉത്തരവാദിത്വം ഒക്കെ വന്നത് എന്നാണ് കുഞ്ചൂസ് പറയുന്നത്.
കുഞ്ചൂസിന്റെയും പ്രണയ വിവാഹം
യൂട്യൂബില് വൈറലായിരുന്നു കുഞ്ചൂസിന്റെ വിവാഹം. എന്നാല് അതിന് പിന്നിലും ചെറിയ ചില പ്രശ്നങ്ങളൊക്കെ ഉണ്ടായിരുന്നു. ഫേസ്ബുക്കിലൂടെ പരിചയപ്പെട്ടതാണ് വിഷ്ണുവിനെ. പിന്നീട് പ്രണയമായി. വീട്ടില് പറഞ്ഞപ്പോള് പ്രണയിച്ചു കെട്ടിയ ചേട്ടന് പോലും എതിര്ത്തു. വീട്ടുകാരെ വേദനിപ്പിച്ച് വേണ്ട എന്ന് തീരുമാനിച്ച് പിരിഞ്ഞ ശേഷം വീണ്ടും കാലം ഒന്നിപ്പിയ്ക്കുകയായിരുന്നു രണ്ട് പേരെയും. ഇപ്പോള് അളിയനും അളിയനും കട്ട ഫ്രണ്ട്സ് ആണ്.