അവിചാരിതമായി നടന്ന കല്യാണം! മാതാപിതാക്കളുടെ വിവാഹത്തെക്കുറിച്ച് മീത്ത്

സോഷ്യല്‍മീഡിയയിലൂടെയായി പ്രേക്ഷകര്‍ക്ക് പരിചിതരായി മാറിയവരാണ് മീത്തും മിറിയും. രസകരമായ വീഡിയോകളും ജീവിതത്തിലെ മറ്റ് വിശേഷങ്ങളെക്കുറിച്ചുമൊക്കെ പറഞ്ഞാണ് ഇവരെത്താറുള്ളത്. ഇവരുടെ വിശേഷങ്ങളെല്ലാം പെട്ടെന്ന് തന്നെ വൈറലായി മാറാറുണ്ട്. ഫ്‌ളവേഴ്‌സ് ഒരുകോടിയില്‍ പങ്കെടുത്തപ്പോഴായിരുന്നു മീത്തും മിറിയും ജീവിതവിശേഷങ്ങള്‍ പങ്കുവെച്ചത്.
അച്ഛനും അമ്മയും സര്‍ക്കസുകാരായിരുന്നു. തലശ്ശേരിയില്‍ ഒരുപാട് സര്‍ക്കസ് ഗ്രൂപ്പുകളുണ്ടായിരുന്നു. അച്ഛന്‍ ഗ്ലോബ് റൈഡറായിരുന്നു. അച്ഛന് പല പ്രാവശ്യം പരിക്കുകള്‍ പറ്റിയിട്ടുണ്ട്. പൊട്ടാത്ത എല്ലുകളൊക്കെ കുറവാണ്. അച്ഛന്റെ അച്ഛനാണ് ആദ്യമായിട്ട് ഈ ഒരു സാധനം ഇന്ത്യയില്‍ ചെയ്തത്. അദ്ദേഹത്തിന് പ്രസിഡന്റിന്റെ മെഡലൊക്കെ കിട്ടിയിട്ടുണ്ട്. അമ്മ ഏഴാമത്തെ വയസില്‍ സര്‍ക്കസില്‍ പോയതാണ്. എട്ടോ ഒന്‍പതോ വയസുള്ളപ്പോഴാണ് അച്ഛന്‍ സര്‍ക്കസില്‍ പോയത്. അമ്മയുടെ കല്യാണം വേറൊരാളുമായി തീരുമാനിച്ചിരുന്നു. അതിനിടയിലാണ് അച്ഛന്‍ വില്ലനായി വന്നത്. അമ്മ ഗുജറാത്തിലെന്തോ ആയിരുന്നു. അവിടെ നിന്ന് കേരളത്തിലേക്ക് വരേണ്ടേ, ആ സമയത്താണ് നാട്ടിലേക്ക് പോവുന്ന വേറൊരാളുണ്ടെന്ന് പറഞ്ഞ് അച്ഛനൊപ്പം അമ്മയെ വിടുന്നത്. അച്ഛന്റെ അച്ഛന് അമ്മയെ ഇഷ്ടമായിരുന്നു. എന്തിനാണ് ഈ കുട്ടിയെ വേറെ കെട്ടിക്കുന്നത്. മകന് തന്നെ കെട്ടിക്കൂടേയെന്നായിരുന്നു ചോദിച്ചത്. അങ്ങനെയാണ് അവരുടെ കല്യാണം നടക്കുന്നത്.
ഞങ്ങള്‍ മൂന്ന് മക്കളാണ്. ഞങ്ങളൊക്കെ വലുതായ സമയത്താണ് അമ്മ സര്‍ക്കസ് നിര്‍ത്തിയത്. ടെന്റിലെ ജീവിതം വല്ലാത്തതാണ്. അത് ഞങ്ങള്‍ക്ക് നേരിട്ടറിയാവുന്നതാണ്. അച്ഛന് ഇടയ്ക്ക് ജോലി നഷ്ടമായിരുന്നു. നമ്മളുമായി കണക്ഷന്‍ ഇല്ലാതെ പോയിരുന്നു. കാലിന് പരിക്ക് പറ്റിയിരുന്നു. അതൊന്നും ഞങ്ങള്‍ അറിഞ്ഞിരുന്നില്ല. ഒരുനേരം ഭക്ഷണത്തിന് പോലും ബുദ്ധിമുട്ടുന്ന അവസ്ഥയായിരുന്നു. കൂട്ടുകുടുംബത്തില്‍ ഒത്തിരി ആള്‍ക്കാരുണ്ടായിരുന്നു. അവിടെ ചില സ്വരച്ചേര്‍ച്ചകളൊക്കെയുണ്ടായിരുന്നു. അതിന് ശേഷമായാണ് ഞങ്ങള്‍ വാടകവീട്ടിലേക്ക് മാറിയത്. അച്ഛന് ഈ ജോലി മടുത്ത സന്ദര്‍ഭങ്ങളൊക്കെയുണ്ടായിരുന്നു.
ഞങ്ങള്‍ ഒന്നിച്ച് കപ്പിള്‍ ടാറ്റു ചെയ്തിരുന്നു. അതിന്റെ വീഡിയോ സോഷ്യല്‍മീഡിയയിലൂടെ വൈറലായിരുന്നു. പൊതുവെ കോമഡി കാണാനിഷ്ടമാണ്. അതുകൊണ്ടാണ് കോമഡി വീഡിയോകള്‍ ചെയ്യുന്നത്. വീട് വെക്കണമെന്നുള്ളത് വലിയ സ്വപ്‌നമാണ്. അതിനായി പൈസയൊക്കെ മാറ്റിവെക്കുന്നുണ്ട്. അങ്ങനെ പിശുക്കി വെക്കുന്നൊന്നുമില്ല ഞങ്ങള്‍. അതേപോലെ മിറിയെ ബിഗ് സ്‌ക്രീനില്‍ കാണാനും ആഗ്രഹമുണ്ട്.