അരവിന്ദുമായുള്ള വിവാഹം
വിവാഹം ചെയ്ത് തീര്‍ത്തും മറ്റൊരു സംസ്‌കാരത്തിലേക്ക് ആണ് നിത്യ ദാസ് ചെന്നു കയറിയത്. പഞ്ചാബിക്കാരനായ അരവിന്ദ് സിംഗ് ജൗള ആണ് നിത്യയെ വിവാഹം ചെയ്തത്. ഇന്ത്യന്‍ എയര്‍ലൈന്‍സിന്റെ ഫ്‌ളൈറ്റ് ക്രൂ മെമ്പര്‍ ആയിരുന്നു അരവിന്ദ്. ചെന്നൈയില്‍ നിന്ന് കോഴിക്കോടേക്കുള്ള ഫ്‌ളൈറ്റ് യാത്രയ്ക്ക് ഇടയിലാണ് നിത്യയും അരവിന്ദും പ്രണയത്തിലായത്. വീട്ടുകാരുടെ സമ്മത പ്രകാരം വിവാഹവും നടന്നു.
വീട്ടിലെ ഭാഷ
വീട്ടില്‍ താന്‍ മക്കളുമായി മലയാളത്തിലാണ് സംസാരിക്കുന്നത്, ഭര്‍ത്താവുമായി ഹിന്ദിയിലും ഇംഗ്ലീഷിലും സംസാരിക്കും എന്ന് നിത്യ പറയുന്നു. ഭര്‍ത്താവിന് കുറച്ചൊക്കെ മലയാളം അറിയാം. അത് പഠിപ്പിക്കേണ്ടിയിരുന്നില്ല എന്ന് ഇപ്പോള്‍ തോന്നുന്നു എന്നും നടി പറയുന്നുണ്ട്. ആള്‍ക്ക് വൃത്തി അല്പം കൂടുതലാണ്. എല്ലാം നീറ്റ് ആയിരിക്കണം. തിടിച്ചിരിയ്ക്കുന്ന ആളുകളെയും അരവിന്ദിന് ഇഷ്ടമല്ലത്രെ. അത് കാരണമാണ് താന്‍ മെലിഞ്ഞത് എന്നും നടി പറഞ്ഞിട്ടുണ്ട്.
അവിടെയുള്ള സംസ്‌കാരം
വിവാഹം കഴിഞ്ഞ് നേരെ പോയത് കശ്മിരീലേക്ക് ആണ്. അവിടെയുള്ള ആചാരങ്ങളും ഭക്ഷണങ്ങളും ഒക്കെയായി പൊരുത്തപ്പെടാന്‍ കുറച്ച് സമയം എടുത്തു. അവരുടെ ഭക്ഷണ രീതികള്‍ എനിക്ക് തീരെ പറ്റില്ലായിരുന്നു. പിന്നീട് ഞാനവരെ കേരളീയ രീതിയിലുള്ള ഭക്ഷണങ്ങള്‍ ശീലിപ്പിച്ചു തുടങ്ങി. സംസാരത്തിലും സംസ്‌കാരത്തിലും വരെ മാറ്റങ്ങളുണ്ടായിരുന്നു. അതെല്ലാം സമയം എടുത്ത് പഠിച്ചു.
ഗോമൂത്രം കുടിച്ചത്
അവരുടെ അനിയന്റെ കല്യാണത്തിന് ഒരു സംഭവം ഉണ്ടായി. ചടങ്ങുകള്‍ക്ക് ഇടയില്‍ തീര്‍ത്ഥം പോലെ കൈയ്യിലെന്തോ തന്നു. തീര്‍ത്ഥമാണെന്ന് കരുതി ഞാന്‍ കുറച്ച് കുടിച്ച് ബാക്കി തലയിലൂടെ ഉഴിഞ്ഞു. അപ്പോള്‍ മകള്‍ പറയുന്നുണ്ടായിരുന്നു, അമ്മേ ഇതിന് ഉപ്പ് രസം ഉണ്ട് എന്ന്. ഹേയ് നിനക്ക് തോന്നിയതായിരിയ്ക്കും എന്ന് ഞാന്‍ പറഞ്ഞു. പിന്നീട് പച്ച നിറത്തിലുള്ള ഒരു സാധനം തന്നു. അത് എല്ലാവരും മുഖത്ത് തേയ്ക്കുന്നു, ഞങ്ങളും തേച്ചു. പിന്നീട് ആണ് അറിഞ്ഞത് ആദ്യം തന്നത് ഗോമൂത്രവും പിന്നീട് തന്നത് ചാണകവും ആണ് എന്ന്. അതിന് ശേഷം അവരുടെ ഇത്തരം ചടങ്ങുകളില്‍ നിന്ന് എല്ലാം ഞാന്‍ മാറി നില്‍ക്കും- നിത്യ ദാസ് പറഞ്ഞു