പ്രണയവും ഒളിച്ചോട്ടവും
ഇരുപത്തി നാലാം വയസ്സിലായിരുന്നു എന്റെ പ്രണയവും വിവാഹവും എല്ലാം. മൂന്ന് മാസത്തെ പ്രണയത്തെ കുറിച്ചും ഒളിച്ചോട്ടത്തെ കുറിച്ചും ഷാജി സംസാരിച്ചു. ചേട്ടന്റെ കല്യാണം കഴിഞ്ഞതിന്റെ തൊട്ടടുത്ത ദിവസമാണ് താന്‍ രശ്മിയെയും കൊണ്ട് ഒളിച്ചോടി പോയത്. ചേട്ടന്റെ കല്യാണം എന്റെ ഒളിച്ചോട്ടത്തില്‍ കുളമായി പോയി.
കല്യാണ ശേഷം
പക്ഷെ കല്യാണം കഴിച്ചതിന്റെ ഒരു ഉത്തരവാദിത്വവും എനിക്ക് ഉണ്ടായിരുന്നില്ല. പണിക്കൊന്നും പോകില്ലായിരുന്നു. രാവിലെ ഏതെങ്കിലും സുഹൃത്ത് വിളിച്ചാല്‍ ഇറങ്ങി പോകും. ഉച്ചയാവുമ്പോള്‍ കയറി വന്ന് ഊണ് കഴിക്കും. അത് കഴിഞ്ഞ് വീണ്ടും ആരെങ്കിലും വന്ന് വിളിച്ചാല്‍ പോവും. രാത്രി കയറി വരും. അതല്ല എങ്കില്‍ മിമിക്രി. മിമിക്രിയ്ക്ക് 75 രൂപ കിട്ടിയാല്‍ 30 രൂപ വിട്ടില്‍ വരുമ്പോള്‍ കൈയ്യില്‍ ഉണ്ടെങ്കില്‍ ഉണ്ട്. അത്ര തന്നെ. അതായിരുന്നു അവസ്ഥ.
വാടക വീട്ടിലേക്ക് മാറി
ഒന്നര വര്‍ഷത്തോളം ആ രീതിയില്‍ ഞാന്‍ മുന്നോട്ട് പോയി. അതിനിടയില്‍ രശ്മിയെ വഴക്ക് പറഞ്ഞാലോ ദേഷ്യപ്പെട്ടാലോ ഒന്നും അവളാരോടും പറഞ്ഞില്ല. അതിന് ശേഷം ഞങ്ങള്‍ക്ക് വാടക വീട്ടിലേക്ക് മാറേണ്ടി വന്നു. അതൊരു ഒറ്റ മുറി വീടായിരുന്നു. സൗകര്യങ്ങള്‍ ഒന്നും ഉണ്ടായിരുന്നില്ല. എന്നാലും ഞങ്ങളവിടെ കഴിഞ്ഞു, വീടിന് വാടക കൊടുക്കേണ്ടതു കാരണം പെയിന്റിങിന്റെ പണിയ്ക്ക് പോയി തുടങ്ങി.
രശ്മികാരണം ഞാന്‍ നടനായി
അങ്ങനെ പോകുന്ന സമയത്ത് ആണ് പ്രശാന്ത് കാഞ്ഞരമറ്റം എന്നെ വിളിയ്ക്കുന്നത്. പുതിയ ട്രൂപ്പ് തുടങ്ങാന്‍ പോകുകയാണ് നീ വാ എന്ന് പറഞ്ഞു കൊണ്ട്. 'നീ പോയേ അവിടുന്ന്. ഇപ്പോള്‍ കൃത്യമായ കൂലിയും കിട്ടുന്നുണ്ട് ജീവിതവും മുന്നോട്ട് പോകുന്നുണ്ട്' എന്ന് പറഞ്ഞ് ഞാന്‍ ഫോണ്‍ വച്ചു. അത് കഴിഞ്ഞ് വീട്ടിലെത്തിയപ്പോള്‍ രശ്മി ഭയങ്കര ദേഷ്യത്തില്‍. 'ചേട്ടന്‍ മിമിക്രിയ്ക്ക് അല്ലാതെ പെയിന്റിങിന്റെ പണിക്ക് പോയാല്‍ ഞാന്‍ തൂങ്ങി ചാവും' എന്ന് പറഞ്ഞു. അവിടെ നിന്നും തുടങ്ങിയതാണ് എന്റെ യാത്ര. എന്റെ ഭാര്യയാണ് എന്നെ നടനാക്കിയത്- പാഷാണം ഷാജി പറഞ്ഞു