തങ്കച്ചന്‍ തിരിച്ചുവരുന്നു
തങ്കച്ചന്‍ വിതുര സ്റ്റാര്‍ മാജിക്കിലേക്ക് തിരിച്ചെത്തുന്നു എന്ന വാര്‍ത്തയാണ് ഇപ്പോള്‍ പുറത്ത് വരുന്നത്. തങ്കച്ചന്‍ തിരിച്ചെത്തുന്നു എന്ന് പറഞ്ഞുകൊണ്ട് ചാനല്‍ പ്രമോയും പുറത്ത് വിട്ടു. തങ്കച്ചന്റെ തിരിച്ചുവരവ് സോഷ്യല്‍ മീഡിയയിലെ സ്റ്റാര്‍ മാജിക് പേജുകള്‍ ആഘോഷമാക്കുകയാണ് ഇപ്പോള്‍.
പ്രമോയില്‍
പല വേഷത്തിലും രൂപത്തിലും തങ്കച്ചന്‍ വരുന്നത് പ്രമോയില്‍ കാണാം. 'ഇനി ഇവിടെ എന്ത് സംഭവിച്ചാലും സുധിയെ പോലെ പോകാതെ ഇരിക്കണം' എന്ന് ബിനു അടിമാലി പറയുന്നുണ്ട്. എന്തെങ്കിലും കാരണം ഉണ്ടായിട്ടാണോ വിട്ടു നിന്നത് എന്ന് ലക്ഷ്മി ചോദിയ്ക്കുമ്പോള്‍ 'അങ്ങനെ പ്രത്യേകിച്ച് കാരണമൊന്നും ഇല്ല, എന്നാല്‍ ഒരു കാരണമുണ്ട്' എന്ന് തങ്കച്ചന്‍ പറയുന്നു.
തങ്കച്ചന്‍ മാറി നിന്നത്
ഒരു ഗള്‍ഫ് ഷോ കഴിഞ്ഞ് വന്നതിന് ശേഷമാണ് തങ്കച്ചന്‍ വിതുര സ്റ്റാര്‍ മാജിക്കില്‍ നിന്നും വിട്ടു നില്‍ക്കാന്‍ തുടങ്ങിയത്. ചാനലുമായി തങ്കച്ചന്‍ തെറ്റി പിരിഞ്ഞു എന്നും, സ്റ്റാര്‍ മാജിക് ടീം തങ്കച്ചനെ ഒഴിവാക്കിയതാണെന്നും ഒക്കെയുള്ള ഗോസിപ്പുകള്‍ ആ സമയത്ത് സജീവമായിരുന്നു.
പ്രേക്ഷകരെ നിരാശപ്പെടുത്തി
തങ്കച്ചന്റെ അഭാവം ഷോയില്‍ എടുത്ത് കാണാം എന്നായിരുന്നു പ്രേക്ഷകരുടെ അഭിപ്രായം. തങ്കച്ചന്‍ ഇല്ലാത്തത് കൊണ്ട് മാത്രം ഷോ കാണുന്നത് നിര്‍ത്തിയ ആരാധകരും ഉണ്ട്. ആ സമയത്ത് തങ്കച്ചന്‍, ഏഷ്യനെറ്റ്, മഴവില്‍ മനോരമ പോലുള്ള ചാനലുകളില്‍ കയറി എങ്കിലും വിജയകരമായി മുന്നോട്ട് പോകാന്‍ സാധിച്ചില്ല. എന്ത് തന്നെയായാലും ഈ തിരിച്ചുവരവ് തങ്കച്ചന്‍ ഫാന്‍സിന് ആഘോഷം തന്നെയാണ്.