ലൈഫ് ഈസ് ബ്യുട്ടിഫുൾ 2: ബിഗ് ബോസ് താരം രജിത് കുമാർ രണ്ടു കഥാപാത്രങ്ങളിൽ എത്തുന്ന സീരിയൽ ഉടൻ!

രണ്ടാം സീസൺ ബിഗ് ബോസ് മലയാളത്തിന്റെ വിവാദനായകൻ രജിത് കുമാർ വീണ്ടും ടെലിവിഷനിലേക്കു. ലൈഫ് ഈസ് ബ്യുട്ടിഫുൾ 2 എന്ന പുതിയ ഹാസ്യ പരമ്പരയിലൂടെയാണ് രജിത് അഭിനയ രംഗത്തേക്ക് കടക്കുന്നത്. പരമ്പരയിൽ രണ്ടു കഥാപാത്രങ്ങളായാണ് രജിത് വേഷമിടുന്നത്. അലക്സി എന്ന നായക കഥാപാത്രത്തെയും അതോടൊപ്പം അലെക്സിയുടെ പിതാവായ ഫെർണാണ്ടസിന്റെ ആത്മാവായും പ്രേക്ഷകർക്ക് മുന്നിൽ അദ്ദേഹം എത്തും.

സീരിയലിൽ രജിത്തിന്റെ ഭാര്യയായി അഭിനയിക്കുന്നത് നടി കൃഷ്ണ പ്രഭയാണ്. കൃഷ്ണപ്രഭക്ക് പുറമെ, മല്ലിക സുകുമാരൻ , അനു ജോസഫ് , അനൂപ് ശിവസേനൻ എന്നിവരും സീരിയലിൽ ഉണ്ടാകും. ഒരിടവേളക്ക് ശേഷം മല്ലിക സുകുമാരൻ ഒരു ഹാസ്യകഥാപാത്രം കൈകാര്യം ചെയ്യുന്നു എന്ന പ്രത്യേകതയും ഈ പരമ്പരക്കുണ്ട്.

Also Read: ജിപി മുതൽ ഷിയാസ് കരീം വരെ: ഈ ചുള്ളന്മാർ ഇപ്പോഴും ക്രോണിക് ബാച്ചിലർമാരാണ്!

അലക്സിയും സൂസനും വീടിന്റെ മുകളിലത്തെ നിലയിൽ താമസിക്കാൻ എത്തുന്നതോടു കൂടി താഴത്തെ നിലയിൽ താമസിക്കുന്ന സുഹാസിനിയുമായി ഉണ്ടാകുന്ന പ്രശ്നങ്ങളാണ് ഈ പരമ്പരയെ മുന്നോട്ടു കൊണ്ടുപോകുന്നത്.

പ്രോമോ കാണാം:



ആരംഭിക്കുന്നതിനു മുൻപ് തന്നെ പ്രേക്ഷകർക്കിടയിൽ ചർച്ചയായിരുന്നു ലൈഫ് ഈസ് ബ്യുട്ടിഫുൾ. ഈയിടെ രജിത് കുമാറിന്റെയും കൃഷ്ണ പ്രഭയുടെയും ഒരു വിവാഹചിത്രം സോഷ്യൽ മീഡിയയിൽ വൈറൽ ആയിരുന്നു. രണ്ടുപേരും രഹസ്യമായി വിവാഹിതരായോ എന്ന് ആരാധകർക്കിടയിൽ സംശയം ഉണ്ടായ സാഹചര്യത്തിൽ ഇരുവരും ഇത് തങ്ങളുടെ പുതിയ ടിവി പരിപാടിയുടെ ഫോട്ടോയാണെന്ന് വ്യക്തമാക്കിയിരുന്നു.

Also Read: 'ഇനി ആ കഥാപാത്രം ചെയ്യുന്നത് ഞാൻ ആണ്, ഇത് അവനു വേണ്ടി': നവീൻ അറക്കൽ

ലൈഫ് ഈസ് ബ്യൂട്ടിഫുൾ സീസൺ 2 ഏഷ്യാനെറ്റിൽ നവംബര് 28 മുതൽ എല്ലാ ശനിയാഴ്ചയും ഞായറാഴ്ചയും രാത്രി 9 . 30 നു സംപ്രേക്ഷണം ചെയ്യുന്നതാണ്. മലയാളം ടെലിവിഷനിലെ എക്കാലത്തെയും മികച്ച ഹാസ്യ പരമ്പരയായ, ലൈഫ് ഈസ് ബ്യൂട്ടിഫുളിന്റെ രണ്ടാം ഭാഗമായാണ് ഈ പരിപാടി എത്തുന്നത്. നടൻ ജഗദീഷും മഞ്ജു പിള്ളയും വിശ്വനാഥനും സുലോചനയുമായി എത്തിയ കുടുംബ പരമ്പര അന്ന് വലിയ ഹിറ്റ് ആയിരുന്നു.

ബിഗ് ബോസ് പരിപാടിയിൽ നിന്ന് പുറത്താക്കപ്പെട്ട ശേഷം ആദ്യമായാണ് രജിത് കുമാർ ഒരു ടെലിവിഷൻ പരിപാടിയിൽ എത്തുന്നത്. റിയാലിറ്റി ഷോയ്ക്കിടയിൽ രേഷ്മ എന്ന സഹ മത്സരാർത്ഥിയുടെ കണ്ണിൽ മുളക് തേച്ചതിന്റെ പേരിൽ അദ്ദേഹത്തെ പുറത്താക്കിയിരുന്നു. കോവിഡ് 19 വ്യാപനം കാരണം ബിഗ് ബോസ് പൂർത്തിയാക്കപ്പെട്ടില്ല എങ്കിലും ഈ വിവാദം ഇന്നും നിലനിൽക്കുന്നു.