അഞ്ജലി ​ഗർഭിണിയായാൽ ശിവാഞ്ജലീയം അവസാനിക്കുമല്ലോ! തെലുങ്കിനെ ഫോളോ ചെയ്യരുതെന്ന് പറഞ്ഞ ആരാധികയ്ക്ക് സാന്ത്വനം സംവിധായകൻ നൽകിയ മറുപടി ഇങ്ങനെ

ടെലിവിഷന്‍ പ്രേക്ഷകര്‍ക്ക് ഏറെ പ്രിയപ്പെട്ട പരമ്പരകളിലൊന്നാണ് സാന്ത്വനം. കുടുംബകഥ പറയുന്ന പരമ്പരയിലെ സംഭവവികാസങ്ങളെക്കുറിച്ചെല്ലാം ആരാധകര്‍ ചര്‍ച്ച ചെയ്യാറുണ്ട്. ശിവാഞ്ജലി റൊമാന്‍സ് പ്രേക്ഷകര്‍ക്കിടയില്‍ വലിയ ചര്‍ച്ചയായിരുന്നു. ബദ്ധശത്രുക്കളെപ്പോലെ കഴിഞ്ഞിരുന്ന അഞ്ജലിയും ശിവനും ഒന്നായതില്‍ സന്തോഷം പങ്കുവെച്ച് ആരാധകരെത്തിയിരുന്നു. ആദ്യരാത്രിക്ക് പിന്നാലെയായി അഞ്ജലിയെ ഗര്‍ഭിണിയാക്കാനുള്ള പരിപാടിയാണോയെന്ന് ചോദിച്ചായിരുന്നു ഒരു ആരാധികയെത്തിയത്. പരമ്പരയുടെ സംവിധായകനായ ആദിത്യനെ മെന്‍ഷന്‍ ചെയ്തായിരുന്നു പോസ്റ്റ്.
സാന്ത്വനം പെട്ടെന്ന് നിർത്താൻ പോവുകയാണോയെന്ന് ചോദിച്ചായിരുന്നു കുറിപ്പ് തുടങ്ങുന്നത്. ചോദിക്കാൻ കാരണം തെലുങ്ക് സീരിയൽ പോലെയാണ് ഇപ്പോൾ പോവുന്നത് എന്ന് യൂട്യൂബിൽ എല്ലായിടത്തും കമന്റുകൾ കണ്ടു. അറിഞ്ഞത് വെച്ച് അവിടെ ഏതോ നിലയിൽ സ്റ്റോറി കൊണ്ടുപോയി അവിടുത്തെ അഞ്ജലിയെ ആദ്യം തന്നെ ഗർഭിണി ആക്കി പ്രേക്ഷകരുടെ തുടർന്ന് കാണാനുള്ള എക്സൈറ്റ്മെന്റ് പോയി ഒടുവിൽ ആ ജോഡിയെ തന്നെ വെറുപ്പിച്ചു കൈയിൽ കൊടുത്ത് സ്റ്റോറി ഫ്ലോപ്പ് ആയി നിർത്തേണ്ടി വന്നു എന്നാണ് അറിഞ്ഞത്. സോ പ്ലീസ് തെലുങ്ക് ഫോളോ ചെയ്യരുത്. അപേക്ഷയാണ്.

പാണ്ഡ്യൻ സ്റ്റോർസ് ഇപ്പോഴുംഹൈ ആയിട്ടാ പോവുന്നത്. അതിൽ നിന്ന് മാറ്റം വരുത്തിക്കോളൂ. പക്ഷെ ഒരിക്കലും തെലുങ്ക് ഫോളോ ചെയ്യരുത്. അഞ്ജലിക്ക് കുഞ്ഞ് ഉണ്ടായാൽ ശിവാഞ്ജലീയം അവസാനിച്ചു എന്ന നഗ്ന സത്യം കുറച്ച് പേര് മനസിലാക്കില്ല. അവർ ശിവഞ്ജലിക്ക് കുഞ്ഞ് വേണം എന്നൊക്കെ പറയും. പാണ്ഡ്യൻ സ്റ്റോർസ് ഡയറക്ടർ ഇപ്പോഴും കതിർമുല്ലയ്ക്കു കുഞ്ഞ് ആവാതെ മുന്നോട്ട് പോവുന്നതിന്റെ ഗുട്ടൻസ് ഇത് കൊണ്ട് തന്നെ ആണെന്നാണ് തോന്നിയിട്ടുള്ളത്. സാർ ഞങ്ങളുടെ അഭിപ്രായം മാനിക്കുമെന്ന് വിശ്വസിക്കുന്നു. പഴയ പോലെ നെഗറ്റിവിറ്റി ഇല്ലാത്ത സാന്ത്വനം തിരിച്ചു വരട്ടെ . ഇനിയും ഒരുപാട് അവാർഡുകൾ സാന്ത്വനത്തിന് കിട്ടട്ടെ. അഞ്ജലി നാളെ ഗർഭിണി ആയിട്ട് ഈ പോസ്റ്റ് ഇട്ടിട്ട് കാര്യമില്ലലോ. അതുകൊണ്ട് ആണ് ഇപ്പോഴേ അഭിപ്രായം പറഞ്ഞൊരു പോസ്റ്റിട്ടത് എന്നുമായിരുന്നു കുറിപ്പ്.
ഇതിന് താഴെയായാണ് കമന്റുമായി സംവിധായകനെത്തിയത്. അഭിപ്രായത്തിന് നന്ദി. തെലുങ്കിൽ ഒരു എപ്പിസോഡേ ഇത് വരെ കണ്ടിട്ടുള്ളു. അതും തുടക്കത്തിലെ എപ്പിസോഡ്. തെലുങ്ക് ഫോളോ ചെയ്യാൻ ഉദ്ദേശ്യമില്ല. പിന്നെ ശിവാഞ്ജലി തന്നത്താൻ ഉദയം ചെയ്തത് ഒന്നുമല്ലല്ലോ. ഈ സീരിയലിന്റെ ഭാഗമാണവർ. പല ഘടകങ്ങളിൽ ഒന്ന്. കഥയെ ആശ്രയിച്ചാണ് റേറ്റിങ്ങ് . റേറ്റിങ്ങിനെ ആശ്രയിച്ച് സീരിയലും . ഇഷ്ടവും ഇഷ്ടക്കേടും മാറി മറിഞ്ഞ് വരും. അത്രയേ ഉള്ളൂയെന്നായിരുന്നു സംവിധായകൻ കമന്റ് ചെയ്തത്.