'ബോയിംഗ് ബോയിംഗി'ന് പിന്നാലെ ബിഗ് ബോസ് താരങ്ങളുടെ പുതിയ വെബ് സിരീസ്; 'വെളിവില്ലാക്കുന്ന് പോലീസ് സ്റ്റേഷൻ' ട്രെയിലർ

ബിഗ് ബോസ് മലയാളം സീസണ്‍ രണ്ട് മത്സരാര്‍ഥികളുടെ ബിബി കമ്പനി 2020 ചാനലിൽ പുതിയ വെബ് സിരീസ് വരുന്നു. ബിഗ് ബോസ് സീസണ്‍ രണ്ടിലെ ശ്രദ്ധേയ മത്സരാര്‍ഥികളായിരുന്ന ഫുക്രു, രാജിനി ചാണ്ടി, സുരേഷ് കൃഷ്‍ണന്‍, പാഷാണം ഷാജി, വീണ നായര്‍, മഞ്ജു പത്രോസ്, ആര്യ, രേഷ്‍മ നായര്‍, ആര്‍ ജെ രഘു, അലസാന്‍ഡ്ര, പ്രദീപ് ചന്ദ്രന്‍ തുടങ്ങിയവര്‍ കഥാപാത്രങ്ങളായെത്തിയ 'ബോയിംഗ് ബോയിംഗ്' എന്ന വെബ് സീരീസിന്‍റെ സീസൺ 1 പത്ത് എപ്പിസോഡുകള്‍ പൂർ‍ത്തിയായിരുന്നു. അതിന് പിന്നാലെ ഇപ്പോഴിതാ 'വെളിവില്ലാക്കുന്ന് പോലീസ് സ്റ്റേഷൻ' എന്ന പുതിയ വെബ് സീരീസുമായി എത്തുകയാണ് ബിബി കമ്പനി.

ബിബി കമ്പനി 2020 എന്ന യുട്യൂബ് ചാനലിലൂടെയാണ് വെബ് സിരീസ് പ്രേക്ഷകരിലേക്ക് എത്തുക. രാജീവ് അഞ്ചലിനൊപ്പം സംവിധാനസഹായിയായി പ്രവര്‍ത്തിച്ച് സിനിമാജീവിതം ആരംഭിച്ച സുരേഷ് കൃഷ്‍ണനാണ് സംവിധാനം. ബോയിംഗ് ബോയിംഗ് സീസൺ 1 ഒരുക്കിയതും ഇദ്ദേഹമായിരുന്നു. പ്രിയദര്‍ശന്‍ ചിത്രങ്ങളില്‍ അസിസ്റ്റന്‍റും അസോസിയേറ്റും ആയി. ഭാരതീയം, അച്ഛനെയാണ് എനിക്കിഷ്‍ടം, പതിനൊന്നില്‍ വ്യാഴം എന്നീ സിനിമകള്‍ സംവിധാനം ചെയ്തിട്ടുള്ളയാളുമാണ്.

പുതിയ വെബ് സീരീസിൽ സാബുമോൻ, പാഷാണം ഷാജി, ആര്യ, ഫുക്രു, മഞ്ജു പത്രോസ്, വീണ, പ്രദീപ് ചന്ദ്രൻ, രഘു, ആർജെ സൂരജ്, രേഷ്മ, സുരേഷ് കൃഷ്ണൻ, സാലു കെ ജോര്‍ജ്ജ്, സുകു സരിത്, ബെന്നി അരുൺ, ശ്രുതി, വിവേക് സാലു, വരുൺ ജി, അരുൺ കായംകുളം എന്നിവരാണ് അഭിനിയക്കുന്നത്. കഥ നിഥിൻ എസ് ധരനും തിരക്കഥയും സംഭാഷണവും അരുൺ കായംകുളവും ഡിഒപി റോബി തങ്കച്ചനും സുജിതും എഡിറ്റിംഗ് എംഎസ് അയ്യപ്പൻ നായരും സംഗീതം ബ്ലെസ്ലിയും നിര്‍വ്വഹിക്കുന്നു.

Also Watch :