ഇന്ന് ലോക അവയവദാന ദിനം

എല്ലാ വര്‍ഷവും ഓഗസ്റ്റ് 13 ലോക അവയവ ദാന ദിനമായി ആചരിക്കുന്നു. അവയവ ദാനത്തെ സംബന്ധിച്ച് ഒട്ടേറെ തെറ്റിദ്ധാരണകളും അന്ധവിശ്വാസങ്ങളും നില നില്‍ക്കുന്നുണ്ട്. ഇത്തരം തെറ്റിദ്ധാരണകളെ പൊളിച്ചെഴുതുവാനും അവയവ ദാനം സംബന്ധിച്ച് ജനങ്ങളെ ബോധവല്‍ക്കരിക്കുകയും അവരെ അതിനു വേണ്ടി പ്രോത്സാഹിപ്പിക്കുകയുമാണ് ഈ ദിനം കൊണ്ട് ഉദ്ദേശിക്കുന്നത്. ശരീരത്തിലെ ഏതെങ്കിലും ഒരു പ്രധാന അവയവത്തിന്‍റെ പ്രവര്‍ത്തനം നിലയ്ക്കുന്നത് മൂലം പ്രതിവര്‍ഷം 5 ലക്ഷം പേരെങ്കിലും രാജ്യത്ത് മരിക്കുന്നുണ്ടെന്നാണ് കണക്ക്. മസ്തിഷ്‌ക മരണം സംഭവിക്കുന്ന ഒരു മനുഷ്യന് 8 പേരുടെ ജീവന്‍ രക്ഷിക്കാമെന്നിരിക്കെയാണ് ഇത്രയും പേരെ മരണത്തിന് വിട്ടു കൊടുക്കേണ്ടി വരുന്നത്. ഇവിടെയാണ് ലോക അവയവ ദാന ദിനത്തിന്‍റെ പ്രസക്തി. അവയവദാനം ആവശ്യമായി വരുന്ന രോഗികളുടെ എണ്ണത്തില്‍ മുമ്പന്തിയിലാണ് കേരളം. ഒരു വ്യക്തി മരിച്ചു കഴിഞ്ഞാല്‍ പിന്നെ അയാളുടെ അവയവങ്ങള്‍ കൊണ്ട് യാതൊരു ഉപയോഗവും ഇല്ല. പക്ഷെ അവയവം ദാനം ചെയ്യുന്നതിലൂടെ അത് മറ്റ് പലരുടെയും പുതിയ ജീവിതത്തിന് അനുഗ്രഹമായി തീരും.