നീരജ് ചോപ്രയ്ക്ക് കോമൺവെൽത്ത് ഗെയിംസ് നഷ്ടമാകും; ഇന്ത്യക്ക് കനത്ത തിരിച്ചടി

ടോക്കിയോ ഒളിമ്പിക്സിലെ സ്വർണമെഡൽ ജേതാവും, ഇത്തവണത്തെ ലോക അത്ലറ്റിക്ക് ചാമ്പ്യൻഷിപ്പിൽ വെള്ളിമെഡലും കരസ്ഥമാക്കിയ ഇന്ത്യയുടെ ജാവലിൻ ത്രോ സൂപ്പർ താരം നീരജ് ചോപ്രക്ക് ഈ വർഷത്തെ കോമൺവെൽത്ത് ഗെയിംസ് നഷ്ടമാകും. ലോക അത്ലറ്റിക്ക് ചാമ്പ്യൻഷിപ്പിന്റെ ഫൈനലിനിടെ സംഭവിച്ച പരിക്കാണ് നീരജിന്റെ കോമൺവെൽത്ത് ഗെയിംസ് പങ്കാളിത്ത ത്തിന് തിരിച്ചടിയായത്. ഗെയിംസിൽ ഇന്ത്യയുടെ ഉറച്ച മെഡൽ പ്രതീക്ഷ കൂടിയായിരുന്നു നീരജ് ചോപ്ര. അത് കൊണ്ടു തന്നെ രാജ്യത്തെ കായിക പ്രേമികൾക്ക് വലിയ നിരാശ സമ്മാനിക്കുന്ന വാർത്തയാണിത്. പുരുഷ ജാവലിൻ ത്രോയിൽ ലോകത്തെ ഏറ്റവും മികച്ച താരങ്ങളിൽ ഒരാളാണ് നീരജ് ചോപ്ര. ഗോൾഡ് കോസ്റ്റ് ആതിഥേയത്വം വഹിച്ച 2018 ലെ കോമൺവെൽത്ത് ഗെയിംസിൽ ജാവലിനിൽ സ്വർണ മെഡൽ കരസ്ഥമാക്കിയത് നീരജായിരുന്നു. തുടർന്ന് ഇക്കഴിഞ്ഞ ഒളിമ്പിക്സിലും സ്വർണ മെഡൽ നേടി താരം ചരിത്രമെഴുതി. കരിയറിലെ ഏറ്റവും മികച്ച സമയത്തിലൂടെ കടന്നു പോകുന്നതിനിടെയാണ് പരിക്ക് മൂലം അദ്ദേഹം കോമൺവെൽത്ത് ഗെയിംസിൽ നിന്ന് പുറത്തായിരിക്കുന്നത്. ഞായറാഴ്ച നടന്ന ലോക അത്ലറ്റിക്ക് ചാമ്പ്യൻഷിപ്പിന്റെ ഫൈനലിൽ തന്റെ നാലാം ശ്രമത്തിനിടെയാണ് ചോപ്രക്ക് പരിക്കേൽക്കുന്നത്. "നാലാമത്തെ ശ്രമത്തിന് ശേഷം എനിക്ക് തുടയിൽ അല്പം വേദന അനുഭവപ്പെട്ടു. എനിക്ക് തുടയിൽ കൂടുതൽ പ്രയത്നം ചെയ്യാൻ കഴിഞ്ഞില്ല‌. വേദന മൂലം ഞാൻ തുടയിൽ മുറുകെ പിടിച്ചു. ഇത് പ്രശ്നമാകുമോ എന്നത് നാളെ രാവിലെ അറിയാം." മത്സരത്തിൽ വെള്ളിമെഡൽ നേടിയതിന് ശേഷം ഇന്ത്യയുടെ അഭിമാന താരം പറഞ്ഞു.