കടലിനടിയിൽ തമ്മിലടി; 21 ഡോൾഫിനുകൾ ജീവൻ വെടിഞ്ഞു

മെക്‌സിക്കോ: കടലിനടിയിലും ജീവികൾ തമ്മിൽ ഇടയ്ക്കിടെ പോരാട്ടങ്ങള്‍ നടക്കുന്നുണ്ടെന്ന് പുതിയ കണ്ടെത്തല്‍. കഴിഞ്ഞദിവസം മെക്‌സിക്കന്‍ തീരത്തടിഞ്ഞ ഡോള്‍ഫിന്‍ കൂട്ടത്തിനെ സൂക്ഷ്മ പരിശോധനയ്ക്ക് വിധേയമാക്കിയപ്പോഴാണ് ഇത് കണ്ടെത്തിയത്. മെക്‌സിക്കോയിലെ ലാ പാസ് തീരത്താണ് മരണത്തോട് മല്ലടിക്കുന്ന നിലയില്‍ ഡോള്‍ഫിനുകളെ ലഭിച്ചത്.


ഇവയെ തിരികെ കടലിലേയ്ക്കയ്ക്കാനുള്ള പരിസ്ഥിതി സ്‌നേഹികളുടെ ശ്രമം ആദ്യമൊന്നും ഫലവത്തായില്ല. ഓരോ തവണ കടലിലേയ്ക്ക് അയക്കുമ്പോഴും ഇവ തിരികെ തീരത്തേയ്ക്ക് എത്തിക്കൊണ്ടിരുന്നു. ഇതിന്റെ കാരണം തിരക്കിയപ്പോള്‍ തീരത്തിന് സമീപം കുപ്പിമൂക്കന്‍ ഡോള്‍ഫിനുകളെ കണ്ടെത്തുകയായിരുന്നു.

പൊതുവെ കടലിലെ സൗഹൃദ സ്വഭാവമുള്ള ജീവിയായാണ് ഡോള്‍ഫിനുകളെ വിലയിരുത്തുന്നത്, എന്നാല്‍ കുപ്പിമൂക്കന്‍ ഡോള്‍ഫിനുകള്‍ പലപ്പോളും മറ്റ് വിഭാഗങ്ങളിലുള്ള ഡോള്‍ഫിനുകളെയും മല്‍സ്യങ്ങളെയും അക്രമിക്കുന്നതായി കണ്ടിട്ടുണ്ടെന്ന് വിദഗ്ദര്‍ പറയുന്നു. 54 ഡോള്‍ഫിനുകളാണ് കരക്കടിഞ്ഞതിൽ 21 ഡോള്‍ഫിനുകള്‍ക്ക് ജീവന്‍ നഷ്ടമായി ബാക്കി 33 എണ്ണത്തെ കടലിലേക്ക് തിരിച്ചയച്ചിട്ടുമുണ്ട്.