ഈ മിടുക്കൻ ഒറ്റ ദിവസം കൊണ്ട് വായിക്കുന്നത് നൂറോളം പുസ്തകങ്ങൾ

വായനയുടെ മഹത്വത്തെ കുറിച്ച് ഏവർക്കുമറിയാം. അറിവും ഏകാഗ്രതയും വർധിക്കാനും സമ്മർദ്ദം കുറയ്ക്കാനുമൊക്കെ വായനാശീലം ഉപകരിക്കും. ഒരു നേരംമ്പോക്കിന് വായിക്കുന്നവരും അല്ലാതെ വായനയെ വളരെ ഗൗരവത്തോടെ സമീപിക്കുന്നവരും ഉണ്ട് നമ്മുടെ ഇടയിൽ. പുസ്തക വായന ആയുസ്സ് വർധിപ്പിക്കും എന്ന കണ്ടെത്തലുകളും അടുത്തിടെ ഉണ്ടായിട്ടുണ്ട്.

ഒരാൾക്ക് ഒരു ദിവസം എത്ര പുസ്തകങ്ങൾ വായിക്കാൻ കഴിയുമെന്ന് ചിന്തിച്ചിട്ടുണ്ടോ? ഈ തിരക്കേറിയ ലോകത്ത് പുസ്തകങ്ങൾ വാങ്ങി വായിക്കാനുള്ള സമയവും ക്ഷമയും തീരെ കുറവാണ്. എന്നിരുന്നാലും വിരലിലെണ്ണാവുന്ന ചില വായനാപ്രേമികൾ ഉണ്ടാവും നമ്മുക്ക് ചുറ്റും. ഒരു ദിവസം നൂറ് പുസ്തകങ്ങളൊന്നും വായിച്ച് തീർക്കാൻ ഇവർക്ക് സാധിക്കില്ലെന്ന് ഉറപ്പാണ്. ചിക്കാഗോകാരനായ കലേബ് എന്ന നാലുവയസുകാരനോട് ഇതേ ചോദ്യം ചോദിച്ചാൽ നൂറ് അല്ലെങ്കിൽ അതിനും മുകളിൽ എന്നായിരിക്കും ഉത്തരം.



ദിവസവും നൂറ് പുസ്തകങ്ങളെങ്കിലും വായിക്കാറുണ്ടെന്ന് കലേബ് പറഞ്ഞപ്പോൾ പിതാവ് സൈലസിന് പോലും വിശ്വസിക്കാൻ കഴിഞ്ഞില്ല. കുട്ടിക്കളിയായിട്ടാണ് സൈലസ് ഇതിനെ തള്ളി കളഞ്ഞത്. കലേബിന്‍റെ പുസ്തകങ്ങളോടുള്ള ഇഷ്ടം മനസിലാക്കി കഴിഞ്ഞപ്പോൾ മകന് പൂർണ പിന്തുണയും ഈ പിതാവ് നൽകി. മകന്‍റെ ഈ കഴിവിനെ പുറംലോകത്തെത്തിക്കാൻ പിതാവ് സൈലസ് മകൻ പുസ്തകങ്ങൾ വായിക്കുന്ന വീഡിയോ ദൃശ്യങ്ങൾ ഫേസ്ബുക്കിൽ പങ്കുവച്ചു.

രണ്ടര മണിക്കൂറിൽ നൂറു പുസ്തകങ്ങൾ വായിക്കുമെന്ന കലേബിന്‍റെ ആഗ്രഹമാണ് ഇതുവഴി സാധിച്ചത്. എന്‍റെ പേര് സലേബ് ഗ്രീൻ. ഞാൻ നൂറ് പുസ്തകങ്ങൾ വായിക്കാൻ പോകുന്നു എന്ന മുഖവുരയോടെയാണ് വീഡിയോ ആരംഭിക്കുന്നത്. ദിവസവും നൂറുപുസ്തകങ്ങൾ വായിച്ചിരുന്ന കലേബ് വീഡിയോയ്ക്ക് വേണ്ടി രണ്ടര മണിക്കൂറിൽ നൂറ് പുസ്തകങ്ങൾ വായിച്ചുതീർത്തു.



വീഡിയോ വൈറലായതോടെ കലേബിന് സമ്മാനങ്ങളുമായി നിരവധിപേർ രംഗത്തെത്തി. ചിലർ പുസ്തകങ്ങളും പുസ്തകം വാങ്ങിക്കാനുള്ള പണവുമായിരുന്നു സമ്മാനമായി നൽകിയത്. ഇങ്ങനെ ലഭിക്കുന്ന പുസ്തകങ്ങളും പണവും കലേബിനെ പോലെ വായന ഇഷ്ടപ്പെടുന്ന കുട്ടികളെ പ്രോത്സാഹിപ്പിക്കാൻ ഉപയോഗിക്കുമെന്ന് സൈലസ് വ്യക്തമാക്കി.