പട്ടികടിച്ച്‌ 429 മരണം, ഭീകരാക്രമണത്തിൽ 421 ഉം ; ഏതാണ് ഭയാനകം

പട്ടികടിയാണോ ഭീകരാക്രണമാണോ വലുത്? ചോദ്യത്തെ തള്ളിക്കളയാൻ വരട്ടെ. 20 വര്‍ഷത്തിനിടയില്‍ രാജ്യത്ത് തെരുവ് നായ്ക്കളുടെ കടിയേറ്റ് മരിച്ചവരുടെ എണ്ണം 1993 ല്‍ മുംബൈയില്‍ നടന്ന സ്ഫോടന പരന്പരയേക്കാളും 26/11 ഭീകരാക്രമണത്തേക്കാളും കൂടുതലാണെന്ന് റിപ്പോര്‍ട്ട്.

തെരുവ് നായ്ക്കളെ ഇല്ലായ്മ ചെയ്യുന്നത് ഒരു ധാര്‍മ്മിക വിഷയമായി പരിഗണിക്കുന്ന മൃഗസ്നേഹികള്‍ക്ക് മുന്നില്‍ കണക്കുകളുമായി എത്തിയിരിക്കുന്നത് ബ്രിഹണ്‍ മുനിസിപ്പല്‍ കോര്‍പ്പറേഷനാണ്. 1994 മുതല്‍ പട്ടികടിയേറ്റ് വിവിധ കാരണങ്ങള്‍ കൊണ്ട് മരിച്ചത് 429 പേരാണെന്ന് ഇതിലൂടെ പരിക്കേറ്റവരുടെ എണ്ണം മാത്രം 13.12 ലക്ഷം പേര്‍ വരുമെന്നും ഇവര്‍ ബുധനാഴ്ച സുപ്രീംകോടതിയില്‍ വ്യക്തമാക്കി. 1993 ലെ പരന്പര സ്ഫോടനത്തില്‍ 257 പേരാണ് കൊല്ലപ്പെട്ടത്.

717 പേര്‍ക്ക് പരിക്കേല്‍ക്കുകയും ചെയ്തു. 26/11 ഭീകരാക്രമണത്തില്‍ 164 പേര്‍ മരണമടയുകയും 308 പേര്‍ക്ക് പരിക്കേല്‍ക്കുകയും ചെയ്തു. ഇത് രണ്ടും കൂടി കൂട്ടിയാലും 421 മരണവും 1,025 പരിക്കേറ്റവരുമേ വരൂ. തെരുവ് നായ പ്രശ്നം സുപ്രീംകോടതിയിലേക്ക് വലിച്ചിഴച്ചത് ഒരു എന്‍ജിഒ ആയിരുന്നു. എല്ലാ വര്‍ഷവും മുംബൈയില്‍ തെരുവ്നായയുടെ കടിയേല്‍ക്കുന്നവരുടെ എണ്ണം കൂടുകയാണെന്നും മൃഗസ്നേഹികളുടെ എതിര്‍ക്കുന്നതിനാല്‍ തെരുവ് നായ്ക്കളെ നീക്കം ചെയ്യാനുള്ള പ്രവര്‍ത്തനങ്ങളില്‍ ഒന്നും ചെയ്യാനാകുന്നില്ലെന്നും പറഞ്ഞു.

നേരത്തേ പട്ടികടിയേറ്റ് സെപ്റ്റിക്കായ കുട്ടിയുടെ മാതാവ് പുറത്ത് തെരുവ്നായ ശല്യം രൂക്ഷമായതിനാല്‍ തനിക്ക് കുട്ടിയുമായി പുറത്തു പോകാന്‍ കഴിയുന്നില്ലെന്ന് മെസേജ് ചെയ്തതായി അമിക്യസ് ക്യൂറി ദുഷ്യന്ത് ദേവ് പറഞ്ഞു. നേരത്തേ ഭര്‍ത്താവ് പട്ടികടിയേറ്റ് മരിച്ച ഒരു വിധയുടെ കാര്യത്തില്‍ കുടുംബത്തിനുള്ള നഷ്ടപരിഹാരം സംസ്ഥാന സര്‍ക്കാരാണോ അതോ പ്രാദേശിക ഭരണകൂടമാണോ നല്‍കേണ്ടതെന്ന് സുപ്രീംകോടതി പറയണമെന്ന് കേരളത്തിലെ ഒരു അഭിഭാഷകനും പറഞ്ഞിരുന്നു. ഇക്കാര്യത്തില്‍ ഒരു ക്യത്യമായ ഉത്തരം നല്‍കാന്‍ കഴിയുമോയെന്ന് മൃഗസംരക്ഷണ ബോര്‍ഡിനോട് കോടതി ചോദിച്ചിരുന്നു.