ഈഡിസ് കൊതുകുകളെ നശിപ്പിക്കാന്‍ 'ഹാത്തി മോസ'

കൊൽക്കത്ത: ഡെങ്കു പരക്കുന്നത് തടയാൻ പ്രകൃതിദത്തമായ വഴി തെളിയുന്നതായി കൊൽക്കത്തയിൽ നടന്ന ചില പഠനങ്ങൾ വ്യക്തമാക്കുന്നു. പശ്ചിമ ബംഗാൾ രാജ്ഭവൻ പരിസരത്ത് ടോക്സോറൈൻചൈറ്റിസ് എന്ന പ്രത്യേക ഇനം കൊതുകുകളെ കണ്ടെത്തിയതാണ് പഠനങ്ങൾക്ക് വഴിത്തിരിവായത്. ഈ ഇനത്തിൽപ്പെട്ട കൊതുകുകളുടെ തല ആനയുടെ രൂപവുമായി സാമ്യമുള്ളതിനാൽ 'ഹാത്തി മോസ' അല്ലെങ്കിൽ ആന കൊതുകുകൾ എന്ന് ഇവ അറിയപ്പെടുന്നു.

എന്നാല്‍ ആന കൊതുകുകൾ ഒരിക്കലും മനുഷ്യരെ കടിക്കില്ല എന്ന സവിശേഷതയാണ് ഇവയെ വ്യത്യസ്തമാക്കുന്നത്. ഡെങ്കു പരത്തുന്ന ഈഡിസ് കൊതുകുകളുടെ ലാർവയാണ് ഇവയുടെ ഭക്ഷണം. ടോക്സോറൈൻചൈറ്റിസ് എന്ന ഇനത്തിൽപെട്ട കൊതുകുകളെ കൂടുതലായി കാണുന്നത് കാടിനുള്ളിലാണ്. ഇവ കൊൽക്കത്തയിൽ എങ്ങനെ എത്തിയെന്നു ഇത് വരെ കണ്ടു പിടിക്കാൻ കഴിഞ്ഞിട്ടില്ല. രാജ്ഭവൻ പരിസരത്തുള്ള മുളങ്കാടുകൾക്കുള്ളിലാണ് കൊതുകുകളെ കണ്ടെത്തിയത്.

ഇവ ഡെങ്കു രോഗത്തിനുള്ള ശരിയായ ഉത്തരമായിരിക്കുമെന്ന് കൊൽക്കത്ത കോർപ്പറേഷനിൽ ചെറുപ്രാണികളെ കുറിച്ച് ഗവേഷണം നടത്തുന്ന ദേബാശിഷ് ബിശ്വാസ് പറഞ്ഞു. തായിലന്‍ഡിലും സിംഗപ്പൂരിലും ഡെങ്കു പരത്തുന്ന കൊതുകകളെ നശിപ്പിക്കാൻ ഇവയെയാണ് ഉപയോഗിക്കുന്നതെന്ന് അദ്ദേഹം അറിയിച്ചു. സമാനമായ രീതിയിൽ ഡെങ്കു പരത്തുന്ന ഈഡിസ് കൊതുകുകളെ ഇവയെ ഉപയോഗിച്ച് കൊൽക്കത്തയിൽ നിന്ന് തുരത്താനുള്ള നടപടികൾ ആരംഭിച്ചു കഴിഞ്ഞു എന്നും അദ്ദേഹം പറഞ്ഞു.