കണ്ണൂര്‍കാരന് എയര്‍ ഇന്ത്യയുടെ സര്‍പ്രൈസ് ഗിഫ്റ്റ് വൈറൽ

കണ്ണൂര്‍: അബുദാബിയിൽ നിന്നും കണ്ണൂരിലേക്ക് യാത്രപുറപ്പെട്ട യാത്രക്കാരന് എയര്‍ ഇന്ത്യയുടെ വക ഒരു കിടിലൻ സര്‍പ്രൈസ്. ഭര്‍ത്താവറിയാതെ ഭാര്യയാണ് ഈ സര്‍പ്രൈസിന് ചുക്കാൻ പിടിച്ചത്. കണ്ണൂര്‍ അന്താരാഷ്ട്ര വിമാനത്താവളത്തിലേക്ക് അബുദാബിയിൽ നിന്നുള്ള എയര്‍ ഇന്ത്യ എക്സ്‍പ്രസിലാണ് ഈ ആഘോഷം അരങ്ങേറിയത്.

ഡിസംബര്‍ 9ന് ഉദ്ഘാടനം ചെയ്ത കണ്ണൂര്‍ അന്താരാഷ്ട്ര വിമാനത്താവളത്തിലേക്കുളള എയര്‍ ഇന്ത്യ എക്സ്‍പ്രസിൽ ആദ്യമായിട്ട് ആഘോഷിച്ച ഈ ജന്മദിനം ഫേസ്ബുക്കിൽ ഏറെ വൈറലായിരിക്കുകയാണ്. വ്യാഴാഴ്ച്ചയാണ് അബൂദാബിയില്‍ നിന്നും കണ്ണൂരിലേക്ക് റാം അജിത് എന്ന യാത്രക്കാരനും കുടുംബവും യാത്രതിരിച്ചത്.

എന്നാൽ റാമിന്‍റെ ഭാര്യ അമിത, റാം അറിയാതെ ഫേസ്ബുക്ക് മെസഞ്ചറിലൂടെ എയര്‍ ഇന്ത്യയോട് ചാറ്റ് ചെയ്താണ് റാമിന് ഒരു സര്‍പ്രൈസ് കൊടുക്കണമെന്ന് അപേക്ഷിച്ചിരുന്നത്. മകളുമൊപ്പം ഇവര്‍ വിമാനത്തില്‍ എത്തിയപ്പോഴേക്കും എയര്‍ഇന്ത്യ ജീവനക്കാരിൽ ചിലര്‍ കേക്കും ബൊക്കെയുമായി ഇവരെ വരവേൽക്കുകയായിരുന്നു. യാത്രയ്ക്കിടെ വിമാനത്തിൽ വച്ച് റാമിന്റെ ജന്മദിനം ആണെന്ന് ക്യാപ്റ്റന്‍ മൈക്കിലൂടെ വിളിച്ചുപറഞ്ഞു.

വിമാനത്തിൽ വച്ചു തന്നെ കേക്കും മുറിച്ചു. വിമാനത്തിലുള്ള കുറെയേറെ പേര്‍ക്ക് കേക്കും നൽകാനായി. ഈ സര്‍പ്രൈസ് ഗിഫ്റ്റഇന് എയര്‍ ഇന്ത്യ എക്സ്‍പ്രസ് ജീവനക്കാര്‍ക്ക് അമിത ഫേസ്ബുക്കിലൂടെ നന്ദി അറിയിച്ചതോടെയാണ് സംഭവം വാര്‍ത്തയായിരിക്കുന്നത്.